Read zande AFiripoio 4 Bible Online

AFiripoio 4 - zande bible

AFiripoio 4

¹Wo du he tie, awirina, amangure, du nyemuroni ti re, nga gi ngbarago na kpakpari irisa, amangure, oni rú nyanyaki rogo Gbia.

²Mi nazungadi Euodia, mi nazungadi Sunduke, i dú na berã sa rogo Gbia.

³Ii, mi nazungadi ro a, ndikidi kuare, mo únda agi ade re, bambiko ani amangi sunge na yo rogo wene pangbanga, na Kuremendo a, na agu akura yo du ani na yo rogo sunge, du rimoyo rogo waraga unga yo.

⁴Oni ngí rogo Gbia yo dedede: mi agumba ha berewe, Oni ngí.

⁵Aboro ini roni dunduko ni bayee aboro. Gbia nambeda.

⁶Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe.

⁷Na gu zereda nga ga Mbori nagasi rugatinapai dunduko, si abánda kpotoroni yo na gaoni berã rogo Kristo Yesu yo.

⁸Yangara ha tie, awirina, agu apai du ni rengo, agu apai rengbe na irisa, agu apai du ni ruru he, agu apai du ni wene sino, agu apai nangba bangirise, agu apai i naya ti ni si ngba; ka ngia ziazia pai dũ ho, ka ngia he ho rengbe i fu tambuahe ti ni, oni bérẽ pa agi apai re.

⁹Agu apai oni ata ina ha nidi he nigi he ki nibi he rogo re yo, oni mángi agi apai re. Mbori zereda ki du na oni.

¹⁰Ono mi nangi rogo Gbia gbe, mbiko ti gi rago re oni azingisi gaoni berã tipa re, ono wa oni aberẽ pa re ni rengo; oni azanga rago manga ha.

¹¹Si adu nga wa mi nagumba pa zingohe te, bambiko mi aima ina pa sunga zezeredi rogo gu pai dũ mi rogo ho.

¹²Mi ini pa umbasiti, mi ini pa kumuko, rogo apai ni ba sa sa na rogo apai dú, mi ini gu pai nga mbi na ra na gomoro a, nga kumuko na zanga he a.

¹³Mi rengbe na manga apai dunduko rogo gu ko nanyakasa re.

¹⁴Wo du he tie oni amangi he wenengaĩ, wa oni adu na ani na ngbanya rogo gi rungo.

¹⁵Oni ini he tigaoni a, oni nga aFiripoio, ya rogo pa tona wene pangbanga, ho mi aguari Makedonia yo ni, a nga Kanisa sa nadu na ngbanya rogo pa fu gamahe na dia gamahe te, kina roni sa;

¹⁶ku Tesaronike yo a oni ahe nga keda he mbiko gi zingohe bara sa a te.

¹⁷A nga si wa mi nagbata gamahe te; ono mi nagbata gu zuzuhe nawisa ti rimoroni.

¹⁸Mi abi gaoni gamahe, si ki susi a. Awere ahe rengbe be re bambiko mi abi gu he naye yo du oni ni be Epafura, nga guzuguzu fuõ he, na wene motumo nangba ti Mbori.

¹⁹Gi Mbori ahisa gaoni zingohe dunduko ku sangba gako kumuko yo du rogo taarimo rogo Kristo Yesu yo.

²⁰Awere taarimo dú fu gaani Mbori nga Barani nye anye kindi. Amina.

²¹Mi sanango ga Mbori aboro rogo Kristo Yesu yo dũ. Agu awirina du na mi i sanango roni.

²²Ga Mbori aboro dunduko sanango roni, na agu yo nga ga Kaisara aboro kporo gbe.

²³Gu undahe nga ga Gbia Yesu Kristo si dú na tororoni.