Read zande ARomo 3 Bible Online

ARomo 3 - zande bible

ARomo 3

¹Gini pai susi Yudo ti ni tie? gini pai dũ nga a ti yeratise?

²Gagutie: mbata ha nga, i aasia pa sangba Mbori fu yo.

³Bambiko ka agu yo ti ku sa yo ti idapase si du wãi? gayo ti ku sa yo ti idapase si gbarasi pa gu weneringise nga ga Mbori?

⁴Wa sa te. Ii, kina Mbori du ni irarengo, aboro du ni kina airazire; wa du he ni keke he, “Ya ga pai adu ni ruru he ho mo agumba pai ni, mo ki di be pai ho mo ka ye ni sa sapangbanga.”

⁵Ono ka gaani irairaapai atambua ga Mbori rurupai, ani ya wãi? Mbori du na irairapai naye ni zinga? (Mi nagumba ha tigu wa boro.)

⁶Wa sa te. Bambiko Mbori awira pa sapa ngbanga zegino wãi tie?

⁷Bambiko ka ga Mbori rengo akiisi gako taarimo be gi zire, tipagine sapu yo ngbanga re ti ni a ni boro ingapai?

⁸Tipagine si adu nga wo ya wa i ape he ni zire, agu yo ki ya ani nagumba ha ya. Ani mangi gbegberẽpai, wenepai ye? Gayo kuangbanga ru aru.

⁹Wai tie? Ani nga aYudo ani ngba susi yo? Oó, wa sa te: bambiko ani nikua ngbanga a Yudo na aGiriki a mbata, ya i du tii gbegberẽpai;

¹⁰wa du he ni keke he, ya, “A nga boro sa du ni ruru ni te, oó, wa sa te

¹¹a nga boro sa naruga tini na pai te, a nga boro sa nagbata Mbori te.

¹²I karaga tiyo ku sa yo dú, i mongo mungo; a nga boro sa namanga wenepai te, oó, wa kina sa te.”

¹³“Gorõyo du wa gbagaza murã; i nangi he na mirãyo.” “Gu kere sure nga ga kere wo si du tii kpotongbayo yo.”

¹⁴“Ngbayo ahi be tiwa he na wingba.”

¹⁵“Nduyo gbidi ka uka kure,

¹⁶gbarasa he na rungo du ngba gayo agene,

¹⁷i aina nga gene zereda te.”

¹⁸“Gunde ti Mbori si bangiriyo te.”

¹⁹Were ani ini ya agu apai rugute agumba, si nagumba ha fu agu yo du tii rugute; ngba ongo aonga dũ, i ye na aboro zegino dú ku tii ga Mbori sapangbanga:

²⁰bambiko a nga boro sa i adia pai ri ni bangiriko mbiko manga rugute te; bambiko ina gbegberẽpai naye rogo rugute yo.

²¹Ono awere Mbori nayugo waĩ ko nasa aboro i du bangiriko ni ruru yo kpara ti rugute, adezirehe nga rugute na anebi.

²²Mbori nasa aboro ni ruru yo mbiko ida yo pa Yesu Kristo. Si du kina wo fu agu yo du naida pa ko; bambiko aboro akpara nga te.

²³Bambiko aboro aingi ainga dũ, ki ti bungudu ti ga Mbori taarimo;

²⁴i di pai ri yo gbua mbiko gako undahe rogo gu tumori yo du rogo Kristo Yesu yo.

²⁵Ko, Mbori amoi ko ko du ni motumo ga aboro ingaapai, wa i naida pa kureko. Rogo gere. Mbori ayugu waĩ ko nasa aboro ni ruru yo, wa ko ambu gu gbegberẽpai i anamanga mbata mbiko gako hipai.

²⁶Si nayugo ho wa du rago re ya Mbori tigako du ni ruru ko, ko nadia pai ri agu yo idi pa Yesu.

²⁷Wari du enda ni tie? Si ho te. Mbiko ngbatunga gini rugute? Mbiko mangaapai? Oó; kina mbiko gu rugute nga ga idapase.

²⁸Si du ya ani ti ni i nidi pai ri boro mbiko idapase kpara ti manga rugute.

²⁹Mbori nga kina ga aYudo Mbori sa? nga ga aGendiria Mbori nga ko a te? Ii, ga aGendiria ko du a!

³⁰Ka si du wa Mbori du sa, ko adía pai ri aYudo mbiko idapase, ki di pai ri aGendiria rogo idapase.

³¹Ani sa rugute tie ni kungba he rogo idapase yo? Wa sa te! Oó, ani nanyakasa rugute anyakasa.