Read zande 1 AKorindo 14 Bible Online

1 AKorindo 14 - zande bible

1 AKorindo 14

¹Oni péke fuo nyemuse, oni nikpi nyemu gu gamaahe nga ga Toro a kakaka, ono gu kii susi nga oni gumba pai wa anebi.

²Bambiko gu ni nagumba pai ni ngbatunga fugo ni agumba nga ha fu aboro te, ono fu Mbori; bambiko a nga boro sa rugu tini na ni te; ono ni nagumba gbugbu apai rogo Toro.

³Ono gu ni nagumba pai wa anebi ni nagumba ha fu aboro sa nyakasa yo, na ngarasa yo, ki nifu wasa fu yo.

⁴Gu ni nagumba pai ni ngbatunga fugo ni nanyakasa tini; ono gu ni nagumba pai wa anebi ni nanyakasa kanisa.

⁵Were ka oni gumba pai dunduko ni ngbatunga afugo ka si angba ti re, ono gu ngba susi nga ka oni gumba pai wa anebi. Gu ni nagumba pai wa anebi ni kii ti gu ni nagumba pai ni ngbatunga afugo, kina gu ka ni sa ha asa, kanisa nyaki mbiko ho.

⁶Ono awere, awirina, ka mi ye koyo du oni ni, nigumba pai ni ngbatunga afugo, mi awíra pa unda roni wãi, kina gu ka mi tungusi pai fu roni watadu ni yuguyugu he, na inahe, nagumba ha wa anebi, na yugo pa ha?

⁷Agu ahe napaa apaa adu nga ni ungaha a ki nipoi apaa ya, watadu mbanya na kundi, ka si akparaka nga woroho ya, i wiri pa ina gu i navuda ha watadu taka ha wãi?

⁸Bambiko ka kpangi wo ni guzaguza woroho, da ka mbakadi tini tipa vura?

⁹Wo du oni a, ka oni afura nga ni gu fugo ipi pa gia ha ya, i awira pa ina gu pai i agumba ha wãi? bambiko oni afura kina ku yuge yo gbua.

¹⁰Dungu ngbatunga afugo du zegino, a nga gu sa zanga pai ti ni te.

¹¹Ka mi aina nga gu pai dũ ti gu fugo tie ya, mi ki du wa boro kura ringara fu gu ni nagumba ha, gu ni nagumba ha ni ki du wa boro kura ringara fere.

¹²Wo du oni a, wa oni nakpi nyemu gu gamaahe nga ga Toro kakaka, oni gbáta gu nga oni du na agu apai ka nyakasi kanisa susi.

¹³Were tie gu ni nagumba pai ni ngbatunga fugo, ni kpari tipa ina pa sa ha.

¹⁴Bambiko ka mi kpari ni ngbatunga fugo, torore du nakpara, ono gi berã ki zangada.

¹⁵Gine du tie? Mi akpara ni toro, mi ki kpari ni rugatinapai a: mi abi bia ni toro mi ki bi bia ni rugatinapai a.

¹⁶Ka si adu nga wo ya, ka mo fu tambuahe ni toro, gu ni ka du ni zangainahe ni wiri pa ya wãi “Amina” fuo ga tambuahe, wa ni aina nga gu pai gumba mo ya?

¹⁷Bambiko mo nafu tambuahe tigu wenengaĩ, ono si anyakasa nga kura ni te.

¹⁸Mi natambua Mbori, ya mi nagumba pai ni ngbatunga afugo susi roni dunduko.

¹⁹Ono rago ga kanisa dungurati gumba afugo bisue aboro rugu tiyo na ni, mi raba kura aboro a na ni, si ngba ti re susi afugo 10,000 ni ngba tunga afugo.

²⁰Awirina, ka oni dú nga ni agude rogo gaoni berã ya. Ono tipa sogote oni dú wa fogo agude, ono rogo berã oni dú ni sosono aboro.

²¹Si ni keke he ti rugute, “Mi agumba pai fu agi aboro re ku ngba agu aboro du na fugoyo akia, na ku ngba kura rika aboro a; ka si vura du wo vurũ i agia nga pa re te, wo poi Gbia.”

²²Were tie ngbatunga afugo du tipa gu pai i aina pai ti ni, si fu agu yo idi pase te, ono fu azangaidapase. Ono gumba pai wa anebi si fu azangaidapase te, ono fu agu yo idi pase.

²³Ka kanisa mongo dungura tiyo tie, i ki gumba pai ni ngbatunga afugo dunduko, agu aboro ki rimi aina nga pai ya, watadu i aida nga pai te, i aya nga oni nga airanzanga te?

²⁴Ono ka i gumba pai wa anebi dunduko, gu boro ki rimi aida nga pai ya, watadu ni aina nga pai te, ni adu ni rugurugu ni be yo dunduko, gani pai adu ni wisigiwisigi he be yo dunduko.

²⁵Gu gbugbu apai du kpotoni yo ki du ni yuguyugu he; si du ni ka ti sande ti ni ni kpakpuni ki irisi Mbori, niya Mbori du dagba roni yo ni rengo.

²⁶Gini pai dũ tie, awirina? Ho oni nadungura tironi ni, gu ni du na tambuahe be ni, gu ni na yugopai, gu ni na yugoti, gu ni na ngbatunga fugo, gu ni na pa sa ha. Oni mángi apai dunduko sa nyakasa tise.

²⁷Si ngia gu boro nagumba pai ni ngbatunga fugo, i mángi he wa ue, ka i súsi nga biata ya, ni ba sa sa; gu boro ki sa ha.

²⁸Ono ka basaha adu nga ti ni ya, ni ongo aonga rogo ga kanisa dungurati yo. Ni ki gumba pai ku kpotoni yo, na fu Mbori.

²⁹Anebi ki gumba pai a wa ue na biata, agu yo ki wisigi he.

³⁰Ono ka pai dũ ni yuguyugu he fu gu kura ni nasunga pati ni, bambata ni ki ongo.

³¹Bambiko oni rengbe na gumba pai dunduko ni ba sa sa, oni wiriki pai dunduko, ki wasa dunduko;

³²toro anebi nara fu anebi;

³³bambiko a nga Mbori ni Mbori ruguzuruguzu pai te ono zereda. Wa du he rogo ga Mbori aboro kanisa dunduko,

³⁴ade ongo aonga rago ga akanisa dungurati yo; bambiko i aida nga pa gumba pai fu yo te. Ono i dú ni zogozogo yo, wo gumba rugute he a.

³⁵Si ngia i nakpi nyemu ka wirika gu pai, i sana kina akumbayo kporo yo; bambiko si nga zee fu de ka gumba pai rago ga kanisa dungurati yo.

³⁶Waĩ? Ga Mbori pai aye yo du oni ni? Na si aye fu kina roni sa?

³⁷Ka gu boro berẽ he tigani ya nebi nga ni, na ni nga gu boro du na Toro, ni berẽ agu apai ke mi he fu roni, ka ina ha ya si nga ga Gbia rugute.

³⁸Ono ka gu boro ti kangu, ni ru bani tie.

³⁹Wa du he were, awirinami, oni kpi nyemu gumba pai kakaka wa anebi, ka oni zá nga yo ti fura na ngbatunga fugo ya.

⁴⁰Ono I mángi apai dunduko nzunzu ni tangaratangara ha.