Read zande AEfeso 5 Bible Online

AEfeso 5 - zande bible

AEfeso 5

¹Si du ka oni wíriki Mbori ti ni, wa du oni ni awiri manguse.

²Oni ki nita rogo nyemuse yo, a wa Kristo akpi nyemu roni a, ki fu tiko tipa rani, niru he ni motumo fu Mbori ni gu fuõhe nga guzuguzu fuõhe.

³Ono bari, na pa meteka dũ, na kpihe, ka oni yámbu nga rimoho dagba roni wa sa ya, ni sino ga Mbori aboro;

⁴na wasiro, na mumungo fugo, na reogbo du na zee, are nga ya; kina tambuahe.

⁵Bambiko oni ini gere ni rengo ya, a nga irabari sa, na boro meteka, na irakpihe du ni irisi kpiahe, ka di ũkumbo rogo gu ngbi yo nga ga Kristo na ga Mbori te.

⁶Ka boro nángi nga roni ni kungba pai wa sa ya, bambiko mbiko agi apai re ga Mbori zinga naye ti ni ku ri awiri basapai.

⁷Si du ka oni angbé nga ti ni na yo ya;

⁸bambiko oni adu mbata ni bitimo, ono awere oni nga imarago rogo Gbia. Oni niráki wa awiri imarago

⁹(bambiko zuzu imarago du rogo wenepai yo dunduko na rurupai na rengo).

¹⁰Oni nikpária pa gu he ngba ti Gbia;

¹¹ka oni ngbá nga na gu mangaapai zanga zu nga ga bitimo ya, kina ruga ha.

¹²Bambiko agu apai i nimangi ni gbuko zee nga gumba pa ha.

¹³Ono agu apai dunduko i nirugu yo ti ni ni gu rago imarago niyugu he, bambiko gu pai dunduko du ni yuguyugu he si nga imarago.

¹⁴Si du ya ko ti ni, “Mo nara, mo zingi, ki zingi be kpio dagba kangba aboro, Kristo ki hasi rago ri ro.”

¹⁵Si du ka oni angéra angera wenengaĩ ti ni wa oni nata, wa zanga tatamana te, wa kina iratatamana.

¹⁶Oni ki banda gaoni saa tipa manga apai, bambiko rago gbegberẽ.

¹⁷Si du ka oni adú nga ti ni mumungo ya, kina ruga tironi na gu he Gbia akpi nyemu he.

¹⁸Ka oni kpí nga imekakue ya, si du bau rogo, ono oni hí be kina Toro.

¹⁹Oni ki nifu na akuaroni rogo abia tambuahe yo na abia wasa na agu abia Toro nayugo, nibí he dodoroma kpotoroni yo fu Gbia.

²⁰Oni ki nitambua Mbori nga Ba waragoagira tipa ahe dunduko ni rimo gaani Gbia Yesu Kristo.

²¹Oni rá ara fu akuaroni ni gunde Kristo.

²²Dere akumba, oni nirá ara fu akumbaroni, wa fu Gbia.

²³Bambiko kumbani nga rini, a wa du Kristo ni ri kánisa, du ni tiko ni batasi kanisa nga boroko.

²⁴Ono wa ra kanisa fu Kristo, dere akumba rá a wo fu akumbayo ti apai dunduko.

²⁵Akumba, oni kpí nyemu adiaroni, a wa Kristo akpi nyemu kanisa a, ki fu tiko tipa ha.

²⁶Ko naziasi he, ko nagirisi he ni gu zundahe nga ga ime na pai,

²⁷ko fu kanisa fu tiko ni taataa kanisa, ka wiri he adu nga ti ni na ngbandua na ngbatunga gu he wa sa ya; kina du he adu ziazia ki zanga sirõ.

²⁸Kina wo ka akumba kpi nyemu adiayo a wa boroyo. Gu ni nakpi nyemu diani ni nakpi nyemu tini.

²⁹Bambiko a nga boro sa nasoga boroni te, kina mbu ti ni na banda ha, wa kina Kristo na kanisa a;

³⁰bambiko ani nga apa boroko.

³¹Bambiko gere boro nihe abani ti ni na nani, ki ka kuti diani; i ue ki du adu ni borose sa.

³²Gi nga bagasigasi pai re; ono mi nagumba ha tipa Kristo na tipa kanisa.

³³Gu ni nikpí nyemu diani wa du oni ni ba sa sa, wa kina tini; dia boro nigunde agunde ti kumbani.