Read zande AKorosaio 2 Bible Online

AKorosaio 2 - zande bible

AKorosaio 2

¹Bambiko mi nakpi nyemu he ya oni ini he ya mi nake na manga pa roni gbe, na pa agu yo du Raodikiya yo, na pa agu yo dunduko ata bi nga boro kpakpure ya;

²ya kpotoyo yo ngarã, i ki kpamia tiyo na nyemuse, na ti gu ũkumuko ni du ti ina pa rugatinapai dunduko, i ki ini ga Mbori gbugbu pai, nga Kristo.

³Rogokoyoiaoko gu ũkumuko du ti tatamana na inahe dũ.

⁴Mi nagumba gere ya, ka boro nángi nga roni ni wene fugo wia ya.

⁵Ono wa du nga mi na oni awere ni borore ya, ani du na oni rogo toro ki nibi gaoni ringbisa pai ni ngbarago, na gu nyaka du ti gaoni idapase rogo Kristo yo.

⁶Si du wa di oni Kristo Yesu Gbia ti ni, oni tá rogo ko yo,

⁷tarãroni ki rimi oni ki du ni duadua roni rogo ko yo, oni rú na gaoni idapase nyanyaki, ki nimoi pai ni tambuahe, kina wa i ayugu he fu roni.

⁸Oni bánda tironi, gu boro ka gbarasa roni na gani nyemu tatamana na kungba nangahe, wa du pa aboro, na gu tata pai nga ga zegino, wa pa Kristo te.

⁹Bambiko gu hibepai du ti Mbori si nanye rogo ko yo na baha,

¹⁰rogo ko yo oni du teketeke, nga ri azogoapai na tandu dú.

¹¹Rogo ko yo i ayere roni ni a na gu yeratise adu nga ni be ya, rogo gu bororoni nga ga ingapai oni amoi ku sa yo, rogo gu yeratise nga ga Kristo.

¹²I akpisidi roni na ko rogo bapatiza, rogo ho i azingisi roni na ko a mbiko ida pa ga Mbori mangapai a, nga gu ko nazingisi ko dagba akangba.

¹³Wa oni tigaoni akpi mbiko gaoni ingaapai na gaoni zangayeratise ti bororoni, oni, ko amongo ungasi roni na ko ki nivu rani ti gaani ingaapai.

¹⁴Ko ki nigbandaka agu ahe du ni keke he kuti rani mbiko ndika, gu i akiti ngbanga rani ti ni. Ko adi he ku sa yo ki nibanga ha ni marã kuti wagiwagi ngua;

¹⁵ki nibafu abazogoahe ku sa yo ti ko na atandu, ko ki yugu he gbayaga, ki nidi sima rogo ho.

¹⁶Ka boro sápu nga ngbanga roni mbiko riahe wa sa ya, na mbiko mbira he, na mbiko pa rago pumbo, na mbiko fogo diwi, na mbiko rago sabiti a ya.

¹⁷Si nga kpia agu ahe nikaye; ono ga Kristo nga boroho.

¹⁸Ka boro dí nga gaoni mosoro be roni bambiko gani umbasiti wa sa ya, ni niirisi amaraika, ninye rogo agu ahe ni abi, nikiisi tini gbua ns gani berã du ti borose,

¹⁹ka ni aka nga kuti Rihe ya, nga gu ko nanyakasa boroko mbiko ho, ki nizunga he wa sa, mbiko ngbazungaha na gbaga, ki nisonosi he wa Mbori akpi nyemu he.

²⁰Ka si du wa oni akpi na Kristo ti gu tata pai nga ga zegino, tipagine oni ara fu rugute ti ni, wa ka oni ra mbiko zegino?

²¹Gaha rugute naya, “Ka oni moi nga beroni ti ni ya, ka oni hia nga ha ya, ka oni zádi nga ha ya.”

²²(Si nga agu ahe nikagberã be manga pai na ni du) wa du pa sangba aboro na pa gayo yugopai.

²³Agi ahe re du na kpia tatamana tigu rogo irisa berã, na umbasiti na zoga pa borose; ono si arengba nga ka zoga gu nyemuhe du ti borose te.