Read zande ARomo 1 Bible Online

ARomo 1 - zande bible

ARomo 1

¹Pauro, nga ga Yesu Kristo moyambu, i ayambu ko ko du ni mokedi, i akpara ko sa ga Mbori wene pangbanga,

²nga gu ko akido he tipa ha mbata rogo gako anebi yo rogo Ziazia Kekeapai yo,

³tipa Wiriko, ngbatunga Dawidi avungu ko ni borose

⁴i ava ti ko Wiri Mbori nga ko na tandu, wa Ziazia Toro agumba, mbiko zingabekpio; nga Yesu Kristo gaani Gbia.

⁵Mbori afu undahe tipa du ni mokedi fere rogo ko yo, mbiko rimo Yesu agu yo dagba arika aboro dunduko ki idi pako, ki nigi sangba a.

⁶I ayambu roni a dagba yo yo, oni du ni ga Yesu Kristo yo.

⁷Undahe dú fu roni na zereda yo du Mbori ni Barani na Gbia Yesu Kristo, fu agu roni dunduko du ni gako aboro.

⁸Mbata, mi natambua gi Mbori rogo Yesu Kristo yo tipa roni dunduko, bambiko i nagumba pa gaoni idapase zegino dunduko.

⁹Bambiko Mbori nga dezirere, ko mi namanga pa ko ni torore rogo gu wene pangbanga nga ga Wiriko, wa mi agumba pa roni kindi, rogo gi kpe yo

¹⁰mi nakpara waragoagira, si ngia rago da awere mi du zezeredi mbiko Mbori akpi nyemu he mi ye koyo du oni ni giza.

¹¹Bambiko nvemu bi roni namanga re, mi fu ga Ziazia Toro ũgume fu roni, sa du oni nyanyaki;

¹²nga, ani mongo wasa na oni dagba roni yo, ani ni ba sa sa be ga akuarani idapase, gaoni na gimi a.

¹³Awirinami, mi akpi nga nyemu oni du ni azanga inahe te, ya mi naaberã pa ye koyo du oni ni dedede pai ki nidika re adika mbata, mi bi zuzuhe ti roni a, a wa ti kura aGendiria.

¹⁴Mi nga ga aGiriki borobape na aboro kura ringara a, na airatatamana na airamungo a.

¹⁵Si du, mi asó gima tungusa wene pangbanga ti ni fu roni du Roma yo a, wa gu ka mi rengbe na ni.

¹⁶Bambiko zee amanga nga re na wene pangbanga te; bambiko si nga ga Mbori tandu sa bata fu agu yo dũ ka idi pase; fu aYudo mbata, fu aGiriki a.

¹⁷Bambiko rogo wene pangbanga Mbori ayugo waĩ ko nasa aboro ni ruru yo; si mbiko kina idapase, ti tonatona ha ki da ti digida ha: wa du he rogo Ziazia Kekeapai, ya, “Ono ruru boro ará mbiko idapase.”

¹⁸Bambiko ga Mbori zinga ni yuguyugu ne ngbangbaturũ yo sa gu zangasinombori na irairapai dũ nga ga agu aboro nagbingbida rengo ni irairapai

¹⁹bambiko gu pai yugu Mbori si ni yuguyugu he kpotoyo yo; bambiko Mbori ayugu he fu yo.

²⁰Bambiko gu gako apai ka i abi nga ya nga gako nyenye tanau na sino Mbori i nabi ne abi ziazia, tona kina ho rago aenge ni. I nabi he kina rogo agu ahe yo ko amangi; si du zanga ti birĩ ti ni ti yo te!

²¹Bambiko, wa i naini Mbori, i ataasa nga rimoko wa Mbori te, i atambua nga ko a te; ono i namanga kina ruka rogo gayo berã yo, mumungo kpotoyo yo ki du na bitimo.

²²I niya tipa tiyo tatamana aboro, i ki niye ka du ni kina mumungo aboro,

²³ki sa gu taarimo nga ga gu Mbori ka zirã nga ya fu kpia zirĩ boro, na ga azire, na agu anya du ndura ni ba biama, na agu agbiro nagbe tira agbe.

²⁴Si du Mbori ahe yo ti ni rogo nyemu ahe du kpotoyo yo sa birikobiriko pai, ya ka kpotoyo iri nga dagba yo yo ya:

²⁵bambiko i aunda ga Mbori rengo na zire, ki niirisi úzegino nimangi pa ha bakere ti Bafuahe, i nasambua ko nye anye kindi! Amina.

²⁶Si du Mbori ahe yo ti ni sa gbegberẽ dinga ngbaduse; bambiko gayo ade asa sinoyo ni gu pai dũ akia ti sino;

²⁷wa akumba a, nihe sino gu pai nga ga ade, ki nifoi afaa be gayo nyemuhe kuti akura yo, kina akumba naamanga pa wasiro na akumba, gu pai ki da kpotoyo yo rengbe na gayo ingapai nga mosoro ho.

²⁸Wa i aka berã pa Mbori, Mbori ahe yo sa gbegberẽ berã, ka manga agu apai aru nga ya;

²⁹i hi be irairapai, gbegberẽpai, kpihe, ngbaduse; hi be kpi boro, imo boro, papa, nangahe, sogote; i ki du ni agumbarimo,

³⁰wawaru, soga Mbori, basapase, rekangose, ruka, sanga gbegberẽpai, basa sangba avunguyo,

³¹zanga rugatinapai, gu auru ndika, sakparakpa, gberãringise:

³²i ini ga Mbori rugute, ya agu yo namanga agi apai re kina kpio re na yo, a nga kina yo namanga agi apai te re, ono i idi he fu agu yo namanga ha a.