Read zande 2 AKorindo 10 Bible Online

2 AKorindo 10 - zande bible

2 AKorindo 10

¹Were mi Pauro nazungadi roni tigimi mbiko gu zera na bayee pai nga ga Kristo, mi nga gu ko du dagba roni yee wa du ani na oni, ono wa du mi ku sa yo mi ngarã koyo du oni ni gbe.

²Ii, mi zúngadi roni, ya ho mi ka du ni na oni ka mi ngarã nga ni gu nyaka mi naberã na ngarã na ni kuti agu yo, naberã pa rani wa ka ani ata ku sangba borose yo, ya.

³Mbiko ka ani vura ta rogo borose yo, ani aso nga vura wa du pa borose te.

⁴Bambiko a nga au gaani vura ni ga borose te, ono si du na tandu barangba Mbori rengbe na bafa nyanyaki agbata.

⁵Ani nabafa aberã, na gu irisiirisi apai dunduko i nakiisa ha kuti gu inahe nga ga Mbori, ki nizozogo aberã dunduko ni zizi he fu giasangba Kristo,

⁶niso gima mbusa agu yo nakeretu dunduko, ho gaoni giasangba ka rengba ni.

⁷Oni bí kina agu apai du barangba roni. Si ngia gu boro naya tigani, ni nga ga Kristo boro, ni baki bangirini ti gere berewe, ya, wa du ni ni ga Kristo boro, a wo du ani a.

⁸Bambiko ka mi vura sambua tire bakere tipa gu pai i aasia ha fu rani nga gu Gbia afu tipa dua roni ku ari, tipa bafa roni ku sande te, i aba nga zee ti re te.

⁹Ka si du nga bangirise wa mi akpi nyemu ka gundesi roni ni gimi keke apai ya.

¹⁰Bambiko, agu yo naya, “Gako keke apai du na tatamana nyanyaki, ono ngbanyako rurungbura, fugoko adu nga ni he te.”

¹¹Gu boro bérẽ gere re, ya, gu du ani ni rogo pai ni keke he ho du ani ni ku sa yo, kina na du ani ni namanga pai a ho du ani ni na oni.

¹²Bambiko ani aerã nga ka geda tirani watadu ringbisa tirani na agu yo nambakada rimoyo ni tiyo te; ono i tigayo, wa i naringbisa tiyo kina kuti tiyo, ki niringbisi tiyo ni sa yo, i zanga rugatinapai.

¹³Ono ani asambua nga tirani susi gu rengbe ani na ni te, ono ku sangba gu ringbisapai yo, nga gu Mbori afu fu rani ni bangbandaha, gu bangbandaha re ki da koyo du oni ni.

¹⁴Mbiko ani asusa nga bangbandaha, wa ka ani arengba nga ka ndu koyo du oni ni ya te; bambiko ani aye da koyo du oni ni rogo gu wene pangbanga yo nga ga Kristo.

¹⁵Ani asambua nga tirani susi gu rengbe ani na ni te, wa kuti ga kura aboro sunge. Ono ani namaa bangirani ya, wa gaoni idapase namaa pai, ani ki rengbe ka manga kura sunge ni bakere he susi dagba roni, ka ani asusa nga gu bangbanda Mbori aringbisi he fu rani ya.

¹⁶Ani ki rengbe ka tungusa wene pangbanga rogo agu arago du ku gii roni yo, ka ani asambua nga tirani rogo gu yo i aima ringbisa ha fu kura boro ya.

¹⁷Ono gu ni ka sambua he, ni sámbua gu pai Gbia amangi he.

¹⁸Mbiko a nga gu ni nambakada rimoni ni tini i ka ngba na ni te, ono gu ni Gbia ka mbakada rimoni.