Read zande ARomo 14 Bible Online

ARomo 14 - zande bible

ARomo 14

¹Ono gu ni rungbura arungbura rogo idapase oni dí ni adia ku gume, ono ka pe pai kuti sakapai te.

²Gu boro ho ni ki du na idapase ka ri ahe ari dunduko, ono gu ni rungbura arungbura ni niri kina akpe pasio.

³Gu ni nari he, ka ni páyasi nga gu ni zanga ri he ya, gu ni ari nga ha ya, ka ni sápu nga ngbanga gu ni nari he ya: bambiko Mbori di ni ku gume.

⁴Da nga mo nasana ngbanga ga kura boro moyambu? Ni nita ru fu kina gani gbia niti. Ii, i arugusa ni arugusa; bambiko tandu ti Gbia sa rugusa ni.

⁵Gu boro ho ni ki niberẽ kina pa gu uru susi kura ha, gu ni ho ni ki niberẽ pa uru aberã dunduko sa. Aboro dunduko i rugu tiyo aruga na payo rogo gayo berã yo.

⁶Gu ni naberã pa gu uru, ni naberã paha fu Gbia. Gu ni nari he ni nari he fu Gbia, bambiko ni natambua Mbori atambua; gu ni ari nga ha ya ni ari nga ha te fu Gbia, ni natambua Mbori atambua

⁷Bambiko boro ni ungani fu kina ni wa sa te, a nga boro sa ka kpi fu kina tini te.

⁸Bambiko wa du ani ni ungarani, ani ni ungarani fu Gbia; wa ani nikpi, ani nikpi fu kina Gbia; watadu ani ni ungarani tie na ni kurugborani ani ni ga Gbia rani.

⁹Bambiko Kristo akpi ki du ni ungako berewe sa gi pai re, nga ko du ni ga kangba aboro Gbia na unga aboro.

¹⁰Ono mo, tipagine mo asapa ngbanga wirinamo ti ni? Kina ro berewe, tipagine mo apayasi wirinamo ti ni? Bambiko ani amongo ru aru barangba ga Mbori mbata sapangbanga dunduko.

¹¹Bambiko si ni keke he ya, “Wa du mi ni ungare, Gbia nipoi wo, arukusue akúka akuka fere du, mirãse akúsa pai akusa fu Mbori du.”

¹²Si du ani aríngbisa pa tirani aringbisa ti ni fu Mbori ni ba sa sa.

¹³Si du ka ani asapa nga ngbanga akuarani ti ni berewe ya, kina gi ka oni sapu ngbanga ha re nga, a nga boro sa ka moi úkota gene wirinani, na ũtigo te.

¹⁴Mi ini aina ki rugu tire na ni rogo Gbia Yesu yo ya, a nga he sa du ni birikobiriko ho ni tihe te: si wo fu kina gu ni naberã pa ha ya si ni birikobiriko ho, ni du he fu ni ni birikobiriko ho.

¹⁵Bambiko ka wirinamo arungo mbiko ga riahe, si wa mo ata nga rogo nyemuse te. Ka mo gbárasi nga gu ni Kristo akpi tipa ni ni ga riahe ya.

¹⁶Ka i gúmba nga gbegberẽpai tie kuti ga wenepai ya.

¹⁷Bambiko ga Mbori ngbi nga ri he na mbira he te, kina rurupai na zereda na ngbarago rogo Ziazia Toro yo.

¹⁸Bambiko gu ni ka manga pa Kristo ni agi apai re, ni ngba angba ti Mbori, aboro ki tambua ni.

¹⁹Si du ka ani peke kina agu apai ti ni namanga sa zereda, na agu apai ka ani sonosi akuarani na ni.

²⁰Ka mo gbárasi nga ga Mbori sunge mbiko riahe ya. Ahe ni kina gigiri he ni rengo dú; si ni gbegberẽpai fu kina gu boro nari he ni nzingiripai.

²¹Ngba nga ri pasio, nambira imekakue, na manga gu pai ka wirinamo koto be he wa sa te.

²²Gu pai idi mo pa ha tigamo, si kina dagba ro na Mbori. Betedi boro nga gu ni asapa nga ngbanga tini ni agu apai ni aida na ni ya.

²³Ono gu ni nasaka pa ha asaka, ka ni ri he i kiti ngbanga ni akita bambiko ni ari nga ha ni idapase te; gu pai adu nga ni idapase ya, ingapai nga ha.