Read zande AKorosaio 1 Bible Online

AKorosaio 1 - zande bible

AKorosaio 1

¹Pauro, nga ga Kristo Yesu mokedi mbiko gu pai Mbori akpi nyemu he, na Timoteo nga wirinarani,

²Fu ga Mbori aboro du Korosai yo du rogo Kristo yo, nga awirina naidi pase. Undahe dú fu roni na zereda be Mbori nga Barani.

³Ani nafu tambuahe fu Mbori Ba gaani Gbia Yesu Kristo, ki nikpari tipa roni dedede.

⁴Bambiko ani agi pa gaoni idapase rogo Kristo Yesu yo, na pa gaoni nyemuse fu ga Mbori aboro dũ,

⁵bambiko gu maabangirise moi yo ho fu roni ngbangbaturũ yo, nga gu oni agi pa ha mbata rogo pa gu wene pangbanga du ni rengo,

⁶nga gu naye fu roni. Wa du he a rogo kpotosende dunduko, nazuka zuzuhe ki nimoi pai a, wa du he rogo roni yo a, tona ti gu uru oni agi he ti ni re ki ini gu undahe nga ga Mbori ni rengo.

⁷Oni awiriki he ngba Epafura du nyemuko ti rani du ni moyambu na ani, nga ga Kristo kangara moyambu fu rani;

⁸ko ayugu pa gaoni nyemuse rogo Toro yo fu rani a.

⁹Bambiko gi pai re, ti gu rago ani agi he re, ani apiriga nga tigaani ti kparakpe tipa roni nizungadi he te, oni hiki be ina pa sangbako na gu tatamana nga ga Ziazia Toro na rugatise,

¹⁰ki ta ata ki re are na gu pai Gbia akpi nyemu he, ki nizu rogo wene apai dú, ki nisono na ina pa Mbori.

¹¹Oni nyáki na tandu dũ, ku sangba gu ome yo du ti gako taarimo, dati zera dũ na gbanga hipai ni ngbarago.

¹²Oni nifu tambuahe fu Ba, nasa rani ani re na du ni adikumbo gu ũkumbo nga ga ga Mbori aboro du imarago yo.

¹³Bambiko Mbori abatasi rani be tandu bitimo, ki rimisi rani ku rogo gu ngbi nga ga Wiriko, du nyemuko ti ko gbe.

¹⁴Gaani motumo du rogo wiriko yo a, na pa vu rani ti gaani ingaapai.

¹⁵Kristo nayugo Mbori nga gu ko ka i bi nga ko te, ko nga bambata vungu fu agu ahe dũ i afu.

¹⁶Bambiko i afu ahe dũ rogo ko yo; watadu ku ngbangbaturũ yo na auru kpotosende, gu i abi na gu i abi nga ya, watadu ambataabakindo, na aasiapapai, na azogoaboro na atandu; i afu ahe dú rogo ko yo, na tipa ko a.

¹⁷Ko nadu mbata yo fu ahe dú, ahe dũ nakpamia tihe rogo ko yo.

¹⁸Ko nga ri boro, nga kanisa, nga tonatona ahe, na bambata vungu be kpio; ko ru mbata yo fu ahe dũ.

¹⁹Bambiko Mbori nga Bako akpi nyemu hibepai nye rogo ko yo;

²⁰ka maa ngbanya dagba ko na ahe dunduko rogo ko yo a, ko nazeresi ahe mbiko kure gako wagiwagi ngua; rogo ko yo, watadu agu ahe du auru kpotosende, na agu ahe du ngbangbaturũ yo.

²¹Oni, ko azeresi roni awere, nakpara ti ko tigaoni mbata ni avurako na gaoni berã mbiko gaoni gbegberẽ mangaapai,

²²rogo boro pasioko mbiko kpio, ko ka fu roni ziazia zanga sirõ na zanga gu pai ka i rugu roni ti ni barangba ko.

²³Oni ki nye rogo idapase, ni duadua roni nyanyaki, ka oni agúari nga ti gu maabangirise nga ga wene pangbanga ya, nga gu oni agi, nga gu atungusi rogo arago tii ngbangbaturũ yo dũ; nga gu i asa re nga Pauro ni gaha moyambu.

²⁴Awere mi nasambua tire rogo gi hiapai tipa roni, ki hisi rogo borore yo tigimi gu nakpa rogo ga Kristo hiapai tipa pa boroko, nga kanisa.

²⁵Si nga gu i asa re ni gaha moyambu, ku sangba gu ringbisiringbisi he yo nga ga Mbori i afu fere tipa roni, ka digisa pa Mbori,

²⁶nga kina gu gbugbu pai nadu ni okooko ho ho rago aenge ni na rika ahe; du awere ni yuguyugu he fu agu yo nga gako aboro.

²⁷Na fu agu yo Mbori aidi he ka yugo pa gu ũkumuko du ti gu taarimo nga ga gi gbugbu pai re dagba aGendiria yo, nga Kristo rogo roni yo, nga gu maabangirise nga ga taarimo.

²⁸Ko nga gu ko ani natungusa pa ko ki nirugu aboro dunduko ki niyugu pai fu aboro dunduko ni tatamana, ani fu aboro ni ziazia yo dunduko rogo Kristo yo.

²⁹Tipa gere mi bagi omere abaga ti ni, ki niasadi ka manga ha ku sangba gako mangapai yo mangi ko rogo re yo ni ome gbe.