Read zande ARomo 9 Bible Online

ARomo 9 - zande bible

ARomo 9

¹Rengo mi agumba rogo Kristo, zire mi agumba te, sangba kpotore yo nga dezirehe rogo Ziazia Toro,

²ya nunga ti re bakere na ima du kindi kpotore yo.

³Bambiko ka mi kpi nyemu gu pai akpi ni tire nga tiwa re ti Kristo mbiko awirinami, nga ngbatungare ku rogo pa borose yo.

⁴I nga Yisaraere; i du gayo pai nga mbuti, na taarimo, na andika, na fu rugute, na manga pa Mbori, na kidohe;

⁵i nga atita agu abaakumba nadu bakuru yo, i du Kristo ni gayo ku rogo pa borose yo, du ku ri ahe dunduko, i sambua ko nye anye kindi. Amina.

⁶Ono a nga si wa ga Mbori pai ti gbua te. Bambiko agu yo nga awiri aYisaraere, i nga aYisaraere dunduko te;

⁷mbiko wa du yo ni ngbatunga Abarayama a, i nga awiri dunduko te, ono, “I ayámba rimo ngbatungaro ti kina Yisaka.”

⁸Si wa ka i ya awiri borose nga awiri Mbori te, kina awiri kidohe, i ageda yo ni ngbatunga.

⁹Bambiko ga kidohe pai nga gere nga, “Mi ayé a rago du wa gere, Sara ki du na kumbagude.”

¹⁰Kina wo sa te, Rebeka adú na mobara a be kina gu boro sa, nga barani Yisaka―

¹¹bambiko i avunga nga agude ho te, ka i ata manga nga wenepai na gbegberẽ he a ya, ga Mbori pai ru ku sangba siaboro yo, ni ga mangaapai te, kina mbiko gu ko nayambu yo,

¹²i aya fu ri wẽ, “Unvuru ará ara fu tame.”

¹³A wa du he ni keke he ya, “Yakoba mi aKpi nyemu ko, Esau mi asogo ko.”

¹⁴Ani aya wãi tie? Irairapai ti Mbori? Wo te.

¹⁵Bambiko ko aya fu Mose, “Mi aína pai fu kina gu ni du wa mi aina pai fu ni, ki ini pai ni nunga fu kina gu ni du wa mi aina pai fu ni ni nunga.”

¹⁶Si du tie adu nga ha ti ni be gu ni nakpi nvemu he, na gu ni naora ya, kina be Mbori naina pai.

¹⁷Bambiko Ziazia Kekeapai aya fu Faro, “Mi akiisi pa ro tipa kina gi pai re nga, mi yugu gi tandu ti ro, i taasi rimore rogo kpotosende dunduko.”

¹⁸Si du ini ko pai ti ni fu gu ni ko akpi nyemu ina pai fu ni, gu ni ko akpi nyemu nyakasa ni, ko nanyakasa ni.

¹⁹Mo ayá fere tie, “Tipagine bi ko irairapai ti ni? Bambiko da ka zuna tini be gu pai ko akpi nyemu he?”

²⁰Ai, ako boro, da nga mo ka karaga pai fu Mbori? Kpiahe aya fu gu ni namangi he, “Tipagine mangi mo re ti ni were?”

²¹A nga pa pere be Kina bamepere te, ni nita meka bete he, kina gu peie sa, nime gu sa irisa, nime gu adu nga sa irisa ya?

²²Gine tie wa ka Mbori kpi nyemu yugo gako zinga ki ya i ini gako tandu, ka ko vura hipai ni gbanga ha fu gu he du fu zinga i amangi he sa gbarasa ha;

²³ko ya i ini gu ũkumuko nga ga gako taarimo ku ri gu he du fu inapai ko aima mbakada sa taarimo,

²⁴kina rani, nga agu rani ko ayambu rani a kina dagba aYudo yo sa te, dagba aGendiria yo a?

²⁵Wa ko agumba na rogo Osea yo ya, “Mi ayámba agu yo ni ‘gimi aboro’ naadu nga ni gimi aboro ya, ki ya ti gu ri ‘manguse,’ naadu nga ni manguse ya.

²⁶Gu pai adú adu, nga rogo gu rago i aniya ti yo ni, ‘Gimi aboro nga oni te,’ i ayá aya ti yo ho ‘awiri unga Mbori nga yo’.”

²⁷Yesaya apoi ku ari tipa aYisaraere ya, “Ka awiri aYisaraere vura nge ange wa kina ngume baime i abátasa kina yangara yo gbua;

²⁸bambiko Gbia amánga gako pai ri kpotosende, ki nyasi he, ki ipisi he aipisa.”

²⁹Yesaya agumba ha mbata ya, “Kina Gbia Rimbasa nambu tungarani ni umba rani, ka ani adu wa Sodoma i ki mangi rani wa kina Amora.”

³⁰Ani aya waĩ tie? Ya aGendiria nagbata nga pa sa tiyo ni ruru aboro bangiri Mbori te, Mbori asa yo ni ruru yo mbiko idapase.

³¹Ono wa aYisaraere agbata gu rugute nafu rurupai i ada nga ti gu rugute te re

³²Tipagine du? Bambiko i agbata nga na ni idapase te, ni kina mangaapai. I akoto ti mbia kota;

³³wa du he ni Keke he ya, “Mo ngére, mi namaa wiri mbia kota na mbia nzingirĩ pai Siona yo, Gu ni ka idi pa ko zee amánga nga ni te.”