Read zande AFiripoio 3 Bible Online

AFiripoio 3 - zande bible

AFiripoio 3

¹Yangara ha tie, awirinami, oni ngí rogo Gbia. Ke agi apai fu roni re, mbu nga ha fere tigu te, ono si ka ngba fu roni.

²Oni bánda tironi be aango, oni bánda tironi be gbegberẽ aborosunge, oni bánda tironi be kungba yeretise.

³Bambiko ani nga ayeretise nga agu rani nairisa Mbori ni Toro Mbori, nisambua tirani rogo Kristo Yesu yo, nidu zaza mbiko borose wa sa te.

⁴Ka ngia pa borose du mi du zaza tigimi. Ka ngia kura boro naberã ya ni du zaza mbiko borose, gimi susi.

⁵Ramere adu muambi i ayere re, nga wiri ngbatunga Yisaraere, nga ngbatunga Benyamina, Ebere dagba aEbere; rogo pa rugute, Farusi;

⁶rogo pa nyaka, mi arungosi kanisa; rogo gu rurupai nga ga rugute, i abi re mi zanga sirõ.

⁷Ono agu ahe nakiisi pa re, si adu nga bangire ni he te, mbiko Kristo.

⁸Ii, ni rengo, ahe dunduko si adu nga bangire ni he te mbiko gu wene pai nga inida Kristo Yesu gi Gbia. Mbiko ko ahe aingi be re dunduko si ki du bangire wa kina mirĩ ahe, ya mi bi Kristo.

⁹I ki bi re rogo ko yo, na gi rurupai nga gu nga ga rugute te, ono na gu nadu mbiko idapa Kristo, nga gu rurupai nga ga Mbori mbiko idapase:

¹⁰ya mi ini ko na gu tandu nga ga gako zingabekpio, na ngbanya rogo gako hipai, ki niye ka wira kpioko;

¹¹ka ngia mbiko gu ka mi da ti zingabekpio dagba akangba.

¹²Si adu nga wa mi ima bi he te, mi ata du nga ni ziazia re a te. Ono mi nadusia ha ku mbata yo, ka ngia mi adia gu a tie nga gu i adi re kuti ni rogo Kristo Yesu yo.

¹³Awirina, mi aberã nga ha ya mi aima dia ha tigimi te. Ono gi pai sa re mangi mi nga mi natingida nga pa agu ahe nadu sa yo te, ono mi ki ndu ku mbata yo sa agu ahe du ku mbata yo.

¹⁴Mi nadusia gu ringbisiringbisi he du ku mbata yo sa aia gu mosoro du ti ga Mbori yambahe ari yo rogo Kristo Yesu yo.

¹⁵Agu rani du ziazia, ani du na berã tie kina wo. Ka oni berẽ gu pai akia, Mbori ayúgo kina ha fu roni;

¹⁶ono ani tá ni kina gu rugute da ani ti ni.

¹⁷Awirina, oni mongo du ni awiriki pai wa mi, ki nibi agu yo nata wo kina wa du ani ni kpiahe fu roni.

¹⁸Bambiko agu yo nata ni dungu yo, mi agumba pa yo fu roni ti dungu rago, ki nigumba ha awere ni kina aume, ya i nga avura ga Kristo wagiwagi ngua.

¹⁹Digida gayo pai nga kpio, gayo mbori nga vuse, gayo taarimo du rogo gayo zee, mperẽ pa úzegino.

²⁰Bambiko gaani ngbi du ngbangbaturũ yo, yo ani nasunguda Batasi ku ho ni nga Gbia Yesu Kristo.

²¹Ko nikasa gu bororani nga ga gaani umbasiti ni vovo ho, ya si wiri gu boroko nga ga gako taarimo, ku sangba gu mangapai yo rengbe ko na zoga ahe dunduko ni tiko mbiko ho.