Read zande AGaratio 1 Bible Online

AGaratio 1 - zande bible

AGaratio 1

¹Pauro, mokedi ga aboro te, boro aasia nga paha fere te kina Yesu Kristo, na Mbori nga Ba, gu ko nazingisi ko dagba akangba,

²na agu awirina du na mi, Fu agu akanisa du Garatia yo:

³Undahe dú na oni na zereda be Mbori nga Ba, na gaani Gbia Yesu Kristo,

⁴nga gu ko nafu tiko tipa gaani gbegberẽapai, ko batasi rani be gi gbegberẽ zegino re, a wa Mbori akpi nyemu he nga Barani.

⁵Taarimo dú fu ko nye anye kindi. Amina.

⁶Si nairiwo ti re were wa oni naguari ni ipo pati gu ko nayambu roni rogo ga Kristo undahe sa gu kura pangbanga akia;

⁷nga kura pangbanga nga ha te. Ono agu yo du ho nafuda roni, nikpi nyemu ka sa gu wene pangbanga nga ga Kristo.

⁸Ono ka ani tungusi pangbanga akia ti gu ani aima tungusa fu roni, na maraika ngbangbaturũ yo a, i tiwa ni atiwa!

⁹A wa ani agumba ha mbata, kina wo ya mi berewe, Ka boro atungusa kura pangbanga fu roni akia ti gu oni aima zia ha mbata i tiwa ni atiwa!

¹⁰Bambiko watadu aboro, na Mbori, da mi azúngadi ni awere? mi nagbata pai ka ngba na ni bangiri aboro? ka mi angba angba ti aboro kindi, mi adu nga ni ga Kristo moyambu te.

¹¹Bambiko mi nayugo pai fu roni, awirina, tipa gu wene pangbanga mi atungusi, ya si wa ga boro te.

¹²Bambiko mi adia nga ha be boro te, i ayugo nga ha ayugo fere a te, mi aini he kina be ga Yesu Kristo yugoti.

¹³Bambiko oni agi pa agu apai mi anamanga mbata rogo ga aYudo dini yo, wa mi anarungosi ga Mbori akanisa susi, ki niasadi ka nyasa ha.

¹⁴Mi ki susi agu yo asusa ni dungu yo garãyo arengbe na gimi dagba ngbatungarani rogo ga aYudo dini yo, bambiko nyemu ga abuba pai anamanga re amanga kakaka susi yo.

¹⁵Ono ho Mbori akpi nyemu yugo Wiriko ni fere, gu ko nakpara re, kina vuru nina yo, ki yambu re ni gako undahe,

¹⁶mi nitungusi pa ko dagba aGendiria; ni ba sa mi asaka nga paha na agu yo nga aboro te.

¹⁷Mi andu nga ku Yerusarema yo koyo du agu yo ni nadu ni amokedi mbata fere a te, ono mi andu ku Araba yo; mi ki karaga tire ku Damaseke yo berewe.

¹⁸Garã ki du biata mi ki ndu tie ku Yerusarema yo ka bi Kefa nga Petero, mi ki raki koyo du ko ni bawe na bisue.

¹⁹Ono mi abi nga kura amokedi te, kina Yakoba sa, nga wirina Gbia.

²⁰Were agu apai mi ake fu roni re, oni ngére, ku bangiri Mbori, mi agumba nga ha ni zire te.

²¹Mi ki ye tie ku rogo agu aringara nga Suria na Kirikia.

²²Agu akanisa du rogo Kristo yo Yuda vo i ata ina nga re ni bangiriyo te;

²³ono i agi kina gu pai nga, “Gu ko naarungosi rani mbata, ko natungusa pa gu idapase ko agbarasi he mbata awere.”

²⁴I ki taasi rimo Mbori mbiko re.