Read zande ARomo 11 Bible Online

ARomo 11 - zande bible

ARomo 11

¹Ya mi tie, Mbori ba gako aboro ku sa yo? Wo te. Bambiko mi a tigimi nga Yisaraere, nga ngbatunga Abaravama, nga ngbatunga Benyamina.

²Mbori aba nga gu gako aboro ku sa yo ko aini yo mbata te. Oni aina nga gu pai Ziazia Kekeapai agumba tipa Eriya te? Wa ko agumba pai rogo kpe yo fu Mbori kuti aYisaraere ki ya,

³“Gbia, i imi gamo anebi, i gbarasi gamo abamotumo; kina mi du ni sa re, i ki nigbata ungare.”

⁴Ono gini pai Mbori akaraga fu ko? “Mi kpara agu akumba 7,000 fere akuka nga fu Bara ya.”

⁵Kina wo du agu yo zogoro awere a ku sangba gu siaboro yo nga ga undahe.

⁶Ono ka si du mbiko undahe, si du nga ni ga mangaapai berewe te; ka si adu nga wo ya, undahe adu nga ni undahe berewe te.

⁷Wãi tie? Gu pai aYisaraere agbata i adia nga ha te; kina siasia yo di he, yangara yo ki nyaki anyaka:

⁸wa du he ni keke he ya, “Mbori afu toro vukura fu yo, na bangirise ka i ngere nga ya, na tue ka i gi nga pai ya kina ku awere.”

⁹Dawidi ki ya. “Gayo mbisa dú ni nzingiri pai ni gbina, na ũkota na idabape fu yo;

¹⁰bangiriyo dú na bitimo ka i angera nga ya, mo núga ngongoyo kindi.”

¹¹Ya mi tie, i akoto ka ti? Wo te. Ono bata ye tu rika aboro mbiko tigoyo sa wi ngbayo i de ringo.

¹²Were ka ga zegino ũkumuko du mbiko tigoyo, ga aGendiria ũkumuko ki du mbiko payayo, ngbatika gayo maapai!

¹³Ono mi nagumoa ha fu agu roni nga aGendiria. Wa du mi ni ga aGendiria mokedi tie, mi nataasa gi mangaapai:

¹⁴si ya du wa ka mi wi ngba agu yo sa de ringo nga ngbatungare nga aYudo, mi wi ngba yo, ki batasi agu yo.

¹⁵Bambiko ka ba yo ku sa yo ngia zeresi zegino, dia yo ku gume du wãi, kina unga dagba akangba?

¹⁶Ka bambata zuzuhe du ziazia gu kina wo a, ka tarã ngua du ziazia abehe kina wo a.

¹⁷Ono ka bete abehe kuadi, wa du mo nga gu eraya nvuo, i azuneu ro azunga ku dagba ha, mo ki mongo du ti tarã gu ngua eraya nanze;

¹⁸ka mo mángi nga ruka fu abehe ya; ka mo amanga ruka, a nga mo nahusa tarãha te, kina tarãha nahusa ro.

¹⁹Mo ayá aya tie, “Abehe akuadi akuadi i zungu re kuti ni.”

²⁰Rengo du, bambiko zanga idapase i akuadi yo, mo ru mbiko ga idapase. Ka mo ende nga ya, kina gunde mo;

²¹mbiko ka Mbori ahe nga ngbatunga gu abehe re ya, ko ahe nga ro a te.

²²Mo neére nga ga Mbori veneringise na gberãringise tie, gberãringise fu agu yo natiwi, ono ga Mbori weneringise foro, ka ngia mo anye rogo gako weneringise; ka si adu nga wo ya i kati ro akata a.

²³Ii, ka i anyé nga na gayo zanga idapase a ya, i azúnga yo azunga ti ni, mbiko ka Mbori zungu yo azunga berewe.

²⁴Bambiko si ngia i akati ro ti gu ngua eraya du ti sinoho ni ga nvuo, ki zungu ro kuti gu wene ngua eraya akia ti sinoho; ngbatika wa ka i zungu yo kuti gayo ngua eraya wa du yo nga ngbatunga abehe?

²⁵Awirina, bambiko mi akpi nga nyemu oni du ni iramungo ti gi gbugbu pai te re, oni ka du ni airatatamana ni gaoni enda, nga zogoro nyaka ye fu aYisaraere da kina ho aGendiria ka sona ni wa i aringbisi he;

²⁶si aYisaraere ka bata ti ni dunduko, wa du he ni keke he ya, “Batasi ayé Siona yo, ko akpara zangasinombori dunduko ti Yakoba”;

²⁷“gi nga gi ndika fu yo re, ho mi ka dia gayo ingaapai ni ku sa yo.”

²⁸Tipa Wene Pangbanga i nga avura mbiko roni, ono tipa sia aboro, i nga nyemuse mbiko agu abaakumba nadu bakuru yo.

²⁹Bambiko Mbori asa nga berãko ti gako gagamaahe na yambahe te.

³⁰Wa oni akeretu fu Mbori mbata, awere oni di inapai ku gume mbiko gayo keretu,

³¹kina wo agi yo a nga aboro keretu awere, ya i di inapai ku gume awere a mbiko gu inapai yugu yo fu roni.

³²Bambiko Mbori kisi aboro akisa dũ sa keretu, ko ini pai aina fu aboro dunduko.

³³Ako gu dungura nga ga gu ũkumuko nga ga Mbori tatamana na inahe! Na gasi wisiga gako andika, na gasi rugatise na gako mangaapai! Ziazia Kekeapai naya,

³⁴“Bambiko da ini nga ga Gbia berã? Da nadu nga ni barugupai fu ko?”

³⁵“Da nafu he fu ko mbata, ko karaga kura he fu ni berewe?”

³⁶Bambiko ahe dunduko si aye kina be ko, mbiko ko, na fu ko. Taarimo dú fu ko nye anye kindi. Amina.