Read zande 1 AKorindo 15 Bible Online

1 AKorindo 15 - zande bible

1 AKorindo 15

¹Awere mi natingida pa ina gu wene pangbanga fu roni, awirina, mi atungusi pa ha fu roni, nga gu oni adi ku gume a, nga gu ru oni rogo yo,

²si oni abata mbiko ho a; si ngia oni ka kuti agu apai mi atungusi he fu roni rogo yo nzunzu, kina gu ka oni idi pai gbua.

³Mbiko mi ayugu agu apai fu roni nga gu mi adi ku gume mbata a, wa Kristo akpi tipa gaani ingaapai, ku sangba Ziazia Kekeapai yo;

⁴na wa i akpisidi ko; na wa i azingisi ko ti biata uru ku sangba Ziazia Kekeapai yo.

⁵Na wa ko ayugu tiko fu Kefa; fuo ho fu agu yo nanidu bawe na ue;

⁶Ko ki yugu tiko fu agu awirina nasusi 500 ni ba sa, agu yo nye ni dungu yo daku awere, ono bete yo ti ni rame.

⁷Ko ki yugu tiko tie fu Yakoba, fu amokedi dunduko tie.

⁸Ti yangara ha dunduko ko ayugu tiko fere a wa fu gu boro i avunga nga ni ti rago vunga ya.

⁹Bambiko mi nga gu umba ni dagba amokedi yo dunduko, arengba nga na gu rimo nga mokedi ya, bambiko mi arungosi ga Mbori kanisa.

¹⁰Ono be gu undahe nga ga Mbori mi du wa du mi. Na gako undahe i amoi ku ri re si adu nga gbua te; ono mi amangi apai bakere susi yo dũ. Ono mi te, kina gu undahe nga ga Mbori nadu na mi.

¹¹Si ngia mi du tie na yo, wo ani natungusa ha dunduko, wo oni aidi he a.

¹²Were ka i natungusa pa Kristo ya i azingisi ko dagba kangba aboro yo, wãi ya bete yo dagba roni yo a nga zingabekpio dagba kangba aboro ho te?

¹³Ono si ngia zingabekpio dagba kangba aboro ho te, i azingisa nga Kristo tie te;

¹⁴na ka i azingisa nga Kristo ya, gaani tungusapai du tie gbua, gaoni idapase a si gbua

¹⁵Ii, i ki bi rani ni zire ga Mbori adezire; bambiko ani aru ni adezire tipa Mbori ya ko azingisi Kristo. Ka ko azingisa nga ko ya, si ngia i azingisa nga kangba aboro te.

¹⁶Mbiko ka i azingisa nga kangba aboro ya a nga si wa i azingisi Kristo te.

¹⁷Ka i azingisa nga Kristo ya, gaoni idapase si gbua; oni kina rogo gaoni ingaapai kindi.

¹⁸Agu yo natiwi ni rame rogo Kristo yo a i kpiki tie.

¹⁹Si ngia rogo kina gi unga re moi ani bangirani rogo Kristo, ani nga rungorungo aboro dagba aboro susi yo dunduko.

²⁰Ono ni rengo i azingisi Kristo dagba kangba aboro, ni makawa agu yo nara ara.

²¹Bambiko wa kpio aye be boro, a wo zinga kangba aboro be kpio aye be boro.

²²Bambiko wa aboro nakpí akpi dunduko rogo Adama yo, a wo rogo Kristo yo i adu adu ni ungayo dunduko.

²³Ono i adu ti kina ragoyo ni ba sa sa: Kristo nga makawa; fuo gure agu yo nga ga Kristo yo, rago ye ko.

²⁴Fuo gure digida pai ki du, ho ko ka fu ngbi ni fu Mbori nga kina Ba; ko nadigisa ga abazogo apai dunduko na asia pai dunduko na tandu.

²⁵Bambiko ko ka kindo, daho ko ka maa avurako ni dunduko ku tii nduko yo.

²⁶Yangara vura i nikagbarasa ha nga kpio.

²⁷Bambiko ya Ziazia Kekeapai, “Mbori amoi ahe dunduko kina ku tii nduko yo.” Ono wa ya ko, “I moi ahe dunduko tii ko,” si nga binibangirise ya i nakoda nga gu ko namoi ahe dunduko ku tii ko na ni te.

²⁸Ho i ka maa ahe ni dunduko ku tii ko, Wiri tigako tie ki moi tiko ku tii gu ko namoi ahe dunduko tii ko, Mbori du adu mbata yo fu ahe dunduko.

²⁹Ka si adu nga wo ya agu yo i abapatizi yo ku ba agu yo naima kpi i amanga wãi? Ka ngia i azingisa nga kangba aboro wa sa te, i nabapatizi yo ku ba yo tipagine tie?

³⁰Ani a tigaani tipagine ani naru ngba pai yo na saa dunduko ti ni?

³¹Mi gumba ha ni rimo gu tambuahe du be re mbiko roni, rogo Kristo Yesu yo gaani Gbia, ya mi nakpi na uru!

³²Si ngia mi aso vura na anya Efesa no wa du pa aboro, si mangi wãi fere? Ka i azingisa nga kangba aboro ya, “Ani rí he ki nimbiri he, bambiko gba ani akpí akpi.”

³³Ka i nángi nga roni ya: “Gbegberẽ kpamiatise nagbarasa wene sino.”

³⁴Oni zingisi gaoni berã, ka oni íngi nga ya; bambiko agu roni aina nga Mbori wa sa te; mi gumba gere ka maa zee ti roni.

³⁵Ono gu ni aya, “I wiri pa zingisa kangba aboro wãi? I aye ni gini ngbatunga kpotoboro?”

³⁶Na mungo mo! Gu he mo narũ tigamo si adu nga na ungaha te, kina ka si kpi.

³⁷Gu mo naru a, mo arú nga gu borohio nikadu te, ono zendehe gbua, si ngia nganu, watadu kura ngbatunga zendehe.

³⁸Ono Mbori nafu kpotoho kina wa ko akpi nyemu he, ki fu kpotoho fu zendehe ni ba sa sa.

³⁹Pasio du nga na ngbatungaha sa dunduko te: ono pasio boro du sa, pasio anya du akia, pasio azire du akia, ga atio akia a.

⁴⁰Aũ ngbangbaturũ du ho a na aú kpotosende; ono gu taarimo nga ga aú ngbangbaturũ du sa, gu nga ga aũ kpotosende du akia.

⁴¹Gu imarago nga ga uru du sa, gu imarago nga ga diwi du akia, gu imarago nga ga akerekuru du akia; bambiko imarago nga ga gu kerekuru akia ti gu kura ha ti pa imaha.

⁴²A wo du pa zinga kangba aboro be kpio. I narú he ni zirã; i nazingisa ha zanga zirã.

⁴³I narũ he na zee; i nazingisa ha na taarimo. I narũ he na rungbura; i nazingisa ha na tandu.

⁴⁴I narũ he na boro borose; i nazingisa ha na boro toro. Si ngia boro borose du ho, boro toro du ho a.

⁴⁵Wa du he ni keke he a, “Bambata boro nga Adama ki du ni unga mbisimo.” Yangara Adama ki du ni gu toro nafu unga.

⁴⁶Ono gu nga toro adu nga ni bambata ha te ono gu nga borose; gu nga toro ki du fuo ho.

⁴⁷Bambata boro nga ga sende ko, ũ sende; ue boro nga ga ngbangbaturũ ko.

⁴⁸Wa du gu ko nga ga sende ko, wo du agu yo nga ga sende yo a; na wa du gu ko nga ga ngbangbaturũ ko, wo du agu yo nga ga ngbangbaturũ yo a.

⁴⁹Na wa ani adu na kpia gu ko nga ga sende ko, ani nikadu na kpia gu ko nga ga ngbangbaturũ ko a wo.

⁵⁰Were gumba mi gere, awirina, ya ka pasio na kure di nga kumbo ga Mbori ngbi te; zirã adia nga kumbo zanga zirã a te.

⁵¹Oni ngére! Mi nagumba iiriwo pai fu roni. Ani ará nga dunduko te, ono i asá rani akia dunduko,

⁵²ni ipo, wa pira bangirise, ti woro yangara kpangi. Bambiko kpangi apaa apaa, i ki zingisi kangba aboro zanga zirã, i ki sa rani akia.

⁵³Bambiko gi zizirĩ boro re ka ukadi zanga zirã, gi kpikpi boro re ka ukadi zanga kpio.

⁵⁴Ono ho gi zizirĩ boro re ka ukadi zanga zirã ni na gi kpikpi boro re ka ukadi zanga kpio, gu pai ki da ti rengo du ni keke he ya, “Kpio du ni digisidigisi he, kina diabese ki nye.

⁵⁵Ako kpio, wari du ga diabese ni? Ako kpio, ga egetera wari?”

⁵⁶Egetera kpio nga ingapai; tandu ingapai nga rugute.

⁵⁷Ono i fu tambuahe fu Mbori, na fu diabese fu rani rogo gaani Gbia yo Yesu Kristo.

⁵⁸Wa du he were, betedi awirinami, oni dú nyanyaki, zanga wo, nimángi ga Gbia sunge zaza dedede, bambiko oni ini ya gaoni sunge adu nga gbua rogo Gbia yo te.