Read zande 2 AKorindo 8 Bible Online

2 AKorindo 8 - zande bible

2 AKorindo 8

¹Ku ri gere, awirina, ani nakpi nyemu oni ini waĩ ga Mbori undahe adu ni yuguyugu he fu akanisa Makedonia no.

²Gu bakere rungo i ahi he si aasadi yo gbe, ono rogo ho dunduko gayo ngbarago amoi pai susi, i ki niyugu tiyo ni weneringi yo gbe, ka i avura du na zingo ahe a vurũ.

³Bambiko, mi nga dezirehe, i afuku he ni sa yo ni tiyo, wa rengbe omeyo na ni, ii, susi omeyo a,

⁴nizungadi rani ni bakere zungaditi tipa gi undahe re na gu ngbanya du rogo manga pa ga Mbori aboro.

⁵Si adu nga wa gu ani amoi bangirani ti ni te, ono i afu tiyo fu Gbia mbata, na fu rani a wa Mbori akpi nyemu he.

⁶Wa si adu wa gere ani azúngadi Tito, ya wa ko atona gi pai re mbata, wo ka ko digisi pa gi undahe re rogo roni yo a.

⁷Ono wa oni namaa pai rogo apai yo dunduko, rogo idapase, na gumbapai, na inahe, na nyakatipai dunduko, na gaoni nyemuse tipa rani, oni bí he ya oni moi pai rogo gi undahe re yo a.

⁸Mi agumba nga ha wa rugute te, ono si yugu go gu rengo du ti gaoni nyemuse a rogo gu nyakatipai nga ga akurayo.

⁹Bambiko oni ini gu undahe nga ga gaani Gbia Yesu Kristo ya, ko avura du ni ira ũkumuko vurũ, ko asa tiko ni boro rungo tipa roni, ya oni ye ka du ni aira ũkumuko mbiko gako rungo.

¹⁰Mi fu sangbare tipa gi pai re a: bambiko gere ngba fu roni, nga agu yo natona ha ni bambata yo wa garã sa ku sa yo, kina manga ha sa te, ono nikpi nyemu he a.

¹¹Ono awere oni digisi pa manga ha a; ya wa oni adu zaza ti nyemu he, wo ka oni aigisi he a wa rengoe oni na ni.

¹²Bambiko si ngia gu ni du zaza rogo pa fu gamahe, Mbori aida pa gamahe be boro wa du pa agu ahe du be ni, kuti agu ahe adu nga be ni ya te.

¹³Mbiko mi agumba nga gere ya i akpurasi kura aboro ki rungosi roni te,

¹⁴ono tipa ringbisa pai. Wa ahe ange be roni wa du rago re, oni rengbe na gama ahe tipa gayo zingo ahe. Wa ka ahe nge be yo ku mbata yo, i ki rengbe ka gama ahe tipa gaoni zingo ahe a; apai ki rengbe dagba roni.

¹⁵Wa du he ni keke he “Gu ni narogodi he gbe, si anye nga be ni te; gu ni narogodi he ni umba ha zingo he amanga nga ni te.”

¹⁶Ono tambuahe du fu Mbori, namaa kina gi kakaka berã pa roni re ku kpoto Tito yo.

¹⁷Bambiko ko aida nga kina pa gaani zungaditi te; ono wa ko adu zaza tigako gbe, ko asia pa ndu koyo du oni ni ni tiko.

¹⁸Ani nakeda gu wirina na ko a nga gu ko pandeko namerẽ dagba akanisa yo dunduko tipa wene pangbanga.

¹⁹Kina gere sa te, ono ko nga gu ko akanisa aringbisi pa ko a ko nungu na ani tipa gi undahe re, nga gu ani namanga paha sa taasa rimo Gbia, na ka yugo gaani pa du zaza;

²⁰nine gi pai re, nga boro ka gbarasa rimorani tipa gi gamunihe re ani namanga paha.

²¹Mbiko ani nambakada gaani berã tipa irisiirisi apai, ku bangiri Gbia sa te, ono ku bangiri aboro a.

²²Ani ki kedi wirinarani na yo, nga gu ko ani aasadi ko ni dungu he ki bi he ya ko zaza rogo dungu apai yo, ono awere ko du zaza susi, mbiko pa gu inida pa roni du ti ko gbe.

²³Si ngia gu boro nasana he watadu tipa Tito, ko nga badiare nga gi badia sunge fu roni; na tipa awirinarani, i nga ga akanisa asunge, nga ga Kristo taarimo.

²⁴Oni yugu go gaoni nyemuse fu yo tie ku barangba akanisa, na go gaani sambuati tipa roni.