Read zande 1 AKorindo 8 Bible Online

1 AKorindo 8 - zande bible

1 AKorindo 8

¹Were tipa agu ahe i atumo na ni fu kpiaahe: Ani ini ya ani mongo du na inahe. Inahe nafu enda, ono nyemuse nanyakasa boro.

²Ka boro berẽ he ya ni ini gu pai, ni ata ina nga ha wa ni ka ina ha ya;

³ono ka boro kpi nyemu Mbori, ko ini ni.

⁴Tipa ri agu ahe i atumo na ni fu kpiaahe tie, ani ini ya nga kpiahe zegino nga he te, ani ki ini ya a nga Mbori no fuo gu ko du sa te.

⁵Bambiko ka i vura ya ti agu ahe ambori, watadu ngbangbaturũ yo na auru kpotosende; wa du ambori ni dungu yo, na agbia ni dungu yo;

⁶ono tipa rani Mbori du ho sa, nga Ba, nga gu ko ahe aenge yo du ko ni dunduko, ani ki du fu ko; Gbia ki du sa, nga Yesu Kristo, nga gu ko ahe aenge rogo ko yo dunduko, ani rogo ko yo a.

⁷Ono aboro adu nga na gi inahe rogo yo yo dunduko te re. Ono agu yo, pa kpiahe nidu bangiriyo da awere, nari he wa gu he i atumo na ni fu kpiahe; sangbakpotoyo yo ki biriko be he mbiko si rungbura.

⁸Ono riahe ambakada nga rimorani fu Mbori te. Watadu ka ani ari nga ha ya, ani gberẽ nga susi gu nadu mbata te, na ka ani ri he, ani angba nga susi gu nadu mbata te.

⁹Ono oni bánda tironi gi gaoni raniri ka du ni úkota re fu gu ni rungbura.

¹⁰Bambiko ka boro bi ro, wa du mo na inahe, mo nisungu ka ri riahe tii ga kpiahe yekaru yo, ka ni du rurungbura, sangba kpotoni yo angarã nga ka ri agu ahe i atumo na ni fu kpiaahe te?

¹¹Bambiko mbiko ga inahe gu ni du rurungbura ni ki ono, nga gu wirina Kristo akpi tipa ni.

¹²Were, oni ki ta inga kuti awirina, ki nigbarasi sangba kpotoyo yo ho si adu ni ni rurungbura ha, niingi kuti Kristo.

¹³Wa du he were tie, ka riahe kotosi wirinami, mi ari nga pasio fuo gere wa sa te, mi ka kotosa wirinami.