Read zande AEfeso 6 Bible Online

AEfeso 6 - zande bible

AEfeso 6

¹Agude, oni gí sangba avunguroni agia rogo Gbia, bambiko gi ru re.

²“Mo irisi bamo na namo” (si nga bambata rugute na kidohe),

³“mo ki du adu wenengaĩ, mo ki ima aima gbe ri kpotosende.”

⁴Oni, aba, ka oni wí nga ngba awironi i zingi ya, kina mbu ti yo ni ga Gbia rabahe na rugahe.

⁵Akanga, oni gí sangba agu yo agia du ku sangba borose yo ni abairaroni ni gunde na kio, nimangi sunge na ruru ngbaduroni yo wa fu Kristo.

⁶Mangapai ku bangirise, si angba nga ti aboro te; kina du wa ga Kristo akanga, nimangi gu pai Mbori akpi nyemu he kpoto yo;

⁷nimangi pai ni wene nyemu he wa fu Gbia, fu boro te.

⁸Oni íni he ya gu wene pai boro nimangi, kina ha ni ka dia be Gbia, watadu ni ni kanga na ni raniri ni.

⁹Oni abaira, oni nimángi kina ha fu yo, ki mbu serekpohe, niini ya Bairayo du ngba ngbaturú yo nga Bairaroni a, kpara aboro ti ko te.

¹⁰Yangara ha nga, oni nyáki anyaka rogo Gbia, na rogo gu ome nga ga gako tandu.

¹¹Oni úkadi ga Mbori úvura dunduko oni ki rengbe ka ru aru sa ga bakitingbanga birĩ.

¹²Bambiko gaani kenahe sa borose na kure te kina sa angbi, sa atandu, sa azogo zegino nga ga gi bitimo re, sa rimbasa agu atoro nga ga gbegberẽpai yo rogo agu arago du ngbangbaturũ yo.

¹³Si du ka oni dí ga Mbori úvura ti ni dunduko, ka nyaka anyaka rogo gbegberẽ uru, si nyasi dunduko, oni ki ru aru.

¹⁴Si du ka oni rú ti ni, oni navo rengo dimoroni, ki ukadi marã ngbaduse nga rurupai,

¹⁵oni navodi nduroni ni gu únyaka nga ga wene pangbanga zereda.

¹⁶Oni rogo vurakube nga idapase ku ri he a oni ki rengbe ka bisa gu siida we nga ga gbegberẽ ko na ni.

¹⁷Oni ki rogo kpakpari bata, na gu basape nga ga Toro, nga sangba Mbori.

¹⁸Oni ki nikpari akpara kindi ni akpe na sarawati dú rogo Toro yo, ningere angera sa gere ni kenahe na sarawati tipa ga Mbori aboro dunduko.

¹⁹Oni kpári tipa re a, ya i fu fugo fere mi za ngbare, mi yugu gu gbugbu pai nga ga wene pangbanga zukazuka,

²⁰si du mi tipa ha ni sunge ni vodivodi re na azogbo; mi gumba pai rogo ho zukazuka nga gu ka mi gumba.

²¹Ono oni ini gimi apai aina a, wa mi naamanga, Tukiko nga wirina du nyemuko ti rani nga irarengo moyambu rogo Gbia, ko ayúgo apai fu roni dunduko.

²²Ko kedi mi ko fu roni tipa gi pai re, nga oni ini gaani pai, ko ngarasi kpotoroni yo.

²³Zereda dú fu awirina na nyemuse na idapase, yo du Mbori ni nga Ba na Gbia Yesu Kristo.

²⁴Undahe dú na agu yo dunduko nakpi nyemu gaani Gbia Yesu Kristo ziazia.