Read zande AKorosaio 3 Bible Online

AKorosaio 3 - zande bible

AKorosaio 3

¹Ka si du wa i amongo zingisi roni na Kristo, oni gbáta agu ahe du ari yo, yo du Kristo ni, nisungu ku kumbabe Mbori.

²Oni moi gaoni berã ti agu ahe du ari yo, ti agu ahe du sende no te.

³Bambiko oni akpi, ungaroni ni okooko ho na Kristo rogo Mbori yo.

⁴Ho i ka yugo Kristo ni, nga ungarani, i ayúgo roni na ko a ni taarimo.

⁵Oni ími apa kpotoroni yo du auru kpotosende no; pa bari, na meteka, na gbagaura, na kpi nyemu gbegberẽ apai, na kpihe, si nga irisa kpiahe;

⁶bambiko ga Mbori zinga naye ku ri awiri basapai mbiko agi apai re.

⁷Si nga agu ahe oni ata rogo ho mbata a ho oni adu ni na agi apai re.

⁸Ono awere oni mbú agi apai re du a; erã, na zinga, na sogote, na wawaru, na gbegberẽ fugo ngbaroni yo.

⁹Ka oni re nga zire dagba roni yo ya; mbiko oni aima mbu gu kuru boro, na gani mangaapai.

¹⁰Oni aukadi gu vovo boro, i ambakadi ni ni vovo ni sa inahe wa du kpia gu ko nafu ni.

¹¹Si du adu nga aGiriki ho na aYudo ti ni berewe ya, yeratise na zangayeratise, na aboro kura aringara na agu yo fugoyo adu akiaakia, kanga na raniri a ya, ono Kristo nga ahe dunduko, ki du rogo ahe yo dunduko a.

¹²Ziazia amangure, wa du oni ni ga Mbori siasia yo, oni úkadi ngbadu inapai, na weneringise, na umbasitise, na zera, na gbanga hipai;

¹³nihi pai fu akuaroni, nivu akuaroni, ka pai dũ bangiri gu boro kuti kura ni; wa Gbia avu roni, kina wo oni ka manga.

¹⁴Ku ri agi apai re dú oni úkadi nyemuse, nga gu úvodatise nga ga ziaziapai.

¹⁵Oni ídi he fu ga Kristo zereda si zogo kpotoroni yo, nga gu pai i ayambu roni sa ni rogo boro sa; kinitambuahe.

¹⁶Oni ídi he fu ga Kristo pai si nye rogo roni yo ni babakere he na tatamana dú; ki yugu pai fu akuaroni ki nirugu pai rogo abia tambuahe yo, na abia wasa, na agu abia Toro nayugo, nibi he na undahe kpotoroni yo fu Gbia.

¹⁷Gu oni amanga, watadu ni fura, na mangapai, oni mángi he dú ni rimo Gbia Yesu, ki nifu tambuahe fu Mbori nga Ba mbiko ko.

¹⁸Dere akumba, oni rá fu kina akumbaroni, wa re he rogo Gbia yo.

¹⁹Akumba, oni nikpí nyemu adiaroni ka ngbaduroni ími nga fu yo ya.

²⁰Agude, oni gí sangba avunguroni rogo apai dú, bambiko gere ngba rogo Gbia yo.

²¹Aba, ka oni wi nga ngba awironi ni wia ya i ka mbu.

²²Akanga, oni gí sangba agu yo du ni abairaroni ku sangba borose yo; ka manga pai ku bangirise, wa agu yo nambakada tiyo ku bangiri aboro te, ni kpotoroni yo, ni gunde ti Gbia.

²³Na gu oni amanga oni mángi he na kpotoroni yo wa manga ha fu Gbia, wa fu aboro te;

²⁴ki niini he ya oni abí gu mosoro du ti dikumbo be Gbia; oni mangi pa Gbia Kristo.

²⁵Bambiko gu ni nanamanga gbegberẽ pai, ni adia mbusa be gu gbegberẽ pai berewe ni amangi. Mbori akpara nga boro te.