Read zande AGaratio 6 Bible Online

AGaratio 6 - zande bible

AGaratio 6

¹Awirina, ka i vura zia boro na ingapai, oni nga ga Toro aboro, oni ki songodi ni asongoda ni zera; mo nibí tiro i ka asada ro a.

²Oni tíndi ga akuaroni tindiro atinda, si oni ka digisa ga Kristo rugute ti ni.

³Bambiko ka boro aberã pa tini, ya he a nga u, ka ni adu nga ni he ya, si wa ni nananga tini ananga.

⁴Ono boro niásadi kina gani sunge, ni nikadu na gu pai ka ni tambua tini mbiko kina ha sa, mbiko kurani te.

⁵Bambiko boro nakpida kina gani pai.

⁶Gu ni i ayugo pa pai ayugo fu ni ni nigamu ngbatunga wene ahe agama dunduko fu gu ni nayugo pai.

⁷Ka i nángi nga roni ya; i asawia nga Mbori te, bambiko gu he rũ boro kina ha ke ni a.

⁸Bambiko gu ni narú he fu kina boroni ni aké zirã ake be borose; ono gu ni narú he fu Toro ni aké nyenye unga be Toro.

⁹Ka ani mbú nga be manga rurupai ya, bambiko ka he amáka nga rani ya ani aké ahe ho regboho ka da ni.

¹⁰Were, momu nimángi rani tie, ani ki mangi gu pai amanga ngba angba fu aboro dunduko, fu kina agu yo gbe du ku idapase yo.

¹¹Oni bí nga gu kikindigi keke apai mi ake fu roni ni kina bere re.

¹²Agu yo dunduko nakpi nyemu mbakada payo ku bangirise ni boroyo, i nasosoda roni asosoda i yere roni; ya ka i rungosi nga yo mbiko ga Kristo wagiwagi ngua ya.

¹³Agu yo nga ayeretise i aka nga kuti rugute ti gayo a te; ono i nakpi nyemu yera roni i sambua tiyo ni bororoni.

¹⁴Ono tipa re tigimi mi asambua tire kina mbiko gu wagiwagi ngua nga ga gaani Gbia Yesu Kristo, nga gu i awagi zegino ti ni fere, ki wagi re fu zegino.

¹⁵Bambiko pai ti yeratise te, pai ti zangayeratise a te, kina du ni vovo fufu boro.

¹⁶Agu yo dunduko nata ti gi pai re, zereda du fu yo na inapai, ki du fu ga Mbori Yisaraere.

¹⁷Ka boro fúdi nga re fuo gi berewe re ya; bambiko fuo Yesu du ti kpotore.

¹⁸Gu undahe nga ga gaani Gbia Yesu Kristo si dú na tororoni, awirina. Amina.