Read zande AEfeso 3 Bible Online

AEfeso 3 - zande bible

AEfeso 3

¹Bambiko gere, mi nga Pauro, nga ga Kristo Yesu kisikisi boro tipa roni nga aGendiria―

²si ngia oni gi pa gu mangapai Mbori afu he fere mbiko gako undahe, tipa roni;

³wa ko ayugu gu gbugbu pai fere ni yugoti, wa ke mi he mbata ni guruguru apai.

⁴Oni ya gedi he, oni ini gi rugati na gu gbugbu pai nga ga Kristo;

⁵gu i ayugo nga ha fu wiri aboro ni kura arago, wa du he ni yuguyugu he awere fu gako ziazia amokedi na anebi rogo Toro yo ya.

⁶Si nga aGendiria nga adikumbo a, na apa boroko, na adikidohe rogo Kristo Yesu yo mbiko wene pangbanga.

⁷Si i amoi re ni ni moyambu, ku sangba gu gamunihe yo nga gu ga Mbori undahe i afu fere ku sangba gu mangapai yo nga ga gako tandu.

⁸Wa pa re umba aumba susi kura ga Mbori aboro dũ, ono Mbori afu gi undahe fere re, mi tungusi pa gu gasigasi ũkumuko nga ga Kristo fu aGendiria;

⁹ki ya aboro bi gu he nga manga gu gbugbu pai i naaoka aoka rogo Mbori yo kina yo rago aenge ni, gu ko nafu ahe dũ;

¹⁰sa yugo gu baru tatamana nga ga Mbori awere mbiko kanisa fu azogoaboro na aasiapapai rogo agu arago du ngbangbaturũ yo.

¹¹Gere adu ku sangba gu nyenye berã yo ko aberẽ rogo Kristo Yesu yo nga gaani Gbia.

¹²Ko du ani rogo ko yo zukazuka na gene ni nyanyaki idapase mbiko ida ani pa ko.

¹³Si du mi akpara ti ni ya ka oni zére nga be gi rungo tipa roni ya, si nga gaoni taarimo.

¹⁴Bambiko gere mi akuka ti ni fu Ba,

¹⁵ko yambu rimo vungu aenge yo du ko ni dunduko ngbangbaturũ yo na rogo kpoto sende,

¹⁶ko ídi fu roni, ku sangba gu ũkumuko yo nga ga gako taarimo, ya oni nyaki ni tandu be gako Toro kpoto yo.

¹⁷Kristo nyé kpotoroni yo mbiko idapase; oni ta dú na nduroni nyanyaki ni duadua roni rogo nyemuse yo.

¹⁸Oni ki ninyaki anyaka ka ruga tironi na gu he nga pati gu ga Kristo nyemuse nasusi inahe na bagizaha, na basonaha na badunguraha,

¹⁹ki ini he, na ga Mbori aboro dunduko, oni hi ahi ni ga Mbori hibepai.

²⁰Were, fu gu ko ka mangi pai amanga bakere gbe si ki moi pai susi gu ani aõ na gu ani aberã dunduko, ku sangba gu tandu yo namanga pai kpotorani yo,

²¹ko dú taarimo fu ko rogo kanisa na rogo Kristo Yesu yo rogo arago dũ nye anye kindi. Amina.