Read zande AGaratio 4 Bible Online

AGaratio 4 - zande bible

AGaratio 4

¹Were ya mi wẽ wa dikumbo nidu ni gude, ni nadu nga akia ti kanga te, ka ni vura du ni iraahe dũ;

²ono abambutini nizogo ni azoga na aburuku, da kina ti gu rago bani aringbisi.

³Wo du ani a, ho ani adu ni ni agude, ani adu ni akanga fu gu tata apai nga ga zegino.

⁴Ono ho rago ada ni wa i aringbisi he, Mbori ki kedi Wiriko, de avungu ko, i avungu ko ku tii rugute,

⁵ko tumo agu yo nadu tii rugute, i rogo rani ni awiri.

⁶Wa du oni ni awiri, si du Mbori akedi gu Toro ti ni nga ga Wiriko ku kpotorani yo, ko nikpari ya, “Aba! Buba!”

⁷Si ki ta du wa gere ka mo adu nga ni kanga berewe ya, mo ki du ni kina wiri; ka mo du ni wiri, dikumbo nga mo tie mbiko Mbori.

⁸Ono ni gu rago, wa oni aina nga Mbori ya, oni adu ni akanga fu agu yo adu nga ni ambori ya;

⁹ono awere oni naye ki ini Mbori. Mbori naini roni kina ha dú, wiri oni pa sa tironi berewe wãi fu gu kungba tata apai adu nga na ome ya, nga gu oni akpi nyemu ka du ni akanga fu he berewe?

¹⁰Oni naka kuti pa auru, na adiwi na regbo ahe na agarã!

¹¹Mi nagunde agunde tipa roni, gu pai mangi mi fu roni si ka du adu gbua.

¹²Mi nazungadi roni azungadi, awirina, oni du wa kina re, bambiko mi wa kina roni. Oni amanga nga gbegberẽpai ti re te;

¹³ono oni ini aina ya mi atungusi wene pangbanga fu roni ni bambata ha mbiko kaza kpotore.

¹⁴Gu he nadu ni asada re ti kpotore fu roni oni aora nga be he te, oni aba nga sure ti ni a te; ono oni adi re adia ku gume wa kina ga Mbori maraika, wa kina Kristo Yesu.

¹⁵Wari du gu sambua tironi ni re tie? bambiko mi nga dezireroni, ya, ka oni amangi wo, ka oni arogo bangironi ki fu he fere.

¹⁶Were vuraroni nga mi tie, bambiko mi nagumba rengo fu roni?

¹⁷I nazomia roni, i azomia nga roni sa wene pai te; oó, i nakpi nyemu kusa roni akusa ku sa yo, oni zomia yo azomia.

¹⁸Si ngba i nizomia roni azomia sa wene pai dedede, kina ni gu rago ani ka nidu ni na oni te.

¹⁹Rukutu awire, mi naima aima be roni berewe da kina ho Kristo ka du ni rogo roni yo,

²⁰ii, mi nakpi nyemu ka du na oni awere, ki sa fugore; bambiko mi naba bangire aba ti roni.

²¹Oni gúmba ha ke fere, agu roni nakpi nyemu ka du tii rugute, oni agia nga pa rugute te?

²²Bambiko si ni keke he ya, Abarayama adu na awiriko ue, gu ko ki du sa be kanga, gu ko ki du be gu de nga ndikidi nairakporo.

²³Ono gu ko nadu be kanga i avungu ko wa du pa aboro; gu ko nadu be gu de nga nairakporo i avungu ko mbiko mokido.

²⁴Agi apai re sanza ti ni; bambiko agi ade re i nga ndika ue; gu sa naenge ri gu bagangara nga Sinai, navunga awirihe i du ni akanga, nga Agara.

²⁵Were gi Agara re, nga gu bagangara nga Sinai, du Araba yo, rengbe na kina gu Yerusarema du awere: du ni zogozogo ho na awirihe.

²⁶Ono gu Yerusarema du ari yo ra ha ara ni rihe, nga narani.

²⁷Bambiko si ni keke he, ya, “Rago ngbá angba ti ro, irazangada naavunga nga ya; mo ríkita na kpe, mo naaima nga be vungu ya: bambiko awiri devurukporo ninge ti awiri gu de di kumba.”

²⁸Were awirina, ani nga awiri mokido, a wa Yisaka adu.

²⁹Ono wa si adu ni gu rago re, gu ko i avungu ko wa du pa borose naamanga gu ko i avungu ko wa du pa Toro, wo du he awere a.

³⁰Ono Ziazia Kekeapai naya waĩ? ya, “Mo dó wiri kanga ku sa yo na wiriri, bambiko wiri kanga adia nga kumbo na wiri gu de nga nairakporo te.”

³¹Si du, awirina, adu nga ani ti ni ni awiri kanga ya, du ani ti ni ni kina awiri gu de nga nairakporo.