Read zande AFiripoio 2 Bible Online

AFiripoio 2 - zande bible

AFiripoio 2

¹Si ngia wasa nadu rogo Kristo yo tie, si ngia gu wasa nga ga nyemuse, si ngia gu ngbanya nga ga Ziazia Toro, si ngia nunga na weneringise,

²oni hísi gi ngbarago, oni ki du na berã sa, na nyemuse sa, ki sungu wa sa, na berã sa.

³Ka oni mángi nga pai na vura na ruka wa sa ya, ono gu ni bérẽ pa kura ni rogo umbasi gani berã ya ni ngba susi ni.

⁴Ka oni bérẽ nga pa kina gaoni pai ya, ono oni bérẽ pa ga akuaroni apai.

⁵Oni dú na gi berã rogo roni yo re, nadu rogo Kristo Yesu yo a,

⁶ko, wa ko adu ni kina Mbori; rengba ko na Mbori adu nga bangiriko ni mosoro te,

⁷ono ko auka pa tiko ki du wa kina kanga, ki du wa boro;

⁸pa bi ko adu wa pa boro. Ko ki umbasi tiko, nigi sangba dati kpio, ii, nga kina gu kpio nga ga wagiwagi ngua.

⁹Si du Mbori akiisi pako ti ni a gbe, ki fu gu rimo fu ko zogo arimo dú;

¹⁰ya arukusue ninugadi ni rimo Yesu dunduko, agu ahe du ngbangbaturũ yo, agu ahe du auru kpotosende na agu ahe du tii kpotosende yo,

¹¹ya mirãahe ka kusa ha dunduko ya Yesu Kristo nga Gbia, sa ga Mbori taarimo nga Ba.

¹²Wo du he tie, amangure, wa oni agi sangbare dedede kina ho du ani ni na oni sa te ono awere oni gí he susi kindi wa adu nga mi na oni ya, oni mangi pa gaoni bata tigaoni ni gunde na kio;

¹³bambiko Mbori nga gu ko namanga pai rogo roni yo, sa ida pai na manga ha mbiko wene sangbako.

¹⁴Oni mángi apai dunduko zanga kpakanahe na darãpai,

¹⁵oni ki zanga sirõ ki du na zera, wa awiri Mbori, nizanga gu pai ka i rugu roni kuti ni dagba iraira rika aboro nga airanyakari, i bi roni wa aimahe dagba yo auru kpotosende,

¹⁶ki nitãi gu pai nga ga unga fu yo; mi bi gu mi ka ngi angi mbiko ho rago Kristo, ya mi aora nga vurũ te, mi amanga nga sunge a vurũ te.

¹⁷Ii, ka i natumo na mi auru gaoni motumo idapase na mangapai, mi ngi, ani ngi na oni dunduko.

¹⁸Kina wo oni angi a, ki ningi na mi.

¹⁹Ono rogo Gbia Yesu yo mi so gima keda Timoteo fu roni fuo rago ngbutuko, mi ki ngarasi tire a ho mi ka gia pa roni ni.

²⁰Bambiko kura boro adu nga ho na berãpase wa ko, ka banda pa roni sirisiri te.

²¹Bambiko i nagbata gayo pai dunduko, ga Yesu Kristo apai te.

²²Ono oni arugu tironi na pa ko, ya, wa gude namanga pa bani, kina wo ko amangi pai, nigbandaka pa wene pangbanga na mi.

²³Si du ho mi ka bi gu pai ni nikamanga re mi naso gima keda ko ti ni ni ba sa:

²⁴ono mi berẽ he rogo Gbia yo, ya fuo rago ngbutuko mi nikaye tigimi a.

²⁵Ono mi aberẽ he ya keda mi Epafura fu roni ngba, nga wirínami nga boromangapai na mi, nga banzengere na mi, na gaoni mokedi na boro manga pa re;

²⁶mbiko ko akpi nyemu roni dú, ki rungo gbe bambiko oni agi pa gako kaza.

²⁷Bambiko ko akaza ni rengo ki mbedi na kpio, ono Mbori aini pai fu ko; fu ko sa te, ono fere a, ya ka mi bi nga rungo ku ri rungo ya.

²⁸Si du mi akedi ko ti ni ni ngarã, ya, ho oni ka bi ko ni berewe, oni ki ngi angi, gi rungo ki umba ti gu nadu mbata.

²⁹Oni dí ko ku gume tie rogo Gbia na ngbarago dunduko, ki irisi ngbatunga agu yo du wa ko,

³⁰bambiko mbiko ga Kristo sunge ko ambedi na kpio, pa ungako adu nga bangiriko te, ka fu gu nakpa rogo gaoni mangapai fere.