Read zande Yosua 4 Bible Online

Yosua 4 - zande bible

Yosua 4

¹Ho rikayo asi ni ku mbiti Yaradene yo kpakaya, Yekova agumba pai fu Yosua, ki ya,

²“Mo rógo akumba 12 dagba aboro, nga akumba ni ba sa sa dagba angbatungayo,

³ki rugu yo, ki ya, ‘Oni rógo ambia 12 bebere Yaradene yo, rogo kina gu ba ho ndu aboromotumo niru ni. Oni ki ndu na ni, ki moi he yo oni ka ra ni ni gi uru re.’ ”

⁴Yosua ki yambu akumba 12, nga agu yo ko asia yo dagba awiri aYisaraere, nga akumba ni ba sa sa dagba angbatungayo.

⁵Yosua ki ya fu yo, “Oni súsi ku mbata yo fu ga Yekova sanduki nga gaoni Mbori ku bebere Yaradene yo, ki tindi ambia ku pagoroni wa du oni ni ba sa sa, ringbisi he a wa du angbatunga awiri aYisaraere.

⁶Gi pai re ki du ni ngbaanga fu roni, ho awironi ka nisana roni ni ti gu rago nikaye, ki ya, ‘Gini pai agi ambia ayugo ho re?’

⁷Oni ki ya fu yo, ‘Bambiko ime Yaradene akparaka barangba ga Yekova sanduki mokido, ho si asi Yaradene ni, ime Yaradene akparaka’. Agi ambia re ki du tipa tingida pa ha fu awiri aYisaraere kindi.”

⁸Awiri aYisaraere ki mangi he wa Yosua arugu yo na ni, i ki rogo ambia 12 bebere Yaradene yo, a wa Yekova agumba paha fu Yosua, ringbisi he a wa du pa angbatunga awiri aYisaraere. I ki si na ni ku ho i ara ni, ki zozogo ho yo.

⁹Yosua ki dua kura ambia 12 bebere Yaradene yo, rogo gu ba ho ndu agu aboromotumo natindi sanduki mokido aru ni. Si kina ho ki da ku awere.

¹⁰Agu aboromotumo natindi sanduki i aru bebere Yaradene yo, daho i amangi agu apai ni re dunduko ki nyasi he, nga agu apai Yekova arugu Yosua ko gumba ha fu aboro, a wa Mose arugu Yosua na ni. Aboro ki ipisi tiyo ki si ku mbiti yo;

¹¹ho aboro asi ni kpakaya, ga Yekova sanduki ki si fuo yo ku mbiti yo, na aboromotumo ku bangiri aboro.

¹²Awiri Rubena, na awiri Gada, na gu bebere ngbatunga Manase, i ki si ku mbata yo fu awiri aYisaraere na aũvura be yo, a wa Mose agumba ha fu yo.

¹³Aboro ki si ku mbiti yo ku bara bangiri Yekova wa aboro 40,000 ni vodivodi tiyo na aũvura tipa sovura, ku rogo gu kpasakpasa rago du pati Yereo.

¹⁴Ni gu uru re Yekova akiisi pa Yosua ku bangiri aYisaraere dunduko; i ki gunde ti ko, ti gako arame dunduko, a wa i agunde ti Mose.

¹⁵Yekova ki ya fu Yosua.

¹⁶“Mo rúgu agu aboromotumo natinda sanduki dezirepai, i kúru Yaradene yo.”

¹⁷Si du Yosua arugu aboromotumo ti ni, ki ya, “Oni kúru Yaradene yo.”

¹⁸Ho agu aboromotumo natindi ga Yekova sanduki mokido akuru ni Yaradene yo, kpandu aboromotumo ki ta si ugu sende asi, ime Yaradene ki karaga tihe ku baha, ki fu kuti ngba gangoho dunduko, a wa si adu mbata.

¹⁹Aboro ki guari Yaradene yo ti bawe rame nga ga bambata diwi, ki zi bataya Girigara yo, pati Yereo ku uroyo.

²⁰Agu ambia nadu 12, nga gu i arogo ho Yaradene yo, Yosua ki dua ha Girigara yo.

²¹Ko ki ya fu awiri aYisaraere, “Ho awironi ka nisana abayo ni ni gu rago nikaye, ki ya, ‘Gini pai agi ambia ayugo ho re?’

²²oni ki yugu pa ha fu awironi, ki ya, ‘AYisaraere nasi gi Yaradene re ku mbiti no auru ugu sende.’

²³Bambiko Yekova gaoni Mbori augusi ime Yaradene barangba roni, daho oni asi ni, a wa Yekova gaoni Mbori amangi he tipa Zamba Baime, nga gu ko augusi barangba rani, daho ani asi ni ku mbiti yo.

²⁴Aboro kpotosende íni he dunduko ya be Yekova du na tandu; oni ki nigunde ti Yekova gaoni Mbori kindi.”