Read zande ARomo 16 Bible Online

ARomo 16 - zande bible

ARomo 16

¹Mi yugu Foibefuroni ngadawirani, du ni moyambu gu kanisa du Kenukurea yo,

²oni dí ri ku gume rogo Gbia, re are ni ga Mbori aboro, oni únda ri aunda na pa gu pai ka zingo ho amanga ri yo du oni ni, bambiko ri adu tigari ni mounda fu dungu aboro, ki du fere a tigimi.

³Oni sánango aPuriseka na Akuira nga gimi abadiasunge rogo Kristo Yesu,

⁴i nafu gorõyo tipa ungare; kina re natambua yo sa te, akanisa dagba aGendiria a dunduko.

⁵Oni ki sánango gu kanisa du rogo gayo kporo. Oni sánango Epaineto badiangbare, ko nga bambata zuzuhe Asia yo fu Kristo.

⁶Oni sánango Maria, ri nambu na sunge tipa roni.

⁷Oni sánango aAnduroniko na Yunia, nga agumere, nga gimi abadiakisa, nga abaworimo dagba amokedi yo, i nadu rogo Kristo yo mbata fere.

⁸Oni sánango Ampuriato nga badiangbare rogo Kristo yo.

⁹Oni sánango aUrubano nga gaani badiasunge rogo Kristo yo, na Setakusa nga badiangbare.

¹⁰Oni sánango Apere rugu yo tise na pa ko rogo Kristo. Oni sánango agu yo du ku Arisitoburu yo.

¹¹Oni sánango Erodiona nga gumere. Oni sánango agu yo du ku Narukiso yo, du rogo Gbia yo.

¹²Oni sánango aTurufaina na Turufosa, i namanga sunge rogo Gbia. Oni sánango Perusi nga badiangba, ri namangi sunge gbe rogo Gbia.

¹³Oni sánango aRufu nga siasia boro rogo Gbia na nako nga nina.

¹⁴Oni sánango aAsunukurito, Feregono, Erume, Pateroba, Eruma, na agu awirina du na yo.

¹⁵Oni sánango aFirorogo na Yuria, aNereu na dawiriko, na Orumba, na ga Mbori aboro du na yo dunduko.

¹⁶Oni sánango akuaroni ni ziazia dungoti. Ga Kristo akanisa sanango roni asana dunduko.

¹⁷Were, awirina, mi nakpara fu roni oni bí agu yo abi du kparaka dagba roni na nzingiri kota mbiko yo, akia ti gu yugopai oni awiriki; oni kpára ti yo.

¹⁸Bambiko ngbatunga agu yo amanga nga pa gaani Gbia Kristo ya, kina vuyo yo; i nasa kpoto mumungo aboro yo ni zomia he na abia he.

¹⁹Bambiko gaoni giasangba merẽ ngba aboro dunduko. Si du rago angba angba ti re ti ni tipa roni; ono mi nakpi nyemu oni du ni airatatamana sa gu pai ngba angba, ki au ni airamungo sa gu pai gberẽ agberã.

²⁰Gu Mbori nga ga zereda ko ko nikasi Satana asi ku tu nduroni yo mbembedi Gu undahe nga ga gaani Gbia Yesu Kristo si du na oni.

²¹ATimoteo nga gi badiasunge ko sanango roni, na Rukio a Yasona na Sosipaturo, nga agumere.

²²Mi nga Terutio, nake gi kedikedi pai re, mi sanango roni rogo Gbia.

²³Gayo nga mangipare, na pa kanisa dũ a, ko sanango roni. Eraseto nga babandaamarã bakporo yo, ko sanango roni, na Kuaruto nga wirina. [

²⁴Gu undahe nga ga gaani Gbia Yesu Kristo si du na oni dunduko. Amina.]

²⁵Were fu gu ko ka nyakasi roni, ku sangba gi wene pangbanga yo na tungusa pa Yesu Kristo, ku sangba yugo gu gbugbu pai yo i aoko ho tipa gbanga rago,

²⁶ono awere si ni yuguyugu he, rikaaboro ini he aina dunduko be gu Ziazia Kekeapai nga ga anebi, ku sangba gu rugute yo nga ga nyenye Mbori, sa giasangba idapase;

²⁷taarimo du fu kina bangisa tatamana Mbori, mbiko Yesu Kristo, nye anye kindi. Amina.