Read zande Yosua 23 Bible Online

Yosua 23 - zande bible

Yosua 23

¹Si ki ta du wa gere fuo dungu arame, ho Yekova afu zereda ni fu aYisaraere be avurayo dunduko kirikiri. Yosua Ki du ni gbinza ko, dungu garã asaki ko gbe,

²Yosua ki yambu aYisaraere dunduko, na gayo abaakumba na gayo abazogo na gayo abasapungbanga, na gayo abarumbatayo fu aboro, ki ya fu yo, “Mi gbinza awere, dungu garã saki re gbe.

³Oni bi agu apai dunduko Yekova gaoni Mbori amangi he kuti agi arika aboro re mbiko roni, bambiko Yekova, gaoni Mbori, ko du naaso vura tipa roni.

⁴Oni ngére, mi akparaka agu arikaaboro fu roni nanye, i du ni gaoni aboro tipa angbatungaroni, tona Yaradene yo, ki da ti gu Bakere Baime ku dioyo, wa sa na agu arikaaboro mi aima roga yo Ku sa yo.

⁵Yekova gaoni Mbori, ko adó yo barangba roni, ki do yo ti bangironi ku sa yo; oni adía gayo aringara, a wa Yekova gaoni Mbori akido he fu roni.

⁶Si du oni ngárã tie ka ka kuti agu apai dunduko du ni keke he rogo ga Mose kitabu rugute yo ka amanga ha. Ka oni asá nga tironi ti ni ku kumbabe na ku garebe a ya;

⁷ka oni akóda nga tironi na agi arikaaboro nanye dagba roni re ya, ka oni ayámba nga rimo gayo ambori a ya, watadu zunga he ni rimoho, watadu manga paha, watadu tumusa ku sende barangba ha a ya.

⁸Ono oni ká kuti Yekova gaoni Mbori, a wa oni amangi ki da ti gi uru re.

⁹Bambiko Yekova ado bakere arikaaboro barangba roni du ni nyanyaki yo a. Ono tipa roni, a nga boro ho sa arengbe ka ru barangba roni dati gi uru te re.

¹⁰Boro sa dagba roni adó aboro 1,000; bambiko Yekova gaoni Mbori, ko du naso vura tipa roni, a wa ko akido he fu roni.

¹¹Oni bánda tironi tie wenengaĩ, oni nikpí nyemu Yekova gaoni Mbori.

¹²Bambiko ka oni ga ku sa yo, ka koda tironi na yangara agi arikaaboro re nanye dagba roni, ki rogo tironi na yo, ki nirogo awiriyo nga ade, i ki nirogo awironi nga ade a,

¹³oni íni he ni rengo ya Yekova gaoni Mbori ko adó nga agi arikaaboro re barangba roni kindi te. Ono i adú fu roni ni nzingiripai, ni gbina, ni ũrupa pavururoni, na wa akiwe bangironi yo, daho oni ka nyasa ni rogo gi wene ringara re nga gu Yekova gaoni Mbori afu fu roni.

¹⁴“Awere mi nikandu ngba gu gene nga ga aboro zegino dunduko, oni dunduko íni he kpotoroni yo na mbisimoroni, ya a nga wenepai nakpa sa dagba agu apai dunduko Yekova gaoni Mbori akido pa ha fu roni te; si amangi dunduko fu roni, a nga pai sa nakpa te.

¹⁵Ono wa weneapai aye fu roni dunduko nga gu Yekova gaoni Mbori akido pa ha fu roni, kina wo Yekova ka akeda gbigbitaapai ku ri roni a, daho ko ka ba tungaroni ni kpakaya rogo gi wene ringara re nga gu Yekova gaoni Mbori afu he fu roni.

¹⁶Ka oni gú auru gu zungahe nga ga Yekova gaoni Mbori, nga gu ko arugu roni na ni, oni ki ndu ki nimangi pa kura ambori, ki nitumusa ku sende barangba ha. Ga Yekova erã arúnguda kuti roni, oni ki nyasi ni ipo rogo gu wene ringara re nga gu ko afu he fu roni.”