Read zande Yosua 11 Bible Online

Yosua 11 - zande bible

Yosua 11

¹Si ki ta du wa gere, ho Yabina nangia bakindo Asora agi gi pai ni re, ko ki kedi sunge koyo du Yobaba ni bakindo Madona, na koyo du bakindo Simirona ni, na koyo du bakindo Akasapa ni,

²na koyo du agu abakindo ni naadu rogo ringara abaagangara ku nodiyo, na ku kpasakpasa rago pati Kinerota ku sudiyo, na ku ngboongboorago na ku tumbatumba rago Doro yo ku dioyo,

³na koyo du aKanano ni ku uroyo na ku dioyo, na aAmoro, na aEto, na aPereso, na aYebuso rogo ringara abaagangara, na koyo du aIvo ni naadu pavuru Erumone ringara Misipa yo.

⁴I ki kuru na gayo rimbasa aborosovura, ni barimbasa aboro ni ngenge yo wa du ngume pangba baime, na afarasi na angbagidavura ni dungu he a.

⁵Agi abakindo re dunduko ki dungura tiyo, ki ye ki zi bataya pati ime Meroma, ka so vura kuti aYisaraere.

⁶Yekova ki ya fu Yosua, “Ka mo gúnde nga be yo ya, bambiko gba, ti saa wa gere, mi afú yo ku be aYisaraere ni kpikpi yo. Mo adéwa gayo afarasi, ki zokodi gayo angbagidavura.”

⁷Si du aYosua na abasovura dunduko aye ti ni, ki tunguo yo pati ime Meroma, ki ti ku auru yo.

⁸Yekova ki fu yo ku be aYisaraere, i ki mangi yo, ki do fuo yo ku rogo Bakere Sidona, na ku Miserefota-maima yo, na ku ngboongboorago Misipa yo ku uroyo. I ki mangi yo, ka i ambu nga boro yo wa sa ya.

⁹Yosua amangi yo a wa Yekova arugu ko na ni; ko adewe gayo afarasi, ki zokodi gayo angbagidavura.

¹⁰Yosua ki karaga tiko ti gu rago re, ki di Asora, ki mangi gaha bakindo ni basape; bambiko Asora adu mbata ni bakumba bakporo ku ri agu angbi re.

¹¹I ki mangi agu aboro dunduko nadu rogo ho ni basape, ki ba tungayo kpakaya. I ambu nga unga boro yo wa sa te, i ki zokodi Asora.

¹²Yosua ki di agu abaakporo nga ga agu abakindo re dunduko, a wa Mose ga Yekova moyambu arugu ko na ni.

¹³Ono agu abaakporo naadu ri agangara yo, aYisaraere azo nga gu sa te, kina Asora sa; Yosua azo ho.

¹⁴Gu gbugbu ahe nga ga agu abaakporo re aYisaraere arogo ho ni gayo zizi ahe, na zogozogo anya; ono i amangi aboro dunduko ni basape, ki da ho i aba tungayo ni kpakaya. I ambu nga unga boro yo wa sa te.

¹⁵Wa Yekova arugu Mose gako moyambu, kina wo Mose arugu Yosua na ni, Yosua ki mangi he wo; ko ahe nga manga gu pai sa Yekova arugu Mose na ni te.

¹⁶Si du Yosua ki di ringara dunduko, nga ringara abaagangara na gu du ku Negebe yo, na ringara Gosene, na tiditidi rago, na kpasakpasa rago, na ringara abaagangara nga ga aYisaraere na gaha kpasakpasa rago a;

¹⁷tona Bagangara Araka, du ngba gu gene nandu ku ngbi yo ku Seira yo, ki da ku Bara-gada yo du rogo ngboongboorago Rebanona yo pavuru bagangara Erumone. Ko ki rogo gayo abakindo dunduko, ki mangi yo, ki imi yo.

¹⁸Yosua ki so vura na agi abakindo dunduko re tipa gbanga rago.

¹⁹A nga bakporo sa namoi zereda dagba yo na awiri aYisaraere te, kina aEto nangia aboro Gibona; i azi yo dunduko ngba vura.

²⁰Bambiko sangba Yekova nadu nga ka nyakasa kpotoyo yo, i ndu fuo aYisaraere ni vura, ko gbarasi yo k pakaya, ka i bi nga inapai ya, ono kina imo yo dunduko, a wa Yekova arugu Mose na ni.

²¹Yosua ki ye ni gu rago re, ki mangi aAnako rogo ringara abaagangara, na Eburone yo, na Debiri yo, na Anaba yo, na rogo gu ringara abaagangara dunduko nga ga Yuda, na rogo gu ringara abaagangara nga ga aYisaraere. Yosua agbarasi yo kpakaya na gayo abaakporo.

²²A nga boro Anaka sa nanye rogo ringara awiri aYisaraere yo te; kina Gaza yo, na Gata yo, na Asedodo yo bete yo anye ni.

²³Si du Yosua ki rogo aringara dunduko, a wa Yekova agumba pa ha fu Mose; Yosua ki fu he fu aYisaraere ni gayo ni kparakakparaka ha a wa pa angbatungayo adu. Ringara ki zeredi be so vura.