Read zande AKorosaio 4 Bible Online

AKorosaio 4 - zande bible

AKorosaio 4

¹Abaira oni fú he fu gaoni akanga ni ruru he, wa rengbe he; niini he ya Bairaroni du ngbangbaturũ yo a.

²Oni kpári akpara dedede kindi, ki ta ngera rogo ho ni tambuahe.

³Oni ki nikpari tipa rani a, ya Mbori za ngbadimo gumbapai fu rani, ani gumba gu gbugbu pai nga ga Kristo, si du du mi ti ni ni vodivodi re a;

⁴ya mi yugu he wa gu mi ka gumba ha.

⁵Oni tá ni tatamana pati agu yo du zegi yo, nidungura rago tipa mangapai.

⁶Oni fúra na undahe dedede, si ki hii na tikpo, si du oni ka ina ti ni ya wãi oni ka karaga ha fu akuaroni.

⁷Gimi apai dunduko Tukiko agúmba ha fu roni, nga wirina du nyemuko ti rani, nga kangara boromangapai du ani na ko ni amoyambu rogo Gbia.

⁸Mi akedi ko kina mbiko gi pai re, oni ini gaani apai, ko ngarasi kpotoroni yo;

⁹na Onesimo nadu dagba roni nga kangara wirina du nyemuko ti rani. I ayúgo pa agu apai fu roni dunduko du ni mangimangi he no.

¹⁰Arisitaruko sanango roni du ani na ko ni kisikisi rani, na Marako nga wiri dawiri Barunaba. I aima ruga roni tipa ko, ka ko ye koyo du oni ni oni di ko ku gume,

¹¹na Yesu, i niya ti ko Yuseto, nga ayeretise. Kina agi yo re biata nangia aYudo naidi pase ki du na mi ni amangisunge tipa ga Mbori ngbi, nga agu yo nangarãsi re.

¹²Epafura sanango roni, ko nadu dagba roni, nga ga Kristo Yesu moyambu, ki zungadi he ni gako kpe tipa roni gbe, ya oni ru ziazia teketeke rogo gu pai Mbori akpi nyemu he.

¹³Mi nga dezireko ya ko amangi pa roni gbe na pa agu yo du Raodikiya yo na pa agu yo du Yerapori yo.

¹⁴Ruka nga munganga, ko sanango roni, du nyemuko ti rani, na Dema.

¹⁵Oni sánango agu awirina du Raodikiya yo, na Numba, na agu akanisa dungura tiyo ku kpuyo yo.

¹⁶Ho i ka geda gi keke waraga ni re dagba roni, oni bi he i gedi he dagba akanisa Raodikiya yo a; oni ki gedi gu pai i akedi ku Raodikiya yo tigaoni a.

¹⁷Oni gúmba ha fu Arukipo ya, “Mo bérẽ pa gu sunge mo adi he be Gbia, mo digisi he.”

¹⁸Gere nga gi sanango ni boro bere nga Pauro. Oni tingidi pa gimi azogbo. Undahe dú na oni.