Read zande 1 AKorindo 10 Bible Online

1 AKorindo 10 - zande bible

1 AKorindo 10

¹Bambiko, awirina, mi akpi nga nyemu oni zanga ina ha ya abarani adu dunduko tii dubo yo, ki susi rogo baime yo a dunduko te.

²I ki bapatizi yo fu Mose dunduko rogo dubo yo na baime.

³I ki riki ga Toro riahe wa du yo dunduko;

⁴ki nimbiri ga Toro mbirimbiri he wa du yo dunduko. Bambiko i ambimbiri he be gu mbia nga ga Toro napeke fuo yo. Gu mbia nangia Kristo re.

⁵Ono agu yo ni dungu yo angba nga ti Mbori te, si du i akpiki ti ni ngbakungba yo.

⁶Were agi apai re si adu ni kpia pai fu rani, ya ka nyemu gbegberẽapai mangi nga rani wa nyemuhe amangi yo a ya.

⁷Ka oni dú nga ni airisikpiahe, wa bete yo adu ya; wa du he ni keke he, Aboro ki sungu ka ri riahe ki nimbiri he, i ki guari ka ngi mbaro.

⁸Ka ani mángi nga pa bari wa bete yo amangi ya, ki tiwi atiwa 23,000 ni gu rago sa.

⁹Ka ani ásadi nga Gbia, wa bete yo aasadi ko, ki kpiki akpika be awo ya.

¹⁰Ka oni gúmba nga rimo, wa bete yo agumba rimo, ki kpiki akpika be bagbarasi yo ya.

¹¹Were agi apai amangi yo ni kpia pai; si ki du ni keke he tipa za rani, nga agu yo ye digida rago ku auru yo.

¹²Wa du he were, gu ni naberã ha ya ni ru, ni bánda tini, ni ka ti.

¹³A nga asada ye sa roni te, kina gu ka boro hi he ahi. Ono Mbori du ni irarengo, ko aida nga i asadi roni susi gu ka oni rengbe na ni te; ono rago asada ko ambakada gene kura be he a, ya oni rengbe ka hi he.

¹⁴Wa du he were, amangure, oni óro be irisa kpiahe.

¹⁵Mi nagumba ha wa fu airatatamana; oni wísigi gu pai gumba mi.

¹⁶Gu inga maku ani nafu tambuahe tipa ha, a nga gu ngbanya nga ga kure Kristo te? Gu kpokuta ani nakuadi, a nga gu ngbanya nga ga boro Kristo te?

¹⁷Bambiko ani wa du ani ngenge ani wa kpokuta sa, boro sa, bambiko ani namongo rogo gu kpokuta du sa.

¹⁸Oni ngére aYisaraere wa du pa borose, agu yo ninarika amotumo, gu ngbanya nga ga bamotumo si nga gayo te?

¹⁹Gumba mi he wãi tie? ya gu he i natumo na ni fu kpiaahe nga he, na kpiahe nga he?

²⁰Ono ya mi, agu ahe aGendiria natumo na ni, i natumo na ni fu adaimona, fu Mbori te. Ono mi akpi nga nyemu ngbanya du dagba roni na adaimona te.

²¹Ka oni mbiri nga he ti ngba gu inga nga ga Gbia, na gu inga nga ga adaimona te, ka oni dí nga he ti gu mbisa nga ga Gbia, na gu mbisa nga ga adaimona ya.

²²Watadu ani nawo ti Gbia sa de ringo? Omerani susi gako?

²³Agu yo naya “Ru apai aru dunduko;” ono apai angba nga tipa rani dunduko te. “Ru apai aru dunduko;” ono apai nanyakasa nga boro dunduko te.

²⁴Ka boro gbáta nga gani he ya, ono gu ngba fu kurani

²⁵Gu he bagi yo bangbepasio yo, oni ri he, ka oni asana nga he tipa saka pa ha kpoto roni yo ya;

²⁶bambiko “kpotosende nga ga Gbia, na agu ahe du rogo ho dunduko.”

²⁷Ka gu ni yambu ro ku pati pumbo adu nga ni idipase ya mo ki nikpi nyemu ka ndu; gu he i ka maa barangba ro mo ri he, ka mo asana nga he tipa ha ka saka ha kpotoro yo ya.

²⁸Ono ka gu boro ya foro, “I nitumo na gere ni motumo,” ka mo rí nga ha ya, mbiko gu ko nayugu he, na mbiko sangba kpoto yo a,

²⁹ya mi, sangba kpoto yo, nga gamo te―ono ga gu kura ni. Bambiko tipagine i ka saka pa gi raniri mbiko gu sangba kpoto yo nga ga gu ni?

³⁰Ka mi di he ni tambuahe, tipagine i nagumba gbegberẽpai ti rimore ti gu he fu mi tambuahe tipa ha ti ni?

³¹Watadu ri he tie, na mbira he, na gu pai oni ka manga ha dunduko, oni mángi he dunduko sa taasa rimo Mbori.

³²Ka oni moi nga ũ kota fu boro ya, watadu fu aYudo, na fu aGiriki, na fu ga Mbori kanisa,

³³a wa mi nangba a na aboro dũ ti apai dú ka mi agbata nga gu pai ka ngba fere ya, ono gu ka ngba fu dungu aboro, i bati abata.