Read zande 2 AKorindo 9 Bible Online

2 AKorindo 9 - zande bible

2 AKorindo 9

¹Mbiko tipa manga pa ga Mbori aboro, zingo ke mi pai fu roni tipa ha amanga nga roni te.

²Bambiko mi ini gaoni du zaza nga gu mi nasambua tire tipa roni ti ni fu agu yo du Makedonia no, ya Akaya aima mbakada paha wa garã sa ku sa yo: gaoni nyaka awo ti agu yo ni dungu yo.

³Ono, mi kedi awirina, ya ka i sa nga gaani sambuati tipa roni ti gi pai re ni ku he ya; ya, wa mi agumba ha, oni mbákadi tironi.

⁴Si ka du, ka gu boro Makedonia ye na mi, ki bi roni ka oni ambakada nga tironi ya, zee ki mangi rani, na ka ani ya, roni mbiko gi sambuatise re.

⁵Si du gu pai angba bangire ti ni nga zúngadi awirina, i ndu mbata yo da koyo du oni ni, ki ringbisi gaoni gamunihe mbata nga gu oni aima kido he tipa ha, ya kina ha du ni mbakadimbakadi he, wa du pa gamunihe, wa dingisaro te.

⁶Ono ya mi wẽ, gu ni ka mi tunga toni ni Ke he a toni; gu ni ka mi tunga gbe, ni ke he a gbe

⁷Aboro dunduko i nimangi wa i akpi nyemu he kpotoyo yo, ni ngbaduse te, ni dingisaro a te. Bambiko Mbori nakpi nyemu kina gu boro nagama he esuesu.

⁸Mbori rengbe a na kiisa undahe dunduko fu roni; ya oni, wa du ahe be roni rengbe ti apai dunduko dedede, oni du zaza sa wene asunge dunduko;

⁹wa du he ni keke he. “Ko nagagama ahe yasika, ko nafuka ahe fu airazingohe; gako weneringise nye anye kindi.”

¹⁰Gu ko ninafuka tunga fu bamitunga, na bakinde tipa riahe, ko afúka gaoni tunga tipa mi he ki nikiisi he, ki nikiisi zuzu gaoni weneringise.

¹¹Oni ki du ni kumukosikumukosi roni rogo apai yo dunduko sa weneringise dú nga gu namanga tambuahe rogo rani yo fu Mbori.

¹²Bambiko pa ringbisa gi mangapase re ahisa nga kina gu zingoahe nga ga ga Mbori aboro sa te, ono si nakia akia a rogo fu dungu atambuahe yo fu Mbori;

¹³wa du oni na gi dezire re mbiko gaoni mangapase, dungu aboro atáasa rimo Mbori mbiko gaoni giasangba gbia kuti fugoroni rogo gu wene pangbanga nga ga Kristo, na tipa gu weneringise du ti gaoni fuka ahe fu yo na fu aboro dunduko;

¹⁴a wa i nakpi nyemu roni a tigayo, nizungadi he tipa roni, mbiko gu bakere undahe nga ga Mbori du ti roni susi.

¹⁵Tambuahe dú fu Mbori tipa gako gasigasi gamahe.