Read zande AEfeso 2 Bible Online

AEfeso 2 - zande bible

AEfeso 2

¹Oni ko aungasi roni ho oni akpiki ni mbiko gaoni tiandika na ingapai,

²gu oni anata rogo mbata ku sangba sino gi zegino yo re, ku sangba gu bakindo yo du na tandu yuge, nga gu toro namanga pai awere rogo agu awiri yo nakeretu.

³I ani adu ni ungarani dagba yo yo dunduko a mbata na gu nyemuhe nga ga bororani, nimangi agu apai ngba ti borose na berã. Ani ki du ni awiri zinga mbiko sino wa kina agu yo dunduko.

⁴Ono Mbori, nakumuko ni inapai, mbiko gu gako bakere nyemuse ko akpi nyemu rani ni,

⁵zavura ho ani akpi ni mbiko gaani tiandika, ko amongo ungasi rani na Kristo (bati oni mbiko undahe),

⁶ki zingisi rani na ko, ki ya ani sungu na ko rogo agu arago du ngbangbaturũ yo, rogo Kristo Yesu yo,

⁷ya ko yugu gu babakere kumuko du ti gako undahe ni weneringise fu rani rogo Kristo Yesu ni agu arago nikaye.

⁸Bambiko oni abati mbiko undahe mbiko idapase; mbiko roni tigaoni te, ga Mbori gamunihe du;

⁹mbiko mangaapai te, gu boro ka abia tini.

¹⁰Bambiko ani nga ũ beko, ko afu rani ku rogo Kristo Yesu yo sa gu wene mangaapai Mbori aima mbakada mbata ani ta rogo ho.

¹¹Si du oni tingidi gu pai nga, mbata oni, nga aGendiria ti pa borose, agu yo i niya ti yo Ayeretise niya ti roni Azangayeratise, nga gu du ti borose, i namanga ha ni be;

¹²oni akpara akpara na Kristo ni gu rago re, ki du wa auro ti gu ngbanya nga ga ngbatunga aYisaraere ki du wa auro ti agu andika nga ga kidohe. Oni adu nga na maabangirise te, ki zanga Mbori zegino.

¹³Ono awere rogo Kristo Yesu yo agu roni naturũ aturã mbata i mbedisi roni ni kure Kristo.

¹⁴Bambiko ko nga gaani zereda, ko namongo kodi yo akoda sa, ki kiti ndugu bangbanda.

¹⁵Ko nagbarasi vura ni boroko, nga gu rundika nga ga pa rugute du rogo andika yo; ko fu vovo boro sa ti aboro ue rogo ko yo, ki fu zereda.

¹⁶Ko ki zeresi yo ue ni boro sa fu Mbori mbiko wagiwagi ngua, imi ko vura mbiko ho.

¹⁷Ko ki ye a ki nitungusi pa zereda fu agu roni nadu tuturu, na fu agu yo nadu mbembedi.

¹⁸Bambiko ani mongo du na gaani gene rogo kina gu Toro yo sa koyo du Ba ni mbiko ko.

¹⁹Si du adu nga oni ti ni ni aboro kura aringara ni nungunungu aboro berewe ya, ono oni nga aboro bakporo sa na ga Mbori aboro, ki du ni aboro ku Mbori.

²⁰I dua roni ri gu mburuhe nga gu amokedi amoi he na anebi, Kristo Yesu nga bakumba mbia tukpu he ni tiko.

²¹Duadua ha dunduko si kpamia tihe nzunzu kina rogo ko yo, ki nisono sa ziazia yekaru rogo Gbia yo.

²²I dua roni wa sa rogo ko yo a ni banye fu Mbori rogo Toro yo.