Read zande ARomo 13 Bible Online

ARomo 13 - zande bible

ARomo 13

¹Aboro rá ara dũ fu abaira tandu, bambiko tandu gbua te kina be Mbori; agu abaira tandu du ho kina Mbori namoi yo.

²Gu ni ka ka fu baira tandu, si du ka ni ka aka ti ni fu ga Mbori ndika. Agu yo naka, i adía sapangbanga adia kuti yo.

³Bambiko wene mangapai nagunde nga be azogo aboro te, ono kina gbegberẽ pai. Mo akpi nga nyemu gunde be baira tandu te? Mo nimangi kina gu pai ngba angba, kina ni ki tambua ro ti ni,

⁴bambiko ni nga ga Mbori moyambu sa wenepai foro. Ono ka mo mángi gu pai gberẽ agberã mo gunde agunde; bambiko ni avo nga basape gbua te; bambiko ni nga ga Mbori moyambu, nga bamangiboro ti pai sa zinga fu gu ni namanga gbegberẽpai.

⁵Si du ka oni ra ara ti ni, kina mbiko zinga sa te, mbiko sangba kpoto yo a.

⁶Bambiko mbiko gi pai re oni arú he ti ni a; bambiko i nga amoyambu ga Mbori sunge, i nimangi kina gi pai kindi re.

⁷Oni fu kina gu he fu yo dunduko du fu yo; rúhe fu gu ni du rúhe fu ni; ngbeti fu gu ni du ngbeti fu ni; gunde fu gu ni du gunde fu ni, irisa fu gu ni du irisa fu ni.

⁸Ka oni dú nga na ga boro bape wa sa ya, kina du mbisimo akuaroni ti roni: bambiko gu ni du mbisimo akurani ti ni ni digisi rugute.

⁹Bambiko gere, “Ka mo rá nga na dia boro ya, Ka mo imi nga boro ya, Ka mo dí nga he ya, Ka mo kpi nga he ya,” ka kura rugute du ho, i gbia ha kina ku rogo gi pai re nga, “Mbisimo akuaro dú ti ro a wa du gamo.”

¹⁰Nyemuse amanga nga gbegberẽpai fu kurani te; si du digisi nyemuse rugute ti ni.

¹¹Were, wa ini oni ragoho, ya ragoho da awere oni zingi rame yo; bambiko gaani bata mbembedi awere susi ho ani aidi pase ni mbata.

¹²Yuru nanyasa, rago nagira; ani uru gu mangaapai nga ga bitimo ki ukadi úvura imarago.

¹³Ani nitá ata nzunzu wa i nata uru, ni gbarakagbaraka na kpibuda te, ni nyemuhe na bau te, ni papa na ni ringo te.

¹⁴Ono oni úkadi Gbia Yesu Kristo, ka oni ígi nga he fu borose ka zeresa gaha nyemuhe ya.