Read zande Yosua 22 Bible Online

Yosua 22 - zande bible

Yosua 22

¹Yosua ki yambu aRubena tie, na aGada, na gu bebere ngbatunga aManase,

²ki ya fu yo, “Oni aka kuti agu apai dunduko Mose arugu roni kuti ni nangia ga Yekova moyambu, ki nigi sangbare rogo agu apai dunduko mi arugu roni kuti ni a.

³Oni ahe nga awirinaroni tipa gi dungu arago re ki da ku areme te, ono oni aka kuti gu rugute sirisiri Yekova gaoni Mbori arugu roni na ni.

⁴Awere Yekova gaoni Mbori ko fu zereda fu awirinaroni, a wa ko akido pa ha fu yo; si du tie oni káraga tironi awere, ki ga ku kpuroni yo ku rogo gu ringara nga ga gaoni ũkumbo, nga gu Mose afu fu roni nangia ga Yekova moyambu, ku mbiti Yaradene yo.

⁵Ono oni nibánda tironi nyanyaki ka amanga gu rugute na ndika Mose aruga roni kuti ni, nangia ga Yekova moyambu, ki ya, oni nikpí nyemu gaoni Mbori, ki nipeke fuo gako apai dunduko, ki nika kuti gako arugute, ki nika kuti ko, ki nimangi pako na kpotoroni yo dunduko na mbisimoroni dunduko.”

⁶Si du Yosua ki fu maku fu yo, ki kedi yo ku sa yo, i ki ga ku kpuyo yo.

⁷Were Mose afu ũkumbo fu gu bebere ngbatunga Manase ku Basana yo: ono Yosua afu ũkumbo fu gu kura bebere yo dagba awirinayo ku mbiti Yaradene ku dioyo. Ho Yosua akedi yo ni ku sa yo ku kpuyo yo, ko afu maku fu yo,

⁸ki ya fu yo. “Oni gá ku kpuroni yo na bakere ũkumuko, na dungu zogozogo anya, na feda na dahabu, na sirigi, na marã, na dungu aremu. Oni kpáraka gu zizi ahe nga ga avuraroni dagba roni na awirinaroni.”

⁹Awiri Rubena ki ga na awiri Gada na gu bebere ngbatunga Manase, ki guari dagba awiri aYisaraere Siro yo, du ringara Kanana yo, ka ga ku ringara Girada yo, ku rogo gu ringara nga ga gayo ũkumbo, a wa Yekova arugu he ku ngba Mose.

¹⁰Ho i ada ni ku rogo agu arago nadu pati Yaradene, nga gu du ringara Kanana yo, ngbatunga Rubena adua bamotumo yo pati Yaradene, na ngbatunga Gada na gu bebere ngbatunga Manase, nga bakere bamotumo tipa bi he.

¹¹Awiri aYisaraere ki gi pa ha ya, “Angbatunga Rubena na ngbatunga Gada na gu bebere ngbatunga Manase, i dua bamotumo rogo ringara Kanana, rogo gu rago du pati Yaradene, ti gu pangbaha nga ga awiri aYisaraere.”

¹²Ho awiri aYisaraere agi pa ha ni, rimbasa awiri aYisaraere dunduko ki dungura tiyo ku Siro yo, ka ndu ka so vura kuti yo.

¹³Awiri aYisaraere ki kedi Finasa wiri Erazara nangia boromotumo, koyo du ngbatunga Rubena ni, na koyo du ngbatunga Gada ni, na koyo du gu bebere ngbatunga Manase ni;

¹⁴gbiakuti abazogo bawe, bazogo sa tipa angbatunga aYisaraere ni ba sa sa, i adu ni ri ga abayo aborokporo dunduko dagba arika aYisaraere.

¹⁵I ki ye koyo du awiri Rubena ni, na koyo du awiri Gada ni, na koyo du gu bebere ngbatunga Manase ni, ku ringara Girada. I ki gumba pai fu yo, ki ya,

¹⁶“Ya rimbasa ga Yekova aboro dunduko wẽ. ‘Gini tindika nga gere, nga gu mangi oni re kuti ga aYisaraere Mbori, ki sa tironi ni gi uru re ti Deka fuo Yekova, nidua bamotumo tipa roni, ka sa mungu kuti Yekova?

¹⁷Gu irairapai naadu Peora yo si arengba nga te? nga gu ani ata girisa nga tirani ti ni daku areme ya? nga gu gberãngbi ati ku ri ga Yekova rimbasa aboro tipa ha,

¹⁸oni sa tironi ni gi uru re ti peka fuo Yekova? Ka oni asá mungu kuti Yekova areme, gba ko aérã fu rimbasa aYisaraere dunduko.

¹⁹Ono, si ngia gu ringara nga ga gaoni ũkumbo du ni birikobiriko ho, oni súsi tie ku rogo gu ringara nga ga ga Yekova ũkumbo, yo du ga Yekova banye ni, ki di ũkumbo dagba rani. Ono ka oni sá nga mungu kuti Yekova ya, watadu kuti rani a ya, nidua bamotumo fu roni akia ti gu bamotumo nga ga Yekova gaani Mbori.

²⁰Ati Akana nangia wiri Zera ati ndika tipa dikadika he, zinga ki ti ku ri rimbasa aYisaraere dunduko, te? Ko akpi nga rogo gako irairapai ni sa ko a te.’”

²¹Ngbatunga Rubena na ngbatunga Gada na gu bebere ngbatunga Manase ki karaga pai, ki ya fu agu yo nadu ku ri arika ngbatunga aYisaraere,

²²“Yekova nga Mbori ku ri ambori. Yekova nga Mbori ku ri ambori, ko ni tiko ini gu pai; aYisaraere ni tiyo aína ha a! Ka si du ni samungu, watadu ni tindika kuti Yekova, ka oni bátasi nga rani ni gi uru re ya,

²³tipa dua ani bamotumo ka sa tirani ti peka fuo Yekova; watadu ka si du tipa tumo ni zozo amotumo auru he na ni amotumo riahe, watadu na ni amotumo zereda auru he. Yekova ni tiko ko asápa ngbanga ha.

²⁴Ono ani amangi he ni gunde ni berẽ pai, ni gu rago nikaye awironi ka gumba pai fu awirani, ki ya, ‘Pa roni waĩ na Yekova, nga ga aYisaraere Mbori?

²⁵Bambiko Yekova amoi Yaradene dagba rani na oni ni bangbandarago, oni nga ngbatunga Rubena na ngbatunga Gada; oni adu nga na ũkumbo be Yekova te.’ Si du awironi amánga awirani i mbu gunde ti Yekova.

²⁶Si du ani aya ti ni, ‘Ani tóna ka dua bamotumo tipa rani, angia nga tipa zozo motumo ya, na tipa aũmotumo a ya,

²⁷ono si du ni dezirepai dagba rani na oni, na dagba rika angbatungarani fuo rani, ya ani nimangi pa Yekova ku bara bangiriko na gaani zozo amotumo na gaani amotumo, na gaani amotumo zereda, awironi ka aya fu awirani ni gu rago nikaye, “Oni adú nga na ũkumbo be Yekova te.” ’

²⁸Si du ani aberẽ he ti ni ya, ka si adú wo, ho i ka gumba pai ni fu rani watadu fu angbatungarani ni gu rago nikaye, ani ayá, ‘Oni bí kpia ga Yekova bamotumo, nga gu abarani ambakadi he, angia nga tipa zozo motumo ya, na amotumo a ya, ono si du ni dezirepai dagba rani na oni.’

²⁹Ani aida nga ka sa mungu kuti Yekova te, ki sa tirani ni gi uru re ti peka fuo Yekova, ka dua bamotumo tipa zozo motumo, na tipa amotumo riahe, na tipa amotumo, akia ti gu bamotumo nga ga Yekova gaani Mbori du barangba gako banye te!”

³⁰Ho Finasa nangia boromotumo, na abazogo rimbasa aboro, nga agu yo nadu ku ri arika ngbatunga rimbasa aYisaraere nadu na ko, agi agu apai ni re ngbatunga Rubena agumba ha na ngbatunga Gada na ngbatunga Manase, si angba ti yo gbe.

³¹Finasa wiri Erazara nangia boromotumo ki ya fu ngbatunga Rubena na fu ngbatunga Gada, na fu ngbatunga Manase. “Areme ini ani he ya Yekova du dagba rani, bambiko oni ati nga ndika rogo gi pai re kuti Yekova te; si du oni abatasi awiri aYisaraere ti ni be Yekova.”

³²Finasa wiri Erazara nangia boromotumo, na abazogo, ki karaga tiyo dagba ngbatunga Rubena, na dagba ngbatunga Gada, ringara Girada yo, ku rogo ringara Kanana, koyo du awiri aYisaraere ni, ki yega na pai fu yo berewe.

³³Gi pai re ki ngba ti awiri aYisaraere: awiri aYisaraere ki sambua Mbori, ka i agumba nga pa ndu berewe fuo yo na vura, ka gbarasa gu ringara ngbatunga Rubena adu rogo ho na ngbatunga Gada ya.

³⁴Ngbatunga Rubena na ngbatunga Gada ki yambu rimo gu bamotumo re nga Dezirepai; i aya, “Bambiko si nga dezirepai dagba rani na yo ya Yekova nga Mbori.”