Read zande ARomo 5 Bible Online

ARomo 5 - zande bible

ARomo 5

¹Wa di yo pai ri rani mbiko idapase tie, ani zezeredi na Mbori rogo gaani Gbia Yesu Kristo yo.

²Ko ye ani rogo ko yo a kono du gi undahe ni, ru ani ni re; rago ngba angba ti rani namaa bangirise ti ga Mbori taarimo.

³Kina wo sa te, rago ngba ti rani a na gaani rungosi; ani ini ya rungosi namaa hipai;

⁴hipai namaa inahe; inahe namaa maabangirise;

⁵maabangirise afu nga rani sa zee te; bambiko ga Mbori nyemuse i niuka ku kpotorani yo be gu Ziazia Toro fu ko ko fu rani.

⁶Bambiko ho ani anyaka nga ni ya, Kristo akpi ragoho tipa azangasinombori.

⁷Bambiko kpakara pai nga ha boro kpi tipa ruru boro, ono isoke gu ni nibasa apai abasa ka kpi tipa wene boro.

⁸Mbori amoi dezire gako nyemuse fu rani nikpi Kristo tipa rani wa ani adu ni aboro ingapai.

⁹Gu susi asusa tie, si nga wa i nadi pai ri rani mbiko kureko, ani abáta abata be ga Mbori era mbiko ko.

¹⁰Bambiko ho ka ani adu ni ni avura, ka ani azeredi na Mbori mbiko kpio Wiriko, gu susi, si nga, wa ani nazeredi ani abáta abata mbiko ungako;

¹¹kina wo sa te, rago nangba ti rani a tipa Mbori mbiko gaani Gbia Yesu Kristo, ko di ani zeresapai awere mbiko ko.

¹²Were, wa gbegberẽpai akuru ku zegino mbiko boro sa, kpio ki du mbiko gbegberẽpai; si du kpio andu andu ti ni sa aboro du, bambiko i aingi ainga dũ.

¹³Bambiko ingapai aima du zegino mbata rugute nikaye, ono i ageda nga ingapai fu rani ho rugute adu nga ni ya te.

¹⁴Pai ti ni te, kpio atona kindo ti kina Adama dati Mose, zavura ri agu yo ainga nga pai wa ga Adama tindika ya, ko du ni kpia gu ko naye ka ye.

¹⁵Ono gamunihe a wa tindika te. Bambiko ka dungu aboro akpiki mbiko ga gu boro tindika sa ga Mbori undahe na gu gamunihe du mbiko ga gu boro undahe sa, nga Yesu Kristo, amoi pai susi fu dungu aboro.

¹⁶Ga Mbori gamunihe wa gu pai nadu mbiko gu ni naingi sa te; bambiko sapangbanga aye mbiko gu boro sa sa kitangbangase, ono gamunihe aye mbiko dungu tiandika sa diapairi.

¹⁷Bambiko ka kpio akindo mbiko gu boro sa, mbiko ga gu boro tindika sa, gu susi asusa nga, wa ka agu yo nadia ba undahe ku gume na gu gamunihe nga rurupai ki kindo na unga mbiko gu boro sa nga Yesu Kristo.

¹⁸Were, wa sapangbanga aye tie fu aboro d sa gbarasangbangase mbiko gu tindika sa; kina wo gamunihe aye fu aboro dũ sa gu diapairi nga ga unga mbiko manga rurupai sa.

¹⁹Bambiko wa i amoi dungu aboro ni aboro ingapai mbiko ga gu boro basapai sa, kina wo i ka maa dungu aboro ni ruru aboro bangiri Mbori mbiko ga gu boro giasangba sa.

²⁰Rugute ave a, tindika moi pai, ono ho ingapai nimoi pai ni, undahe nimoi pai amaa ki susi;

²¹ya wa ingapai akindo ni kpio, ga Mbori undahe kindo a wo rogo rurupai yo sa nyenye unga mbiko Yesu Kristo gaani Gbia.