Read zande 2 AKorindo 3 Bible Online

2 AKorindo 3 - zande bible

2 AKorindo 3

¹Ani natona ka mbakada rimorani ni tirani berewe? na zingo keke awaraga tipa mbakada rimorani, watadu fu roni na be roni, namanga rani wa si namanga agu yo?

²Oni nga gaani keke awaraga, du ni keke he kpotorani yo, aboro ki niini he ki nigedi he dunduko;

³wa du he ni binibangirise ya oni nga gu ga Kristo keke awaraga, ani naringbisa ha, i ake nga ha ni ime waraga te, ono ni gu Toro nga ga gu Mbori du ni ungako; ti kpasakpasa ambia te, ono ti gu he nga pasio kpotoboro yo.

⁴Ani nagumba pai were zukazuka bambiko ani nakida kuti Mbori nyanyaki rogo Kristo yo.

⁵Si arengba nga ani berẽ pa tirani ya ani rengbe na gi sunge re ni tirani wa sa te; ono gaani rengba na pai dũ be Mbori.

⁶Ko nga gu ko nasa rani ani rengbe na du ni amangipa vovo ndika; be keke arugute te, ono be toro. Bambiko keke arugute nafu kpio, ono toro nafu unga.

⁷Ono si ngia gu mangapase nangia ga kpio, du ni keke he ni gbakigbaki he ti ambia, aye na taarimo, wa ka awiri Yisaraere angana nga kpakpu Mose ya mbiko gu imarago nadu ti kpakpuko; nga gu nago ago:

⁸ngbatika ka gu mangapase nga ga toro du nga na taarimo te?

⁹Bambiko si ngia gu mangapase nga ga kitangbanga du na taarimo, ngbatika gu mangapase nga sa aboro ni ruru yo du na taarimo susi.

¹⁰Bambiko gu taarimo nadu mbata adu nga na taarimo kindi te, mbiko gu taarimo du awere du ni kikii he susi.

¹¹Mbiko si ngia gu nago ago adu na taarimo, gu nanye anye du rogo taarimo yo ki susi.

¹²Wa du ani na maabangirise wa gere tie ani nagumba gaani pai na zaza fugo,

¹³ka ani du nga wa Mose ya, namoi ũdada he ti kpakpuko, ya ka awiri aYisaraere ngana nga digida gu he nago ago ya.

¹⁴Ono i anyakasi riyo, bambiko dati boro gi rago re ho i nageda kuru ndika ni gu ũdada he re ki du kina ku ho kindi; gu ũdada he re i nadia ha ku sa yo rogo Kristo yo.

¹⁵Ono dati gi rago re, ho i nageda pa Mose ni údada he du kpotoyo yo.

¹⁶Ono ni gu rago i ka sa tiyo koyo du Gbia ni, i ki di údada he ku sa yo.

¹⁷Were Gbia nga Toro, ho du Toro Gbia ni yo du raniri ni.

¹⁸Ono ani dunduko, na kpakpurani ni dadidadi he te ani nayugo gu taarimo nga ga Gbia wa ngana, ani ki ye ka wira Gbia ti taarimo ku ri taarimo, a wa be Gbia, nga Toro, nafu he.