Read zande Yosua 2 Bible Online

Yosua 2 - zande bible

Yosua 2

¹Yosua nangia wiri Nuna akedi akumba ue Sitimi yo ni gbuko i moi rago, ki ya fu yo, “Oni ndú ka bi ringara, na Yereo a.” I ki ndu da rimi ku rogo gu bambu nga ga natakuari rimori angia Raba, ki sungu yo.

²Aboro ki gumba ha fu bakindo Yereo, ki ya, “Mo ngére, akumba niye ku erẽ yuru nga awiri aYisaraere ka maa ringara.”

³Bakindo Yereo ki kedi sunge koyo du Raba ni, ki ya, “Mo kúsi agu akumba niye kono du mo ni, nga agu yo rimi ku dimo kpuro yo; i ye ka maa ringara dunduko.”

⁴Ono de aima roga agu akumba ue re, ki oko yo, ri ki ya, “Ni rengo, akumba niye kono du mi ni, ono mi aina nga ho i niye ni te,

⁵si ki ta du wa gere ho rago kisa ngbadimo bakporo nida ni, ho rago nibiri ni, akumba ki kuru ku zegi yo, mi aina nga ho akumba nindu ku ho ni te, oni dó fuo yo ni ipo, bambiko oni agbia yo.”

⁶Ono ri aima ndu na yo ku ri bambu yo, ki oko yo ku tii katakpa nzibi yo, nga gu ri agbaragi he ri bambu yo.

⁷Akumba ki pe fuo yo ngba gu gene nandu ku Yaradene yo dati basigo ime; ho agu yo akuru ni ku zegi yo nape fuo yo i ki kisi ngbadimo bakporo ni ba sa.

⁸Mbata agu aYisaraere ue nikapi, Raba ki ye fuo yo ku ri bambu yo,

⁹ki ya fu yo, “Mi ini ya Yekova fu gi ringara re fu roni, iriworoni ti ti rani, aboro gi ringara re zizirĩ azizirã be roni dunduko.

¹⁰Bambiko ani agi he wa Yekova augusi gu ime nga Zamba Baime barangba roni, ho oni akuru ni Ezipeta yo. Ani ki gi gu pai oni amangi fu agu abakindo ue nga ga aAmoro yo, naadu mbiti Yaradene yo, Siona na Ogo, nga agu yo oni aba tungayo kpakaya.

¹¹Ho ani agi he ni, kpotorani yo ki zizirĩ ni ba sa, a nga boro sa auani anye rogo ni yo berewe be roni te; bambiko Yekova gaoni Mbori, ko nga Mbori du ngbangbaturũ ari yo na ku sende no a.

¹²Were, mi nakpara fu roni tie, oni zúnga he fere ti rimo Yekova, ya wa yugu mi weneringise fu roni, kina wo oni ka yugo weneringise fu ga buba aborokporo. Oni ki fu ndikidi ngbaanga fere,

¹³ya oni abátasa buba ni ungako, na nina, na akawire, aunvuruami na atamere, na agu ahe dunduko du be yo ki batasi ungarani be kpio a.”

¹⁴Akumba ki ya fu ri, “Ungarani ku ba gamo! Ka mo akúsa nga pa gi gaani apai re ya, si adú wo, ho Yekova ka fu ringara ni fu rani, ani amánga pai ni weneringise na rengo foro.”

¹⁵Ri ki zogo yo ti gire ti bangiri bambu ku sende yo, bambiko gari bambu adu ni dikadika ha kuti ngapa bakporo, ri ki niraki ri ngapa.

¹⁶Ri ki ya fu yo, “Oni óro ku dagba abaagangara yo, abado fuo roni ka gbia roni. Oni ki gbu koyo tipa uru biata, daho abado fuo roni ka karaga tiyo ni; fuo gure oni ki ndu gaoni nduge.”

¹⁷Akumba ki ya fu ri, “Pai adú nga ku ri rani mbiko gi ga zungahe re zungadi mo rani ani zunga ha te.

¹⁸Mo ngére, ho ani ka ye ni ku rogo gi ringara re, mo ki kpira gi zamba gire re ti gu bangiri bambu zogo mo rani ti ni. Mo ki dungura abamo, na namo, na awirinamo, na ga bamo aborokporo dunduko fuo ro ku dimo yo.

¹⁹Ka gu boro kuru ku zegi yo ti ngbadimo ga bambu ku gene bakporo yo, kureni adú kina ku ri ni, ani ki zanga pai ku ri rani; ono gu ni ka du na mo dimo yo, kureni adú ku ri rani, ka boro táĩ beni kuti ni.

²⁰Ono ka mo kúsi pa gi gaani pai re, gu zungahe zungadi mo rani ani zunga ha si azía nga rani te.”

²¹Ri ki ya, “Si adú kina wo, wa gumba oni he.” Ri ki kedi yo ku sa yo, i ki ga; ri ki kpira gu zamba gire re ti bangiri bambu.

²²I ki ndu, ki da ku dagba abaagangara yo, ki nye yo tipa uru biata daho abado fuo yo akaraga tiyo ni; abado fuo yo agbata yo ngba gene, ono i abi nga yo te.

²³Agu akumba ue re ki karaga tiyo, ki zorõ ri abaagangara yo ki si ku mbiti yo, ki ye koyo du Yosua ni nga wiri Nuna, ki gumba agu apai fu ko dunduko naamangi yo.

²⁴I ki ya fu Yosua, “Ni rengo, Yekova fu ringara fu rani dunduko; ku ri gure agu aboro naraka rogo gu ringara re i ima zizirã azizirã be rani dunduko.”