Read zande Yosua 20 Bible Online

Yosua 20 - zande bible

Yosua 20

¹Yekova ki gumba pai fu Yosua, ki ya,

²“Mo yá fu awiri aYisaraere. ‘Oni kpáraka abaakporo bagbuko, nga gu mi agumba pa ha fu roni ku ngba Mose,

³ya gu baimiboro nikaniími boro ni bino, ni ki oro ku rogo ho. Si ki du ni gaoni abagbuko be abairibape kure aboro.

⁴Ni ki oro ku rogo gu bakporo sa dagba agi abaakporo yo re, ki ru ti ngbadimo bakporo ki gumba gani ngbanga fu abaakumba gu bakporo re. I ki di ni ku gume ku bakporo yo, ki fu ba fu ni, ni ki niraki dagba yo.

⁵Ka bairibape kure boro adó fuo ni, ka i akúsa nga gu baimiboro re fu ni ya; bambiko ni aimi kurani ni bino, ni anasoga nga ni mbata te.

⁶Ni ki raki rogo gu bakporo re, daho ni ka ye ni ka ru barangba rimbasa aboro tipa sarangbanga, ki da ho gu gbiamotumo ka kpi ni nga gu ni nikadu ti gu rago re. Fuo gure gu baimiboro re ki karaga tini berewe ku rogo gani bakporo, na ku kpuni yo, nga gu bakporo ni aoro rogo mbata’.”

⁷I ki kparaka Kedese Gariraya yo, du ringara abaagangara nga ga Nafatari, na Sekeme du rogo gu ringara abaagangara nga ga Efuraima na Kiriyata-aruba, si sa na Eburone rogo gu ringara abaagangara nga ga Yuda.

⁸Ku mbiti Yaradene Yereo yo ku uroyo, i ki kparaka Besere du ngbakungba yo rogo kpasakpasa rago, dagba ngbatunga Rubena; na Ramota Girada yo dagba ngbatunga Gada, na Gorana Basana yo dagba ngbatunga Manase.

⁹Agi abaakporo re nangia siasia abaakporo tipa awiri aYisaraere dunduko, na tipa gu kungba boro a nasungu ku dagba yo, ya gu boro nikaniimi boro ni bino ni nioro ku rogo ho, ka bairibape kure boro aímo nga ni ya, daho ni ka ye ni ka ru barangba rimbasa aboro.