Read zande Yosua 3 Bible Online

Yosua 3 - zande bible

Yosua 3

¹Yosua ki guari ngbatutu wiso, i ki guari Sitimi yo ki ye ku Yaradene yo, ko na awiri aYisaraere dunduko; i ki sungu yo mbata i nikasi ku mbiti yo.

²Si ki ta du wa gere fuo rame biata, abarumbatayo fu aboro ki ta rogo abataya dunduko,

³ki rugu aboro, niya, “Ho oni ka bi sanduki mokido ni nga ga Yekova gaoni Mbori, na aboromotumo nga aRevi i nitindi he, oni ki guari ba roni ho, ki ndu fuo ho,

⁴oni ki ini pa gu gene oni akandu ngba ha, bambiko oni asusa nga ngba gu gene re mbata te. Ono dagba rago adú dagba roni na ni, wa bagiza mbiribe 2,000, ka oni mbédi nga na ni ya.”

⁵Yosua ki ya fu aboro, “Oni kpára tironi ziazia; bambiko gba Yekova akamanga iiriwo apai ku bangironi.”

⁶Yosua ki ya fu aboromotumo. “Oni túmba sanduki mokido, ki si ku mbiti yo mbata fu aboro.” I ki tumba sanduki mokido, ki susi ku mbata yo fu aboro.

⁷Yekova ki ya fu Yosua, “Ti gi uru re mi akatona kiisa pa ro ku bangiri aYisaraere dunduko, i ini he ti ni ya, wa mi adu na Mose, kina wo mi akadu na mo.

⁸Mo arúga agu aboromotumo ninatinda sanduki mokido, ki ya fu yo, ‘Ho oni ka da ni ti ngba ime Yaradene, oni ki ru zaa rogo Yaradene.’ ”

⁹Yosua ki ya fu awiri aYisaraere, “Oni yé kono, ka gia sangba Yekova nga gaoni Mbori.”

¹⁰Yosua ki ya. “Mbiko gere oni ka ina ti ni ya gu Mbori du ni ungako, ko du dagba roni, ko ahé nga do aKanano barangba roni, na aEto, na aIvo, na aPereso, na aGirigaro, na aAmoro, na aYebuso a te.

¹¹Oni ngére, gu sanduki mokido nga ga gu Gbia du kpotosende ni gako dunduko, si nikasusa ku mbata yo fu roni ku rogo Yaradene.

¹²Oni rógo akumba 12 tie dagba angbatunga aYisaraere yo, nga akumba ni ba sa sa wa du pa ngbatungayo.

¹³Si adú wa gere, ho kpendu agu aboromotumo ninatinda ga Yekova sanduki, nga gu Gbia du kpotosende ni gako dunduko, ka ru ni rogo gu ime nga Yaradene, ime Yaradene arú zaa ka si afú nga ya, gu ime naye ngbi yo si ki dungura tihe ku rogo baha sa.”

¹⁴Si ki ta du wa gere, ho aboro aguari ni rogo gayo abamburoko, ka si ku mbiti Yaradene yo, aboromotumo ki tindi sanduki mokido ku mbata yo fu aboro.

¹⁵Ho agu yo natindi sanduki ada ni Yaradene yo, kpendu agu aboromotumo natindi sanduki ki zoro ku ime yo, ti ngba di, bambiko gu ime nga Yaradene regbo keahe si anihi ahi ki fu ku pia yo,

¹⁶gu ime naye ngbi yo si ki ru ki nidungura tihe tuturũ toni ku rogo baha sa, ku Adama yo nga gu bakporo du pati Saretana, na gu nafu ku pa di yo koyo du gu baime ni pangba kpasakpasa rago yo, nga Baime Tikpo, si ki kati dunduko. Aboro ki si di ku mbiti yo ningere ku Yereo yo.

¹⁷Agu aboromotumo natindi ga Yekova sanduki mokido ki ru aru zaa auru ugu sende bebere Yaradene yo, aYisaraere ki si asi dunduko ku mbiti yo auru ugu sende, daho rikayo asi ni kpakaya ku mbiti Yaradene yo.