Read zande AGaratio 5 Bible Online

AGaratio 5 - zande bible

AGaratio 5

¹Raniri Kristo akusi rani ani ra ni rirani; oni rú nyanyaki mbiko ho, ka oni dú nga ni zizi roni berewe na gonga akanga ya.

²Oni ngére, mi, Pauro, ya mi fu roni, ka i yere roni, Kristo asongoda nga roni te.

³Ii, mi nagumba ha agumba berewe fu gu boro yere yo ni, ya ni nga ga rugute borobape ka manga ha dunduko.

⁴Agu roni nakpi nyemu i sapu ngbanga fu roni mbiko rugute, oni kpara ti Kristo; oni tiwi pati undahe.

⁵Ono ani nasunga ka ngera Mbori sa rani ni ruru rani be Toro mbiko idapase.

⁶Mbiko rogo Kristo Yesu yo pai ti yeratise te, pai ti zangayeratise a te; kina gu idapase nadu mbiko nyemuse.

⁷Oni aoro wenengãi; da naza roni ya ka oni gi nga sangba rengo ya?

⁸Gi zungaditi re si aye nga yo du gu ko ni nayamba roni te.

⁹Agbooro ni umba ra ki ndu andu rogo kpokuta dunduko.

¹⁰Mi ini pa roni aina mbiko Gbia, ya oni aberã nga pai akia te. Ono gu ni nafuda roni ni ahi sapangbanga, ka ni vura du adu ni gu boro vurũ.

¹¹Mi tigimi, awirina, ka mi atungusa pa yeratise kindi were, tipagine i narungosi re ti ni? gu pai ka akpakara ti pa wagiwagi ngua ka si go ago kusa.

¹²Agu yo nafuda roni ka i agbunda tiyo si ka ngba ti re a!

¹³Bambiko oni, awirina, i ayambu roni sa raniri; ono ka oni sá nga gaoni raniri sa peka pa borose ya; kina manga pa akuaroni dagba roni mbiko nyemuse.

¹⁴Bambiko digida rugute nga kina gi pai sa re, nga; “Mo nikpí nyemu akuaro akpi wa mo akpi nyemu tiro.”

¹⁵Ono ka oni arunduka tironi ni riti tironi, oni bánda tironi oni ka nyasa tironi anyasa.

¹⁶Ono ya mi, oni péke Toro, ka oni amánga nga gu nyemuhe nga ga borose ya.

¹⁷Bambiko borose naso vura aso na Toro, Toro ki niso vura aso na borose; agi ahe re kparaka ha akparaka; si du ka oni amanga nga agu apai ti ni oni akpi nyemu he ya.

¹⁸Ono ka Toro ngbe fu roni mbata yo, oni adu nga tii rugute te.

¹⁹Were agu apai borose amanga binibangirise du, nga, bari, na pa meteka, na wasiro,

²⁰na irisa kpiaahe, na soroka, na asogote, na kpata, na aringo, na azinga, na kpika pai, na kparaka, na kparakpara pai,

²¹na kpiboro, na kpibuda, na do pumbo gbarakagbaraka, na tunga agi apai re: mi naringbisa pa agi apai re fu roni, a wa mi aringbisi he mbata fu roni, ya agu yo namanga tunga agi apai re, i adia nga gu ũkumbo nga ga ga Mbori ngbi te.

²²Ono zuzu Toro nga nyemuse, na ngbarago, na zereda, na hipai, na mangapase, na weneringise, na du ngangarã,

²³na zera, rugatise; rugute ho tipa gere wa sa te.

²⁴Agu yo nga ga Kristo Yesu yo i awagi borose na gaha apai na gaha nyemuahe.

²⁵Ka ngia ani ni ungarani mbiko Toro, ani nindu andu mbiko Toro.

²⁶Ka ani mángi nga ruka, ka zingisa tirani, ka kpi tirani ya.