Read zande 1 AKorindo 1 Bible Online

1 AKorindo 1 - zande bible

1 AKorindo 1

¹Pauro, i ayambu ko ko du ni ga Yesu Kristo mokedi mbiko Mbori akpi nyemu he wo, na Sosetene wirinarani,

²Fu gu ga Mbori kanisa du Korinda yo, nga agu yo i asa yo ni ziazia yo rogo Kristo Yesu yo, i ayambu yo i du ni ga Mbori aboro, na agu yo dunduko nakpara ni rimo gaani Gbia Yesu Kristo rogo arago dũ, nga gayo Gbia na gaani:

³Undahe dú fu roni na zereda be Mbori Barani na Gbia Yesu Kristo.

⁴Mi natambua gi Mbori dedede tipa roni, mbiko gu ga Mbori undahe i afu fu roni rogo Kristo Yesu yo;

⁵bambiko i akumukosi roni rogo ko yo ni apai dunduko, ni gumbapai na inahe dũ;

⁶a wa i anyakasi ga Kristo dezire rogo roni yo.

⁷Si du oni aye nga ti ni ku sa yo ti gamahe wa sa te; nisungudi gu yugoti nga ga gaani Gbia Yesu Kristo.

⁸Ko du nikanyakasa roni dati digida ha, ya oni du nzunzu rago gaani Gbia Yesu Kristo.

⁹Mbori nga irarengo, nga gu ko i ayambu roni mbiko ko ku rogo gu ringara agume nga ga Wiriko Yesu Kristo gaani Gbia.

¹⁰Awere mi zúngadi roni, awirina, ni rimo gaani Gbia Yesu Kristo, ya oni mongo gúmba pai sa, ka oni kparaka nga dagba roni yo ya; ono oni mongo dú teketeke na berã sa na rugatinapai sa.

¹¹Bambiko i ayugu he fere tipa roni, awirinami, be agu yo du ku Kuroe yo, ya akpata du dagba roni yo.

¹²Were gere gumba mi he ti ni ya, oni naya ni ba sa sa, “Mi nga ga Pauro boro,” “Mi nga ga Aporo ko,” “Mi nga ga Kefa ko,” “Mi nga ga Kristo ko.”

¹³Kristo kparaka? I awagi Pauro tipa roni? Na i abapatizi roni ku rogo rimo Pauro?

¹⁴Mi tambua Mbori ya mi abapatizi nga roni wa sa te, kina Kurisipo na Gayo;

¹⁵gu boro ka ya i abapatizi roni ku rogo rimore.

¹⁶Mi ki bapatizi agu yo nadu ku Setefana yo; fuo agi yo re mi aina nga ya mi abapatizi kura borote.

¹⁷Bambiko Kristo akeda nga re mi nibapatizi aboro te, ono mi nitungusi wene pangbanga; ni gu tatamana nga gumbapai te, si ka sa ga Kristo wagiwagi ngua si du ni ku he.

¹⁸Bambiko pa wagiwagi ngua du fu agu yo nakpí akpi ni mumungo pai; ono fu agu rani i nabatasa rani si nga ga Mbori tandu.

¹⁹Bambiko si ni keke he, “Mi agbárasa gu tatamana nga ga airatatamana, mi ki ba gu rugatinapai ku sa yo nga ga airarugapai.”

²⁰Wari du iratatamana ni? Wari du bakeapai ni? Wari du gu irasakapai ni nga ga gi zegino re? Mbori amungosi nga gu tatamana nga ga zegino te?

²¹Bambiko wa du he ni ga Mbori tatamana ya zegino aina nga Mbori mbiko gaha tatamana te, batasa agu yo idi pai angba ti Mbori rogo gu mungo nga ga tungusapai.

²²Bambiko wa aYudo nasana he tipa agu apai i aina pai ti ni, aGiriki ki nigbata tatamana.

²³Ono ani natungusa pa Kristo ni wagiwagi ko, si nga úkota fu aYudo, ki du ni mumungo pai fu aGendiria.

²⁴Ono si nga Kristo, nga ga Mbori tandu na ga Mbori tatamana fu agu yo yambu yo yo, watadu aYudo na aGiriki.

²⁵Bambiko ga Mbori mungo nga tatamana susi gu tatamana nga ga aboro; ga Mbori rungbura du nyanyaki susi gu ome nga ga aboro.

²⁶Bambiko oni ngére pa yamba roni, awirina, wa i ayamba nga agu yo du na tatamana wa du pa borose ni dungu yo te, agu yo nga bahe ni dungu yo te, agu yo nga irisiirisi yo ni dungu yo te.

²⁷Ono Mbori asia gu mumungo ahe nga ga zegino, ko ba zee ti agu yo du na tatamana. Mbori ki sia gu rurungbura ahe nga ga zegino, ko ba zee ti agu yo du nyanyaki.

²⁸Na agu ahe adu nga ni pai zegino va, gbia kuti agu ahe i napayasi he, si Mbori asia ha, ii, na agu ahe adu nga ho ya, ko sa agu ahe du ho ni ku he.

²⁹Si du ka borose sámbua nga tini barangba Mbori wa sa ya.

³⁰Ono oni ho mbiko ko rogo Kristo Yesu yo, ko i asa ko ni tatamana fu rani rogo ko yo. Mbori asa rani ni ruru rani, ni aboro fu Mbori, ni agu yo i atumo yo.

³¹Wa du he rogo Ziazia Kekeapai, “Gu ni nasambua he, ni sámbua gu pai Gbia amangi he.”