Read zande 1 AKorindo 3 Bible Online

1 AKorindo 3 - zande bible

1 AKorindo 3

¹Mi a, awirina, ka mi agumba nga pai fu roni wa ka oni adu na Toro te, ono wa fu boro borose, wa fu fogo agude rogo Kristo yo.

²Mi arigi roni ni mai, ni pasio te; bambiko oni arengba nga na ni mbata te; oó, oni ata rengba nga na ni awere a te.

³Bambiko oni nga boro borose kindi; bambiko wa du kpihe dagba roni yo na kpata, oni nga boro borose wa oni nata fuo sino aboro, te?

⁴Bambiko ho gu ni aya ni, “Mi nga ga Pauro ko;” gu ni ki ya, “Mi nga ga Aporo ko;” aboro nga oni te?

⁵Gini he tie nga Aporo? Na gini he nga Pauro? Amoyambu oni aye ka ida pai mbiko yo; gu ni a wa Gbia afu he fu ni.

⁶Mi arú he, Aporo ki nitudi he; ono Mbori nazugasi he.

⁷Si du tie watadu gu ni narũ he na gu ni natuda ha, he nga ni te; kina Mbori nazugasi he.

⁸Were gu ni naru he na gu ni natuda ha, i sa. Ono gu ni ka dia gani mosoro tigani rengbe na gani nyanyaki sunge.

⁹Bambiko ani nga ga Mbori abadiasunge. Oni nga ga Mbori ati, ga Mbori duadua bambu.

¹⁰Wa du ga Mbori undahe i afu fere mi amoi mburuhe wa iratatamana bangbasia duabambu; gu kura boro ki dua he auru he. Ono gu boro banda tini wa ni nadua he auru he.

¹¹Bambiko a nga kura mburuhe ho ka boro moi he fuo gu moi yo, nga Yesu Kristo te.

¹²Ono ka gu boro dua he auru mburuhe, dahabu, feda, agu ambia kii genoho, ngua, ugu nvuo, kakarika;

¹³i ayugo pa ga agu aboro sunge re. Bambiko gu uru ataka pande he, bambiko i ayugo ho rogo we yo; we tigaha ki asadi ga aboro sunge ni ba sa sa gini ngbatunga nga ha.

¹⁴Ka ga gu boro sunge ima ni adua ha auru he, ni adía mosoroho adia.

¹⁵Ka ga gu boro sunge gbi agbi, ni azánga; ono ni tigani nikabata; ono si adú wa rogo we yo.

¹⁶Oni aina nga ya ga Mbori yekaru nga oni, ga Mbori Toro ki ima rogo roni yo, te?

¹⁷Ka gu boro gbarasi ga Mbori yekaru, Mbori agbárasa ni; bambiko ga Mbori yekaru du ziazia, gu yekaru nga oni re.

¹⁸Ka boro nángi nga tini wa sa ya. Si ngia gu boro ho ya ni nga iratatamana dagba roni yo rogo gi zegino re, ni sá tini ni mumungo boro, ni ki ye ka du ni iratatamana.

¹⁹Bambiko gu tatamana nga ga gi zegino re si nga mumungo pai bangiri Mbori. Bambiko si ni keke he, ya, “Ko nazia airatatamana ni gayo bawagi,”

²⁰berewe a, “Gbia ini ga airatatamana berã, ya si nga uturangba.”

²¹Wa du he were ka boro kíisi nga pa aboro ya.

²²Bambiko ahe dunduko nga gaoni; watadu Pauro, na Aporo, na Kefa, na zegino, na unga, na kpio, na agu ahe du awere, na agu ahe nikaye;

²³si nga gaoni dunduko; oni ki du ni ga Kristo yo; Kristo ki du ni ga Mbori ko.