Read zande 1 AKorindo 11 Bible Online

1 AKorindo 11 - zande bible

1 AKorindo 11

¹Oni dú ni awiriki pa re, a wa du mi a ni wiriki pa Kristo.

²Were mi tambua roni wa oni natingida pa re rogo apai dunduko, ki nika kuti asino nyanyaki a wa mi afu he fu roni.

³Ono mi nakpi nyemu oni ini he ya, ri akumba dunduko nga Kristo; ri de ki ngia kumba; ri Kristo ki ngia Mbori.

⁴Gu kumba ka kpara kpe watadu gumba pai, rini ni dadidadi he, ni nawasi rini.

⁵Ono gu de ka kpara kpe watadu gumba pai ni ku riri, ri nawasi riri; bambiko si sa ha wa ka ri kpe riri akpe.

⁶Bambiko ka i adada nga ri de ya, si wa i yere mangeriri ayera. Ono si ngia zee du fu de ti yera mangeriri na kpe riri, i dadi riri adada.

⁷Bambiko kumba ka adu nga na rini ni dadidadi he ya, bambiko wa du ni ni kpia Mbori na gako taarimo; ono de nga ga kumba taarimo.

⁸Bambiko kumba aenga nga ti de te; ono de naenge ti kumba.

⁹Bambiko i afu nga kumba tipa de te; ono de tipa kumba.

¹⁰Mbiko gi pai re de ka du na úyugo pa zoga ri ti riri, ba mbiko amaraika.

¹¹Ono rogo Gbia yo de adu nga ho zanga kumba te, kumba adu nga ho zanga de a te.

¹²Bambiko wa du de mbiko kumba, wo du kumba a mbiko de; ono apai du ho dunduko mbiko Mbori.

¹³Oni sáki he dagba roni yo; ka de kpari kpe fu Mbori ki he dada riri, si ru?

¹⁴Sino nayugo ho fu roni tigaha, ya ka kumba du na gbanga mangerini, si nga wasiro fu ni, te?

¹⁵Ono ka de du na gbanga mangeriri, si nga taarimo fu ri, bambiko i fu mangeriri fu ri tipa dada riri.

¹⁶Ono si ngia gu boro nati kangu, sinorani adu nga wo te, nga ga Mbori akanisa a te.

¹⁷Ono wa mi arú gi ndika fu roni re, mi atambua nga roni te, ya oni nadungura tironi sa gu pai ngba te, ono sa gu pai gberẽ.

¹⁸Bambiko bambata ha nga, mi gi he ya ho oni nadungura tironi ni ni rimbasa roni, kparakakparaka apai nidu dagba roni yo; ya mi rengo du a.

¹⁹Bambiko kparakpara pai ka du a dagba roni yo, si yugu agu yo nangba ti Gbia dagba roni yo.

²⁰Si ki ta du were ho oni nadungura tironi ni, oni arengba nga na ri ga Gbia riahe te;

²¹bambiko wa oni nari he gu ni naroga gani riahe mbata fu kura ni; gu ni ki du na gomoro, gu kura ni ki nikpi buda.

²²Gine du? abambu be roni ka ri he ki nimbiri he rogo ho te? watadu oni napayasi ga Mbori kanisa, ki ba zee ti agu yo adu nga he be yo ya? Gine mi ka gumba ha fu roni? ka mi tambua roni ti gere? Mi atambua nga roni te.

²³Bambiko mi adi pai be Gbia nga gu mi afu fu roni a, wa Gbia Yesu adi kpokuta ni gu yuru i akusi pa ko ni re;

²⁴ho ko atambua he ni ko ki kuadi he, ki ya, “Gere nga borore, nga gu du fu roni; oni ta manga gere nitíngidi pa re.”

²⁵A wo inga fuo riahe, niya, “Gi inga re nga vovo ndika rogo kurere; oni mángi gere, ni gu rago oni ka nimbiri he, nitíngidi pa re.”

²⁶Bambiko a wa oni ka niri gi kpokuta re, nimbiri he ti ngba gi inga re, oni nataka pande ga Gbia kpio da ho ko ka ye ni.

²⁷Wa du he were gu boro ka du na gbegberẽ berã ki ri gu kpokuta ki mbiri he ti ngba gu inga ga Gbia, ni ka du ni borobape boro Gbia na kureko.

²⁸Ono boro wísigi tini, wo ni ka ri gu kpokuta re ki mbiri he ti ngba gu inga re.

²⁹Bambiko gu ni ka ri he ki mbiri he, ni nari sapangbanga kuti ni ki nimbiri he, ka ngia ni aruga nga tini na pa boro Gbia te.

³⁰Tipa gi pai re agu yo dagba roni yo ni dungu yo narungbura ki du na kaza, agu yo ki ra ara ni umba yo te.

³¹Ono ka ngia ani aruga tirani, i sapu nga ngbanga rani te.

³²Ono ho i nasapa ngbanga rani ni, Gbia naruga rani, ya ka i gbarasi nga ngbanga rani na zegino ya.

³³Wa du he were, awirinami, ho oni nadungura tironi ni ka ri he, oni sungudi akuaroni.

³⁴Si ngia gomoro namanga gu boro, ni rí riahe kpuni yo; ka gaoni dungurati du nga sa sapangbanga ya. Kura apai mi arúga ha ni gu rago mi ka ye.