Read zande 1 AKorindo 12 Bible Online

1 AKorindo 12 - zande bible

1 AKorindo 12

¹Were tipa agu ahe nga ga toro, awirina, mi akpi nga nyemu oni zanga inahe te.

²Oni ini ya ho oni adu ni ni aGendiria oni apeke fuo gu kpiahe ka afura nga ya, a wa i angbe fu roni ku mbata yo sa ni.

³Wa du he were mi fugu he fu roni oni ini ya a nga boro ho ka gumba pai sangba ga Mbori Toro yo niya, “Yesu nga boro motiwa,” wa sa te; a nga boro ka ya, “Yesu nga Gbia” te, kina sangba Ziazia Toro yo.

⁴Were agamahe na angbatungaha akia, ono Toro du sa nafu he.

⁵Mangapase ki du na angbatungaha akia, Gbia ki du sa i namanga pa ko.

⁶Manga sunge ki du na angbatungaha akia, ono Mbori du sa, namanga apai dunduko rogo ahe du.

⁷Ono i fu yuguyuguhe ni dezire Toro fu aboro ni ba sa sa i u be he.

⁸Bambiko i fu gu pai nga tatamana fu gu ni rogo Toro yo; ki fu gu pai nga inahe fu kura ni, ku sangba kina gu Toro yo sa;

⁹idapase fu kura ni rogo kina gu Toro re; gu agamahe nga husa aboro, rogo kina gu Toro sa;

¹⁰manga agu apai du na tandu fu kura ni, tandu, gumba apai mbata si nikada fu gu ni; wisiga pa atoro ki du fu gu ni: ngbatunga afugo ki du fu gu ni; pa sa afugo ki du fu gu ni.

¹¹Ono Toro kina sa namanga agi apai dunduko re, ki nikparaka ha fu yo ni ba sa sa a wa ko akpi nyemu he.

¹²Bambiko wa du kpotoboro sa, si ki du na dungu apaha, apa kpotoboro wa du he ni dungu he, si nga kpoto sa; wo du Kristo a.

¹³Bambiko i abapatizi rani dunduko rogo Toro sa ku rogo kpotoboro yo sa, wa du ani watadu ni aYudo na aGiriki, watadu ni akanga na ani ni araniri; i ki ya ani mbiri Toro ambira sa.

¹⁴Bambiko a nga kpotoboro na paha sa te, ono si ni dungu he.

¹⁵Ka ndue ya, “Mbiko wa adu nga mi ni be ya, a nga mi ni pa kpotoboro te;” si he nga du ni pa kpotoboro mbiko gure te.

¹⁶Na ka tue ya, “Mbiko wa adu nga mi ni bangirise ya, a nga mi ni pa kpotoboro te;” si he nga du ni pa kpotoboro mbiko gure te.

¹⁷Ka kpotoboro angia kina bangirise dunduko, ka gia pai adu wari? Ka si angia kina gia pai dunduko, gia fuõ he ki du wari?

¹⁸Ono awere Mbori moi apa boro ni ba sa sa ti kpotoboro a wa si angba ti ko.

¹⁹Na ka si adu dunduko na paha sa ka kpotoboro adu wari?

²⁰Ono awere si du na dungu apaha, ono kpotoboro ki du sa.

²¹Ka bangirise ya nga fu be, “Zingo ro adu nga ti re te, ya;” watadu ka ri ya nga fu ndue, “Zingo roni adu nga ti re te,” a ya.

²²Oó, wa sa te, agu apa boro du ni rurungbura ha bangirise re, si ka du ho:

²³na agu apa boro ani niya ti ni re irisa ti ni gbe te, ani namaa irisa ti gere susi. Agu aparani angba nga ngbanyaha ya si ki du na wene ngbanyaha susi.

²⁴Ono agu aparani du na wene ngbanyaha zingoho ti ni te. Ono Mbori aringbisi kpotoboro wa he sa, nifu irisa susi fu gu paha nikpa;

²⁵ya ka kparaka du nga rogo kpotoboro ya; ono apaha bánda tihe abanda dagba ha wa sa.

²⁶Watadu gu paha ki hi pai, kura apaha ki hi pai na ni dunduko, na i irisi gu paha sa, kura apaha ki ngi angi na ni dunduko.

²⁷Were oni nga boro Kristo, ki du ni apaha ni ba sa sa dunduko.

²⁸Mbori ki moi agu yo rogo kanisa yo, amokedi mbata, anebi ki du ni ue he, abayugupai ki du ni biata ha, agu yo namanga apai na tandu ki du, gu agamahe nga husa aboro ki du, na undahe, na zoga aboro, na gumba ngbatunga afugo.

²⁹Amokedi nga yo dunduko? Anebi nga yo dunduko? Abayugupai nga yo dunduko? Amangi agu apai du na tandu nga yo dunduko?

³⁰I asia pa husa aboro fu yo dunduko? Agumba ngbatunga fugo aboro nga yo dunduko? I dunduko nasa fugo aboro?

³¹Ono oni nikpí nyemu kina gu agamahe du ni bakere he kakaka. Ono mi ayúgo gu gene ngba susi fu roni.