Read zande 1 AKorindo 16 Bible Online

1 AKorindo 16 - zande bible

1 AKorindo 16

¹Awere mi berẽ pa gu dungura amarã du tipa ga Mbori aboro, a wa mi agumba ha fu agu akanisa du Garatia yo, oni nimángi a wo.

²Ti gu bambata uru nga ga poso oni nimoi gaoni ahe pati roni ni ba sa sa ni igiigi he, gu ni a wa rengbe gani u, ya ka i dungura nga marã bara ho mi ka ye ni ya.

³Ho mi ka da ni, kina agu aboro oni ka ringbisa pa yo rogo awaraga yo mi ki kedi yo ka tinda gaoni ũ inapai ku Yerusarema yo:

⁴na ka si rengbe fere ka ndu a, i ki ndu na mi.

⁵Ono mi ayé koyo du oni ni, mi nasusi Makedonia yo; mbiko mi nikasusa Makedonia yo.

⁶Ono si adu wa ka mi nye anye ho du oni ni watadu ti ragozere a, oni gasi re ku mbata yo ti gi nunguro ku rogo agu arago mi ka ndu sa ni.

⁷Mbiko mi aida nga ka bi roni awere ngba gene te; mbiko mi namaa bangire ka ima na oni ngbutuko, ka Gbia idi he.

⁸Ono mi anyé Efesa no dati rago Pendekote,

⁹bambiko bakere ngbadimo ni zaza ha fere na bakere sunge nga gu rengbe mi ka manga ha, yo du dungu avura ni a.

¹⁰Awere ka Timoteo ye, oni bi he ya ko du na oni zanga gunde; bambiko ko namanga gu sunge nga ga Gbia, wa mi namanga ha.

¹¹Si du ka boro sáwia nga ko ya. Ono oni gási ko ku mbata yo ti gako nunguro ni zereda, ya ko ye kono du mi ni, mbiko mi naso gima ko na awirina.

¹²Ono tipa Aporo nga wirina, mi azungadi ko bakere ko ye koyo du oni ni na awirina, ono ko akpi nga nyemu ka ye awere wa sa te; ono ko ayé ho momu he ka manga ko ni.

¹³Oni ngére, oni rú nyanyaki rogo idapase. Oni dú wa akumba, oni dú nyanyaki.

¹⁴Agu apai oni amanga oni mangi he dunduko rogo nyemuse.

¹⁵Awere mi nazungadi roni, awirina oni ini gu kporo nga ga Setefana, ya aboroho nga makawa Akaya yo, na wa i afu tiyo ka manga pa ga Mbori aboro.

¹⁶Si du oni zogo tironi fu ngbatunga agi yo re, na fu agu yo dunduko naunda he rogo sunge ki nimangi he.

¹⁷Mi nangi tipa gu yega nga ga aSetefana na Forutunato na Akaiko, mbiko gu nakpa dagba gaoni apai i digisi he.

¹⁸Mbiko i ngarasi torore na gaoni. Oni inidi ngbatunga agi yo re.

¹⁹Agu akanisa du Asia no sanango roni. Akuira sanango roni gbe na Purisekira rogo Gbia, na gu kanisa du kpuyo yo.

²⁰Awirina sanango roni dunduko. Oni sánango tironi dagba roni yo ni ziazia dungoti.

²¹Gere nga gi sanango ni boro bere nga Pauro.

²²Ka boro du ho akpi nga nyemu Gbia ya, ni du ni boro motiwa. Gaani Gbia naye.

²³Gu undahe nga ga Gbia Yesu Kristo dú na oni.

²⁴Gi nyemuse dú na oni dunduko rogo Kristo Yesu yo. Amina.