Read zande ARomo 15 Bible Online

ARomo 15 - zande bible

ARomo 15

¹Were, agu rani du nyanyaki ani ka hi gu mumungo pai ahi nga ga rurungbura aboro, ka ani amanga nga gu pai ngba ti kina rani ya.

²Ani mongo nimangi gu pai ngba angba ti akuarani sa wenepai, sa pa nyakasa he.

³Bambiko Kristo a, ko amanga nga gu pai ngba ti kina ko te; ono, wa du he ni keke ne ya, “Gu gayo gbarasarimo i agbarasa rimoro na ni si ati ku rire.”

⁴Bambiko agu apai i ake mbata rogo Ziazia Kekeapai i ake he tipa gaani wirikapai, ani moi bangirani mbiko gu zera nga ga kekeapai na wasa.

⁵Were gu Mbori nga ga zera ko na wasa, ko idi ya oni mongo du adu na akuaroni ti oerã sa ku sangba Kristo Yesu yo.

⁶Oni táasi rimo gu Mbori nga ga Gbia Yesu Kristo ko nga Bako kina ku bani sa ni ngbaroni.

⁷Si ka oni di akuaroni ti ni ku gume wa di Kristo roni a ku gume, sa ga Mbori taarimo.

⁸Bambiko ya mi Kristo adu ni ga aYudo moyambu sa ga Mbori rengo, ko nyakasi agu akidohe, ko akido ho fu aba,

⁹aGendiria taasi Mbori tipa gako inapai; wa du he ni keke he ya, “Si du mi afú atambuahe foro dagba aGendiria yo, ki bi bia fu rimoro”;

¹⁰ko ki ya berewe, “Oni nga aGendiria rago ngba angba ti roni na gako aboro”;

¹¹berewe, “Oni nga aGendiria dunduko oni támbua Mbori, aboro támbua ko atambua dunduko”;

¹²Yesaya aya berewe, “Tarã Yisai adú adu, gu ko nakura ka zoga aGendiria; ko aGendiria ka maa bangiriyo tipa ko.”

¹³Were gu Mbori nga ga maabangirise ko ko hisi roni na ngbarago na zereda rogo idapase yo, gaoni maabangirise moi pai, mbiko tandu Ziazia Toro.

¹⁴Awirinami, mi rugu tire na paroni ni tire a, ya oni hiki tigaoni be wene apai, ki hiki be inahe dũ, rengbe na yugo pai ayugo a fu akuaroni.

¹⁵Ono mi ke agu apai fu roni zukazuka dagba ha, si sa roni sa tingida pai oerewe, bambiko gu undahe fu Mbori fere,

¹⁶mi du ni ga Kristo Yesu moyambu fu aGendiria nimangi ga Mbori Wene Pangbanga, aGendiria ki ye ka du ni wene ũmotumo wa du yo ni ziazia yo be Ziazia Toro.

¹⁷Si du mi asambua tire ti ni rogo Kristo Yesu yo tipa agu apai du fu kina Mbori.

¹⁸Bambiko mi aerã nga ka gumba pa pai wa sa te, kina gu Kristo amangi rogo re yo, sa ga aGendiria giasangba, be gumba pai na mangapai,

¹⁹rogo tandu agu apai yo i aina pai ti ni na iiriwo apai ni tandu Ziazia Toro; si du tungusi mi ga Kristo Wene Pangbanga ti ni sirisiri Yerusarema yo, na kirikiri ku Iruriko yo.

²⁰Ii, gu pai dũ bangire gbe nga tungusa Wene Pangbanga ho ini yo yamba rimo Kristo ni te, ka mi adua nga pai ri ga kura boro mburupai ya;

²¹ono kina wa du he ni keke he ya, “Agu yo i ata ye nga na pangbanga tipa ko fu yo ya, i abí he abi, na agu yo agia nga ha ya i arúga tiyo aruga na ni.”

²²Bambiko gere i adingisa re ti ni dedede a ti ye koyo du oni ni.

²³Awere a nga kura rago ho tipa re rogo agi arago te re, mi ki nikpi nyemu ye koyo du oni ni ti gi dungu agarã re.

²⁴Ono ho ka mi ndu ni ku Sepania yo bambiko mi namaa bangire ti bi roni ti gi nunguro, ani ki ndu na oni ku mbata yo, mi zeresi ngbadure na oni mbata.

²⁵Ono awere ya mi, mi nandu ku Yerusarema yo na aũ undahe fu ga Mbori aboro.

²⁶Bambiko rago angba anaba ti aboro Makedonia na aboro Akaya ka keda gamahe fu gu rungorungo aboro du dagba ga Mbori aboro Yerusarema yo.

²⁷Ii, si angba angba ti yo, ono ni rengo, i nga gayo aboro bape. Bambiko ka aGendiria adu wa sa na yo rogo gu maku nga ga toro, i nga gayo aboro bape a sa manga pai fu yo ni pa borose.

²⁸Ho mi ka manga gi pai ni re, ki du ni dezire gi zuzuhe re, mi andú yo du oni ni ku Sepania yo.

²⁹Mi ini aina ya ho mi ka ye ni koyo du oni ni, mi aye na gu maapai nga ga gu maku nga ga Kristo.

³⁰Were mi nakpara fu roni, awirina, mbiko Gbia Yesu Kristo, na mbiko gu nyemuse nga ga Toro, ani mongo nike na kpara fu Mbori na oni tipa re rogo gaoni kpe yo;

³¹i batasi re be agu yo nga azanga idapase Yuda yo, gu gi aú undahe du be re tipa Yerusarema, si ngba angba ti ga Mbori aboro.

³²Mi ye koyo du oni ni na ngbarago mbiko ga Mbori nyemu he, ani mongo ongodi na oni.

³³Were, Mbori nga ga zereda ko ko dú na oni dunduko. Amina,