Read zande Amokedi 8 Bible Online

Amokedi 8 - zande bible

Amokedi 8

¹Ni gu rago re bakere rungosi ki ye kuti gu kanisa nadu Yerusarema yo; si ki gbandaka yo agbandaka rogo ngbi Yuda na ngbi Somorona dunduko, kina amokedi ki nye.

²Ruru akumba ki kpisidi Setefano, ki kpari ko akpara gbe.

³Ono Saura ki nimangi kanisa amanga niririmi ku rogo abambu dunduko, ki nigbefe akumba na ade ki nikisi yo ku bambukisa yo.

⁴Agu yo nagbataka i ki tona ka ndu kirikiri nitungusi Pai.

⁵Firipo ki ndu ku rogo gu bakporo yo nga Somorona, ki tungusi pa Kristo fu aboro.

⁶Arimbasa ki mongo ye tuyo fu agu apai Firipo agumba re ho i agi he ni, ki bi agu apai i aina pai ti ni ko amanga.

⁷Bambiko gbigbita atoro ago ti agu yo ni dungu yo ami aima zia yo, nipoi ku ari; agu yo nadu na ngbaramoni, na agu yo nagbarĩ ni dungu yo i ki nihuhuku.

⁸Ngbarago ki du adu rogo gu bakporo re gbe.

⁹Ono kumba adu yo, rimoko angia Simona, ko anasoroka bakporo yo mbata, ki niiriwosi aboro Somorona ki ya bakere boro nga ko.

¹⁰I ki nidege tuyo kina koyo du ko ni dunduko, niya, “Gi kumba re nga gu tandu Mbori i niya ti ni, Bahe.”

¹¹I ki nidege tuyo koyo du ko ni bambiko ko anairiwosi yo ti dungu rame ni gako soroka.

¹²Ono ho i aidi pa Firipo ni wa ko atungusa wene pangbanga tipa ga Mbori ngbi na pa rimo Yesu Kristo, i ki bapatizi yo, akumba na ade a.

¹³Simona ki idi paha a tigako; i ki bapatizi ko ko ki nye na Firipo. Simona ki ta bi agu apai du na tandu na agu apai i aina pai ti ni i amanga nikigi akiga.

¹⁴Were ho agu amokedi agi he ni nadu Yerusarema yo ya aboro Somorona aka kuti ga Mbori Pai, i ki kedi aPetero na Yoane koyo du yo ni.

¹⁵Ho i ada ni, i ki kpari tipa yo ya i du na Ziazia Toro;

¹⁶bambiko ko azorã nga ho ku ri yo wa sa te; kina bapatizi yo ku rogo rimo Gbia Yesu yo.

¹⁷I ki mamoi beyo ti yo i ki du na Ziazia Toro.

¹⁸Were ho Simona abi he ni ya fu yo Ziazia Toro ti maa amokedi beyo, ko ki kido yo tipa marã,

¹⁹ki ya, “Oni fú gi tandu fere a re, mi ya moi bere ti gu ni, ni du na Ziazia Toro.”

²⁰Ono Petero ki ya fu ko, “Mo kpi akpi na ga marã bambiko mo berẽ pa dia ga Mbori gamunihe ni marã.

²¹Gamunihe tipa ro te, ga pai adu nga rogo gi sunge re wa sa te; bambiko kpotoro yo ni ruru he bangiri Mbori te.

²²Mo zúngadi tiro ti gi gamo gbegberẽpai re, ki kpari fu Gbia, si ngia ko avú ro ti sangba kpotoro yo.

²³Bambiko mi bi he ya nirãnirã kere he nga mo, gbegberẽpai vo ro.”

²⁴Simona ki karaga ha ki ya, “Oni kpári fu Gbia tipa re ya agi apai oni agumba re ka si ye nga sa re wa sa ya.”

²⁵Were ho i apeke pai ni ki gumba pa Gbia, i ki karaga tiyo ku Yerusarema yo, ki nitungusi wene pangbanga rogo agu akporo nga ga aSomorono.

²⁶Ga Gbia maraika ki gumba pai fu Firipo, ya, “Mo gúari ki ndu ku pavururago yo sa gu gene mo Yerusarema yo ka ndu ku Gaza yo; gu nga ngbakungba.”

²⁷Ko ki guari ki ndu; ki bi kumba nga boro Etiopia nga banyaki nadu na bakere tandu fu Kandake, nangia nakindo aEtiopio, ko du ni ira gari ũkumuko dunduko, ko aye ku Yerusarema yo ka irisa Mbori.

²⁸Ko ki ta ga ki sungu rogo gako ngbagida yo, nigedi gu pai gu nebi ake nga Yesaya.

²⁹Ziazia Toro ki ya fu Firipo, “Mo mbédi ki gbia tiro kuti gi ngbagida re.”

³⁰Firipo ki oro koyo du ko ni, ki gi pako ko nigedi gu pai Yesaya ake nga nebi. Firipo ki ya, “Mo rúgu tiro na gu pai mo ageda?”

³¹Ko ki ya. “Ka mi wiri pa ina ha wãi? kina boro ka yugu he fere.” Ko ki kpari fu Firipo ko biti i sungu na ko.

³²Were ba gu pai ko agedi rogo Ziazia Kekeapai yo si nangia gere, ya, “I aye na ko wa kandoro sa imo ru; wa wiri kandoro nakpara nga barangba gu boro nakpe mangeru ya, wo ko aza nga ngbako a ya.

³³Rago payasi pa ko i aida nga pa ruru sarangbanga fu ko te. Da ka yugu ngbatungako? Bambiko i adi ungako ti kpotosende.”

³⁴Banyaki ki karaga ha fu Firipo ki ya, “Mo gúmba ha fere, nebi nagumba gere tipa da? Watadu ko na kura boro, da du?”

³⁵Firipo ki tuka ngbako, ki tungusi pa Yesu fu ko ki tona ha ti kina gi Ziazia Kekeapai re.

³⁶Wa i andu gene i ki da ti ime; banyaki ki ya, “Mo bi, ime du re! Gine naza re ti bapatiza?” [

³⁷Firipo ki ya, “Ka mo idi paha na kpotoro yo dunduko, i idi he aida foro.” Ko ki karaga ha ki ya, “Miidiheya Yesu Kristo nga Wiri Mbori.”]

³⁸Ko ki ya i rugu ngbagida si ru zaa; i ki zorõ ku ime yo ue, aFiripo na banyaki, Firipo ki bapatizi ko.

³⁹Ho i akuru ni ime yo, Toro Gbia ki tuka Firipo ka banyaki abi nga ko berewe ya, bambiko ko andu gako nunguro na ngbarago.

⁴⁰Ono i abi Firipo Azoto yo; ko ki ta ndu nitungusi wene pangbanga rogo abaakporo dunduko, dati kina ho ko ada ni Kaisaria yo.