Read zande ARomo 8 Bible Online

ARomo 8 - zande bible

ARomo 8

¹Si du adu nga kitangbanga ti ni awere fu agu yo du rogo Kristo Yesu yo ya.

²Bambiko gu rugute nga ga Toro nga ga unga rogo Kristo Yesu yo kusi re be gu rugute nga ga ingapai na kpio.

³Bambiko gu pai ka rugute amanga nga ya wa si nanyaka nga mbiko borose ya, Mbori akedi Wiriko wa kina borose nga ga ingapai ni motumo tipa ingapai, ko akiti ngbanga ingapai akita rogo borose yo:

⁴sangba rugute du kpotorani yo, agu rani andu nga sangba borose yo ya, kina sangba Ziazia Toro yo.

⁵Bambiko agu yo du sangba borose yo i naberã agu apai nga ga borose, ono agu yo du sangba Toro yo i naberã agu apai nga ga Ziazia Toro.

⁶Bambiko gu berã nga ga borose si nga kpio, ono gu berã nga ga Toro si nga unga na zereda:

⁷bambiko gu berã nga ga borose si nga vura Mbori; bambiko si nangbe nga na ga Mbori rugute te, ka si du nga wo a te.

⁸Agu yo du ni borose ka gayo pai ngba nga ti Mbori te.

⁹Ono oni adu nga ni borose ya, du ni kina Toro, ka si du wa ga Mbori Toro nye rogo roni yo. Ono ka boro adu nga na ga Kristo Toro ya, gako ni nga ni te.

¹⁰Ka Kristo du rogo roni yo, boroboro kpi mbiko ingapai, Toro du ni ungako rogo roni yo, mbiko Mbori sa roni ni ruru aboro.

¹¹Ka ga Mbori Toro nazingisi Yesu dagba akangba nye rogo roni yo, si ngia gu ko nazingisi Kristo Yesu dagba akangba ko aungasi bororoni mbiko gu gako Toro nye rogo roni yo.

¹²Si du, awirina, du ani ti ni ni aboro bape be borose ka amanga sangba borose te.

¹³Bambiko ka oni amánga sangba borose oni akpí akpi; ono ka oni imi ga boroboro apai be Toro oni adú adu ni ungaroni.

¹⁴Bambiko agu yo ga Mbori Toro angbe fu yo mbata yo, agi yo nga awiri Mbori re.

¹⁵Bambiko oni adia nga gu Toro ku gume nga ga akanga ko berewe sa gunde te; oni di kina gu Toro ku gume nga ga mbutiawirinyaure ko, ani nakpara mbiko ko ki ya “Aba! Buba!”

¹⁶Toro nga dezire ni tiko na tororani ya awiri Mbori nga ani.

¹⁷Ka ani du ni awiriko, ani du adu ni adikumbo, ni ga Mbori adikumbo, ki gbia tirani ni adikumbo na Kristo; ka si du wa ani nahi pai na ko ani amongo du ni taasitaasi rani a na ko.

¹⁸Bambiko mi gedi gu hika apai du wa du rago re ka si are nga na ringbisa ha na gu taarimo i ka yugo ho ti rani ya.

¹⁹Bambiko uzegino nangera kakaka nisungudi yugo awiri Mbori.

²⁰Bambiko ũzegino adu tii kungba pai, si akpi nga nyemu he te, kina mbiko gu ko nafu he ku tii he,

²¹nimoi bangirise ya i batasi uzegino tigaha a be du ni ga zirã kanga sa kura gu taarimo nga ga awiri Mbori.

²²Bambiko ani ini aina ya úzegino dũ mongo niukaga omehe nimbu be ima kina ku awere.

²³Kina wo sa te, ani a tigaani nga agu rani du na gu bambata zuzuhe nga ga Ziazia Toro, i bi nga kina rani naukaga ome ku kpotorani yo, nisungudi rago dia rani ku kporo yo, nga tumo ri bororani.

²⁴Bambiko i abatasi rani mbiko maabangirise; ono gu maabangirise i abi abi nga maabangirise te, bambiko da ka moi bangirini sa gu pai ni abi abi?

²⁵Ono ka ani moi bangirani sa gu pai ani abi nga ya, ani sungudi he tie ni zera.

²⁶Kina wo Ziazia Toro aunda rani narungbura, ani aina nga wãi ka ani akpara te; ono kina Ziazia Toro ni tiko nakpara tipa rani niukaga ome nga gu ka i agumba nga ha agumba ya.

²⁷Gu ko nawisiga kpoto yo ko ini ga Toro berã, bambiko ko nakpara tipa ga Mbori aboro ku sangba berã Mbori yo.

²⁸Ani ini aina ya apai mongo nimangi dũ sa wene pai fu agu yo nakpi nyemu Mbori, fu kina agu yo i ayambu yo ku sangba berã Mbori yo.

²⁹Bambiko agu yo ko aini yo mbata, ko aima ringbisa yo, i wiri kpia Wiriko, ko du ni bambata vungu dagba dungu awirina.

³⁰Agu yo a ko aima ringbisa yo, i ko ayambu yo a, agu yo ko ayambu yo, i ko adi pai ri yo: agu yo ko adi pai ri yo, i ko ataasi yo a.

³¹Ani aya wãi tie ti agi apai re? Ka Mbori du fu rani, da ka du kuti rani?

³²Gu ko nahe Wiriko ki fu ko afu tipa rani dũ, wãi ko ka fu nga ahe ti ni fu rani dunduko na ko gbua ya?

³³Da ka kiti ngbanga ga Mbori siasia aboro? Mbori du nadia pai ri yo;

³⁴da nga ni ka kati ngbangase ku ri yo? Kristo Yesu du nakpi, i azingisi ko a dagba akangba, ko du pati kumbabe Mbori, ko nakpara a tipa rani.

³⁵Da ka kpara rani ti ga Kristo nyemuse? Rungo, nunga, rungosi, gberãngbi, du kundiri, du ngbapai, na basape?

³⁶Wa du he ni keke he ya, “I aniimi rani aimo pitipiti mbiko ro; i nagedi rani wa akandoro tipa imo ra.”

³⁷Ono ani nadia adia be agi apai dũ re susi mbiko gu ko nakpi nyemu rani.

³⁸Mi ini aina ni rengo ya kpio, na unga, na amaraika, na angbi, na agu apai du awere, na agu apai nikaye, na atandu,

³⁹na ari yo, na dudungura rago, na kura ũzegino, ka si kpara nga rani ti ga Mbori nyemuse du rogo Kristo Yesu yo nga gaani Gbia te.