Read zande AFiripoio 1 Bible Online

AFiripoio 1 - zande bible

AFiripoio 1

¹APauro na Timoteo, ga Kristo Yesu amoyambu. Fu ga Mbori aboro dunduko du rogo Kristo Yesu yo Firipoi yo, na fu ababipai na adiakona.

²Undahe dú fu roni na zereda be Mbori Barani na Gbia Yesu Kristo.

³Mi natambua gi Mbori ni gu rago mi nitingidi pa roni,

⁴nizungadi he tipa roni dunduko rogo gi zungaditi aedede, nizungadi he na ngbarago,

⁵mbiko gaoni ngbanya rogo pa gbandaka wene pangbanga, tona ti gu bambata uru re daku awere.

⁶Mi ini gi pai re gbe, ya gu ko natona wene pai rogo roni yo ko anyása ha ziazia dati rago Yesu Kristo.

⁷A wa ru he fere ka berã pa roni wa gere dunduko, bambiko pa roni du kpotore yo, bambiko rogo gimi azogbo ani sa na oni dunduko ki nidi undahe, na rogo pa banda wene pangbanga na pa nyakasa ha.

⁸Bambiko Mbori nga dezirere ya mi nakpi nyemu roni gbe rogo gu weneringise nga ga Kristo Yesu dunduko.

⁹Mi nakpara tipa gi pai re ya gaoni nyemuse moi pai ki susi asusa gbe rogo inahe na pa kparia pai dũ.

¹⁰Si du oni ka ida pa agu apai ti ni nangba; oni ki du ziazia ki zanga gu pai ka i rugu roni kuti ni dati rago Kristo.

¹¹Oni ki nihi ahi be gu zuzuhe nga ga rurupai, nga gu du mbiko Yesu Kristo, sa ga Mbori taarimo na tambuahe.

¹²Awere awirina mi nakpi nyemu oni ini he ya agu apai namangi re si andu sa kina turũsa wene pangbanga ku mbata yo.

¹³Si du du gimi azogbo ni yuguyugu he ti ni rogo Kristo fu ababanda bambu bazogo yo, na fu akura yo dunduko.

¹⁴Agu awirina du rogo Gbia yo i nagumba pa Mbori zukazuka gbe ni dungu yo zanga gunde, ki du zaza mbiko gimi azogbo.

¹⁵Agu yo natungusa pa Kristo tigu ni kina kpi he na vura; agu yo ni weneringiyo a.

¹⁶Agu yo namanga ha mbiko nyemuse, ki niini ya mi naru tipa banda pa wene pangbanga.

¹⁷Ono akura yo natungusa pa Kristo ni vura, ni wia, niberẽ pa kusa rungosi fere rogo gimi azogbo.

¹⁸Si wãi tie? Kina gu ka i tungusi pa Kristo dedede, watadu ni wia, na ni rengo, mi nangi mbiko ho; ii, mi angi angi a.

¹⁹Bambiko mi ini he ya gere nikasa tihe ni gi bata rogo gaoni zungadihe na rogo Toro Yesu Kristo i afu ko fere,

²⁰wa du gi yososo sogima ti ni na maabangirise, ya zee amánga nga re rogo pai sa te, ono wa si adu mbata si du adu kina wo awere, watadu unga na kpio, mi akíisa pa Kristo zukazuka rogo kpotore.

²¹Bambiko du mi ni ungare, si nga Kristo fere, na ka mi kpi, kina kumuko nga ha.

²²Ono si ngia ka du ni unga rogo borose, ka ngia gere nikakusa zuzu sunge, mi aina nga gu mi ka sia ha tie te.

²³Bambiko mi du dagba apai ue, nikpi nyemu ka ga ka du na Kristo; gu ngba gbe susi.

²⁴Ono ka nye ni ungare si ngba susi tipa roni.

²⁵Wa ini mi gere gbe, mi ini he ya mi anyé, ii, mi anyé na oni du, tipa gaoni maapai na ngbarago rogo idapase;

²⁶gaoni taarimo moi pai gbe rogo Kristo Yesu rogo re yo mbiko mi adu na oni berewe.

²⁷Ono gaoni raka si ré are na ga Kristo wene pangbanga. Si du, watadu ye mi ka bi roni na ka mi adu nga koyo ya, mi ka gia pa gaoni apai ya oni ru nyanyaki na toro sa, na berã sa, nimongo ru tipa gu idapase du ti wene pangbanga.

²⁸A nga he sa ka gundesi roni be avuraroni te, gere adu fu yo ni yuguyugu he ya i nandu sa kpio, na fu roni ya oni nandu sa bata, gu bata naye be Mbori.

²⁹Bambiko i aidi he fu roni tipa Kristo kina ida pa ko sa te, ono hi pai a tipa ko;

³⁰ki du na gu vura tigaoni bi oni be re, a wa gi oni he awere ya si namanga re.