Read zande 1 AKorindo 2 Bible Online

1 AKorindo 2 - zande bible

1 AKorindo 2

¹Mi a, awirina, ho mi aye ni koyo du oni ni, mi aye nga na gu iriwo du ti fura na tatamana ka tungusa gu gasigasi pai nga ga Mbori te.

²Bambiko mi arugu tire ya ka mi aina nga pai dagba roni yo ya, kina Yesu Kristo, na wa i awagi ko.

³Mi ki du na oni ni rungbura, na gunde, na bakere kio.

⁴Furare na gi tungusa pai adu nga ni zungadizungadi apai nga ga tatamana te, ono ni yugu pa Toro na tandu.

⁵Ka gaoni idapase rú nga rogo gu tatamana nga ga aboro te, ono rogo ga Mbori tandu.

⁶Si ki vura du wa gere ani nagumba tatamana tigu dagba agu yo du nzunzu, ono nga gu tatamana nga ga gi zegino re, na ga abazogo gi zegino re, naye ka du gbua te.

⁷Ono ani nagumba pa ga Mbori tatamana ni gbugbu pai, nga gu nadu ni okooko ho, gu Mbori aringbisi he mbata fu azegino sa gaani taarimo.

⁸Si nga gu abazogo gi zegino re aina nga ha wa sa ya, bambiko ka i aini he, ka i awagi nga Gbia taarimo te.

⁹Ono wa du he ni keke he, “Agu apai bangirise abi nga ha ya, tue agia nga ha ya, nga agu apai boro aberã nga pa ha wa sa a ya, si nga agu apai dunduko Mbori ambakadi tipa agu yo nakpi nyemu ko.”

¹⁰Ono Mbori ayugu he fu rani rogo Toro yo. Bambiko Toro nabi apai dunduko, ii, gu dudungura apai nga ga Mbori.

¹¹Bambiko da ini agu apai nga ga boro dagba aboro yo, fuo kina toro boro du rogo ni yo? a wo a nga boro sa ini agu apai nga ga Mbori wa sa te, kina ga Mbori Toro.

¹²Ono ani adi gu Toro nga ga Mbori, gu nga ga zegino te; ani ini agu apai Mbori nafu fu rani gbua.

¹³Nga agu apai ani nagumba ha, ni agu apai ga boro tatamana nayugo ho te, ono gu Toro nayugo; niringoisi agu apai nga ga Toro fu agu yo du na Toro.

¹⁴Were boroboro adia nga agu apai nga ga ga Mbori Toro te; bambiko si du ni mumungo pai fu ni; ka ni ini nga ha te, bambiko i nawisiga ha ni Toro.

¹⁵Ono gu ni du na toro nawisiga apai dunduko, ka kura boro awisiga nga ni tigani wa sa ya.

¹⁶“Bambiko da ini gu berã nga ga Gbia, ni ka yugo pai fu ko?” Ono ani du na ga Kristo berã ti rani.