Read zande Yosua 14 Bible Online

Yosua 14 - zande bible

Yosua 14

¹Agere nga agu angbi awiri aYisaraere arogo ho ni gayo rogo ringara Kanana, nga gu aErazara nangia boromotumo akparaka ha fu yo, na Yosua nangia wiri Nuna, na agu yo nadu ku ri ga abayo aborokporo dagba angbatunga awiri aYisaraere.

²Gayo angbi adu ni ringbisiringbisi he a wa Yekova arugu Mose, tipa agu angbatunga du ribua, na tipa bebere gu ngbatunga sa.

³Bambiko Mose afu angbi fu angbatungayo ue na fu bebere gu ngbatunga sa ku mbiti Yaradene yo; ono ko afu nga ngbi fu aRevi dagba yo te.

⁴Bambiko awiri Yosefa adu na angba tunga ue, nangia Manase na Efuraima; ka i afu nga ngbi fu aRevi rogo ringara ya, ono kina abaakporo i niraki rogo ho, na agu aringara banambu naadu pati he kirikiri, tipa gayo zogozogo anya na gayo ahe.

⁵A wa Yekova arugu Mose, kina wo awiri aYisaraere amangi he; i ki kparaka ringara.

⁶Angbatunga Yuda ki ndu koyo du Yosua ni ku Girigara yo; Kareba nangia wiri Yefune boro Kenezo ki ya fu ko, “Mo ini gu pai Yekova agumba ha fu Mose, nangia vuru Mbori, tipa re na tipa ro Kadesabaranea yo.

⁷Garãre adu 40 ho Mose akedi re nangia ga Yekova moyambu ni Kadesa-baranea yo, ka maa ringara. Mi ki ye na pai fu ko berewe a wa si adu kpotore yo.

⁸Ono agu awirina ani andu na yo, i agundesi kpoto aboro yo, si ki zizirĩ azizirã; ono mi ni tire apeke Yekova gi Mbori na kpotore yo dunduko.

⁹Mose ki zunga he ni kina gu uru re, ki ya, ‘Ni rengo, gu ringara nduro asimbi he si adú ni gamo na tipa awiro a kindi, bambiko mo apeke Yekova gi Mbori na kpotoro yo dunduko.’

¹⁰Awere, mo ngére, Yekova abanda re ni ungare, a wa ko agumba ha, tipa agi agarã 45 re, tona ti gu rago Yekova agumba gi pai re fu Mose, ho aYisaraere anungu ni rogo ngbakungba. Mo ngére, awere garãre du 85.

¹¹Bambiko mi du nyanyaki ni gi uru re kindi, a wa mi adu ni gu rago Mose akedi re; wa omere adu ni gu rago re, kina wo du he awere, tipa sovura, na tipa ndu sa pai na ka yega berewe.

¹²Awere tie, mo fú gi ringara abaagangara re fere, nga gu Yekova agumba pa ha ni gu rago re; bambiko mo agi he ni gu rago re ho aAnako adu yo ni, na abaakporo ni babakere he na angapa pati he. Ka ngia Yekova nikadu na mi, mi ki do yo yo, a wa Yekova agumba ha.”

¹³Yosua ki fu maku fu Kareba nangia wiri Yefune, ki fu Eburone fu ko ni gako ngbi.

¹⁴Si du Eburone adu ti ni ni ga Kareba ngbi nangia wiri Yefune boro Kenezo, daku awere; bambiko ko apeke Yekova na kpotoko yo dunduko, nga ga aYisaraere Mbori.

¹⁵Were i ayambu rimo Eburone mbata nga Kiriyata-aruba, ti rimo gu Aruba nangia bakere bakumba dagba aAnako. Si du ringara ki zeredi be sovura.