Read zande 1 ATesaroniko 5 Bible Online

1 ATesaroniko 5 - zande bible

1 ATesaroniko 5

¹Ono arago na regbo ahe, awirina, zingo ke pai fu roni tipa ha amanga nga ronite.

²Bambiko oni ini tigaoni nzunzu ya rago Gbia naye wa iradĩ naye yuru.

³Hoi ka ya ni, “Zereda, ngba barani angba,” gberãngbi ki ye ku ri yo ni ba sa, a wa imisiri pai sa gu de du na gude; i abata nga wa sa te.

⁴Ono oni, awirina, oni adu nga bitimo yo, gu rago ka dusia roni wa iradĩ te re.

⁵Bambiko oni nga awiri imarago dunduko, nga awiri haha rago. Ani nga ga yuru yo te, nga ga bitimo yo te.

⁶Si du tie ka ani raki nga wa agu yo ya, ono ani nikparia rago ki nirugu tirani.

⁷Bambiko agu yo nara i nara yuru; agu yo nakpi buda i nakpi he yuru.

⁸Ono wa du ani ni ga haha rago yo, ani rúgu tirani, niukadi gu marã ngbaduse nga idapase na nyemuse; maabangirise tipa bata ki du ni gaani kpakpari vura.

⁹Bambiko Mbori aríngbisa nga rani sa zinga te, ono sa dia bata rogo gaani Gbia yo nga Yesu Kristo,

¹⁰nakpi tipa rani, ya, watadu ani ni ungarani na ani nara ara, ani mongo du adu ni ungarani na ko.

¹¹Were oni zúngadi tironi na akuaroni, ki ninyakasi tironi dagba roni yo, a wa oni namanga a.

¹²Ono ani nazungadi roni, awirina, oni ini agu yo namanga nyanyaki sunge dagba roni yo, ki du ri roni rogo Gbia ki nirugu roni;

¹³oni ki niirisi yo bakere gbe ni nyemuse mbiko gayo sunge. Oni dú na zereda dagba roni yo.

¹⁴Ani nazungadi roni, awirina, oni rúgu agu yo namanga utukuru, oni nyakasi agu yo nawo, oni sóngodi agu yo narungbura, oni hi pai ni gbanga ha fu aboro dunduko.

¹⁵Oni bi he ya ka gu ni karaga nga gbegberẽpai fu boro ku ba gbegberẽpai wa sa ya; ono oni péke fuo gu pai nga wene he dedede, gu ni fu gu ni, fu aboro dunduko a.

¹⁶Oni ngi angi dedede;

¹⁷ka oni pírigi nga ti kpara kpe ya.

¹⁸Oni fú tambuahe rogo apai dú; bambiko gere nga gu pai Mbori akpi nyemu he tipa roni rogo Kristo Yesu yo.

¹⁹Ka oni bísi nga Toro ya;

²⁰ka oni páyasi nga agu apai i nagumba ni sangba Mbori ya;

²¹oni ásadi apai dunduko; oni ká kuti gu du ni wene he nyanyaki;

²²oni né ngbatunga gbegberẽapai dunduko.

²³Mbori zereda ko sá roni ziazia ni tiko teketeke. I bánda tororoni na mbisimoroni na bororoni na baha, zanga sirõ ti rago ye gaani Gbia Yesu Kristo.

²⁴Irarengo nga gu ko nayamba roni, ko amánga ha amanga a.

²⁵Awirina, oni kpári tipa rani.

²⁶Oni pói kuti awirina dunduko na dungoti na nyemuse.

²⁷Mi zúngadi roni ni rimo Gbia ya i gedi gi keke waraga re fu awirina dunduko.

²⁸Gu undahe nga ga gaani Gbia Yesu Kristo si dú na oni.